Myeelwe 20
20
Zyamaanzi aakazwa mubbwe
(Kulonga 17.1-7)
1Lino mumwezi wakusaanguna Baisilayeli boonse bakasika kunkanda ya Zini, nkabela bakayaka zivuka ku Kadesyi. Ooko nkonkuko kwakafwida Miliyamu akuzikkwa.
2Lino bantu bakabula maanzi, aboobo bakatongookela Mozesi a Aloni. 3Bakakazyanya a Mozesi bakati, “Nicakabota nitwakafwa ciindi eeco bakwesu nibakajaigwa a Mwami Leza. 4Nkaambo nzi ncookeeta bantu ba Mwami Leza munkanda eeyi? Eena nkuti tufwe swebo aŋombe zyesu? 5Ino nkaambo nzi ncookatugwisya kuzwa ku Ijipiti kusikila kuno kubusena bubi loko bwamapenzi kutakwe acintu cinga cilakula? Amubone, taakwe maila, taakwe nkuyu, taakwe nsaansa naaba mapomegileneti, alimwi taakwe naaba maanzi cula pe.”
6Mpawo Mozesi a Aloni bakazwa ooko kwakabungene bantu, baakwiima kumulyango watente lyakuswaanganina. Bakavuntama, mpoonya bulemu bwa Leza bwakalibonya kulimbabo. 7Mwami Leza wakaambila Mozesi kuti, 8“Bweza musako uuli kumbele lyabbokesi lyacizuminano, wamana yebo a Aloni mubunganye bantu boonse. Lino kabalangilila boonse ukaambile bbwe, nkabela liyoopoomoka maanzi. Mbombuboobu mbonga ulajana maanzi aakuti banywe bantu aaba abanyama babo.”
9Lino Mozesi wakabweza musako ooyo, mbubonya mbuli mbwaakalaililwa a Mwami Leza. 10Nkaako Mozesi a Aloni bakabunganya bantu boonse kubbwe eelyo, ooko Mozesi wakaamba kuti, “Amuswiilile nywebo nobasicinguni! Eena muyanda maanzi?” 11Mozesi wakavuumuna musako akuuma bbwe ziindi zyobilo, maanzi akapoomoka, bantu boonse bakanywa aŋombe zyabo.
12Pele Mwami Leza wakaambila Mozesi a Aloni kuti, “Nkaambo kakuti tiimwandisyoma cakumaninina akundilemeka kumbele lya Baisilayeli, tamukooyoonjizya bantu aaba munyika njindakabasyomezya kuti ndiyoobapa.”
13Aaya ngamaanzi aali mbuli ku Meliba ooko Baisilayeli nkobakatongooka akutalika Mwami Leza, alimwi nkonkuko ooko awalo nkwaakalitondezya kuti ulasalala akati kabo.
Mwami waku Edomu mbwaakakasya Baisilayeli kwiinda mucisi cakwe
14Lino Mozesi wakatuma bantu kuzwa ku Kadesyi kuya kumwami waku Edomu baakuti, “Ngaaya makani aazwa kubanyoko Baisilayeli. Mulizi mapenzi oonse aatujisi. 15Bamatata bakainka ku Ijipiti, nkotwakaakukkala ciindi cilamfu. Pele Baijipiti bakatulela calunya antoomwe amatata. 16Twakalilila Mwami Leza kuti atugwisye. Walo wakamvwa kulila kwesu, mpoonya wakatuma mungelo wakwe wakatusololela kuzwa mu Ijipiti. Kwalino tukkede ku Kadesyi munzi uuli mumunyinza wanu. 17Akaka twakumbila kuti twiinde mucisi canu, swebo aŋombe zyesu. Tatukooinda mumyuunda yanu nikuba kunywa maanzi mumikalo yanu. Tunooindilide buyo kusikila tukazwe mucisi canu.”
18Pele Baedomu bakati kulimbabo, “Zyakwiinda muno pe, naa musole tulamulwana amapanga.”
19Baisilayeli bakaingula kuti, “Tuleendela buyo mumugwagwa, naa kuti tunywe maanzi naa kunywisya lubono lwesu tulabbadela. Tuyanda kwiinda buyo, taakwe cimbi pe.”
20Balo bakati, “Zyakwiinda pe.” Mpoonya Baedomu bakabunganya mpi yabo nkali yakubalwana. 21Mukuti Baedomu bakabakasya kwiinda, Baisilayeli bakapiluka.
Lufu lwa Aloni
22Lino Baisilayeli boonse bakazwa ku Kadesyi bakeenda mane baakusika kucilundu ca Hoo. 23Ooko kumbali lyamunyinza wacisi ca Edomu, Mwami Leza wakaambila Mozesi a Aloni kuti, 24“Aloni awalo takooyoonjila munyika njindakasyomezya ku Baisilayeli. Ulafwa nkaambo mwakasotoka malailile aangu ku Meliba. 25Koita Aloni amwanaakwe Eliyazaa, ubatole atala aacilundu ca Hoo, 26ooko ukasamunune Aloni zisani zyabupaizi ukazisamike Eliyazaa mwanaakwe. Aloni uyoofwida nkukonya ooko.”
27Lino Mozesi wakacita mbuli mbwaakalaililwa a Mwami Leza. Bakatanta acilundu ca Hoo bantu boonse kabababwene. 28Mpoonya Mozesi wakayabula Aloni jansi lyabupaizi akusamika Eliyazaa mwanaakwe, mpoonya aawo Aloni wakafwa atala aacilundu. 29Lino bantu nibakamvwa kuti Aloni wafwa, bakamulila kwamazuba aali makumi otatwe.
Currently Selected:
Myeelwe 20: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
