Josyuwa 4
4
Mbubakabikka mabwe aaciibalusyo
1Lino bantu boonse nibakazubuka mulonga wa Jolodani, Mwami Leza wakaambila Josyuwa kuti, 2“Sala baalumi bali kkumi ababili omwe-omwe kuzwa kumisyobo yoonse, 3ubalailile kuti babweze mabwe aali kkumi aabili kuzwa akati kamulonga wa Jolodani aawo bapaizi mpubaimvwi, mwaatolelezye, mukaabikke ooko nkomuyooonena sunu.”
4Mpoonya Josyuwa wakaita baalumi bali kkumi ababili mbaakasala kuzwa kumusyobo omwe-omwe wa Baisilayeli, 5akubaambila kuti, “Amwiinde kumbele lyabbokesi lyacizuminano ca Mwami Leza wanu, muye akati kamulonga wa Jolodani. Omwe-omwe kuzwa kumisyobo yanu uleelede kukulika bbwe. 6Mabwe aaya ayooba ciibalusyo kulindinywe. Mazuba aaboola, bana banu baakumubuzya kuti ino mabwe aaya aamba nzi? 7Mukabaambile kuti ciindi bbokesi lyacizuminano ca Mwami Leza nilyakazubusigwa, maanzi aamulonga wa Jolodani akaandaana. Mabwe aaya ayooibalusya Baisilayeli lyoonse eeco cakacitika.”
8Eelyo baalumi aabo bakacita mbubonya mbuli mbwaakabalailila Josyuwa. Bakabweza mabwe aali kkumi aabili kuzwa akati kamulonga wa Jolodani, omwe-omwe kuzwa kumisyobo yabo mbuli Mwami Leza mbwaakalailila Josyuwa. Bakaabweza, baakwaatula ooko nkubakaakoonena. 9Josyuwa wakaimika mabwe aali kkumi aabili aakazwa akati kamulonga wa Jolodani, abusena aalya aakaimvwi bapaizi bakabwezede bbokesi lyacizuminano. Mabwe aaya mpaacili asunu aawo.
10Lino bapaizi aabo bakabwezede bbokesi, bakaciliimvwi akati kamulonga wa Jolodani mane kusikila nibakacita zintu zyoonse eezyo Mwami Leza nzyaakalailila Josyuwa kuti bazicite. Bakacita mbubonya mbuli Mozesi mbwaakaambilide Josyuwa. Bantu bakafwambaana kuzubuka. 11Bamane buyo kuzubuka, bapaizi bakabwezede bbokesi lyacizuminano ca Mwami Leza bakainda kumbele, bantu boonse kabalangilila.
12Lino basilumamba bamisyobo ya Lubeni, Gadi, acisela camusyobo wa Manase bakazubuka mulonga kabajisi azilwanyo zyabo, bakali kumbele lya Baisilayelinyina, mbubonya mbuli Mozesi mbwaakalailila. 13Kwakazubuka basilumamba bakatisike kuzyuulu zili makumi one kumbele lya Mwami Leza, kabageme mabanda aa Jeliko. 14Buzuba oobo zyakacita Mwami Leza, zyakapa kuti Baisilayeli bazibe kuti Josyuwa wakali mwaalumi singuzu. Bakamulemeka mubuumi bwakwe boonse mbubonya mbuli mbubakali kulemeka Mozesi.
15Lino Mwami Leza wakaambila Josyuwa kuti, 16“Lailila bapaizi babwezede bbokesi lyacizuminano kuti bazwe mumulonga wa Jolodani.” 17Josyuwa wakalailila bapaizi aabo kuti bazubuke. 18Mpawo bapaizi bakazubuka kababwezede abbokesi lyacizuminano ca Mwami Leza. Bazubuke buyo, maanzi akabuwana akufwasuka mbuli lyoonse.
19Mubuzuba bwakkumi bwamwezi mutaanzi, bantu bakalonga kuzwa kumbali aamulonga wa Jolodani, bakaakuyaka zivuka ku Giligali kujwe lyamunyinza wa Jeliko. 20Ooko Josyuwa wakaimika mabwe aalya aali kkumi aabili ngibakabweza mumulonga. 21Wakaambila Baisilayeli kuti, “Mazuba aaboola, bana banu baakumubuzya naa mabwe aaya aamba nzi, 22mukabaambile kuti twakazubuka mulonga wa Jolodani anyika njumu. 23Nkaambo Mwami Leza wanu wakaandaanya maanzi aa Jolodani kumbele lyanu, kumane nyoonse mwakazubuka. Mwami Leza wanu wakacita kumulonga wa Jolodani mbubonya mbuli mbwaakacita ciindi ciya kulwizi lusalala. Wakalwaandaanya mane kusikila toonse nitwakazubuka. 24Wakacita eeci kuti misyobo yoonse yaansi izibe kuti Mwami Leza ngusinguzu. Nkaako mweelede kulemeka Mwami Leza lyoonse.”
Currently Selected:
Josyuwa 4: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
