Josyuwa 18

Nyika mbuyakapambaulwa

1Lino nibakamana kuzunda nyika, Baisilayeli boonse bakabungana antoomwe ku Syilo akusimpa tente lyakuswaanganina. Nkabela bantu banyika eeyo bakalibombya kulimbabo. 2Pele kwakacili misyobo ya Baisilayeli iili ciloba yatakanatambula lukono lwayo. 3Mpawo Josyuwa wakaambila Baisilayeli kuti, “Ino muyooinka lili kuyootola nyika eeyo Mwami Leza, Leza wabasikale banu njaakamupa? 4Amusale baalumi botatwe kuzwa kumusyobo omwe-omwe. Mebo ndilabatuma kuti bakalange-lange nyika, akulemba mbuli mbwiibede, kuti ndikabape mbubonya mbuli bweelede musyobo omwe-omwe. Baakumana, bakaboole kuzoondaambila. 5Nyika eeyo iyoopambaulwa muzipaanzi zili ciloba. Bamusyobo wa Juda baleelede kukkala kumusanza mucisi cabo, abalo balunyungu lwa Josefa baleelede kukkala kunyika mucisi cabo. 6Mwaakumana kulemba-lemba nyika mbuli mbwiibede muzipaanzi zili ciloba, mukalete nzyomwalemba kulindime. Eelyo nzoouma cisolo, nkamubuzizye ku Mwami Leza wanu. 7Pele Balevi balikke mbabatapegwi caabilo akati kanu, nkaambo caabilo cabo nkubelekela Mwami Leza mubupaizi bwabo. Bamisyobo ya Gadi, Lubeni acisela ca Manase balo bakapedwe kale lukono lwabo kujwe lyamulonga wa Jolodani. Mozesi mubelesi wa Mwami Leza nguwakabapa nyika eeyi.”

8Lino baalumi nibakalibambila kuunka kuyoolanga-langa nyika eeyo, Josyuwa wakabalailila kuti, “Kamuya mukalange-lange nyika akulemba mbuli mbwiibede. Mwaakumana mukaboole kulindime, eelyo mebo kuno ku Syilo nzoouma cisolo, nkamubuzizye ku Mwami Leza.” 9Aboobo baalumi aabo bakainka kuyoolanga-langa nyika. Bakaakulemba mbuli nyika eeyo mbwiibede acilembelo. Bakalemba minzi yoonse muzipaanzi zili ciloba, bamane bakapiluka kuli Josyuwa kuzivuka ku Syilo. 10Mpoonya Josyuwa wakauma cisolo ku Syilo kuti ababuzizye ku Mwami Leza. Kumane wakapa misyobo ya Isilayeli eeyi iili ciloba mbubonya mbuli muziinga zyabo.

Nyika yakapegwa musyobo wa Benjamini

11Bamusyobo wa Benjamini muziinga zyabo mbibakasaanguna kupegwa. Nyika yabo yakali akati kamusyobo wa Juda awa Josefa. 12Kubbazu lyakunyika, munyinza wabo wakali kutalikila kumulonga wa Jolodani, waakwiinda kunselelo lyamunzi wa Jeliko nkouli kunyika, akugama kumbo kunyika yatulundu-lundu, mane ngooyo waakugolela kunkanda ku Betiaveni. 13Kuzwa kooko wakakosola wagama kunselelo lyamunzi wa Luzi, uuli ngu Beteli. Kumusanza wakaakusika ku Atalotiada cilundu nkocili kumusanza waakwiinda kunselelo lya Betiholoni. 14Kuzwa kucilundu cilangene a Betiholoni cilundu eeci nkocili kumusanza munyinza wakaakunyona wagama lwaambo akuyoosika ku Kiliyatibaali, uuli ngu Kiliyatijeyalimu, wakali munzi wamusyobo wa Juda. Ooyu nguwakali munyinza wakumbo. 15Munyinza wakumusanza wakali kutalikila kumbali aamunzi wa Kiliyatijeyalimu nkuuli kumbo, kuzwa kooko wakali kugama ku Efuloni mane ngooyo waakugolela kukasensa kaku Nefutowa. 16Kuzwa kooko wakaselela wagama kunselelo lyacilundu kulangana akkuti lya Hinomu kubbazu lyakunyika lyakkuti lya Lefaimu. Wakainda mukkuti lya Hinomu, ngooyo watobelezya kkuti nkolili kumusanza lyamunzi wa Bajebusi, mane waakusika ku Enilogeli. 17Kuzwa kooko wakanyonena kubbazu lyakunyika wagama ku Enisyemesyi, mane ngooyo ku Geliloti kulangana amumpata wa Adumimu, mane waakusika kubbwe lya Bohani mwanaa Lubeni. 18Kuzwa kooko wakagama kunyika kunselelo lya Betialaba mane ngooyo waakusika ku Alaba. 19Kuzwa kooko wakaya kunselelo lya Betihogila kunyika, waakugolela kunyika kulwizi lwamunyo kutilila mulonga wa Jolodani kumusanza. Ooyu nguwakali munyinza wakumusanza. 20Mulonga wa Jolodani wakali ngomunyinza wakujwe. Eeyi njeminyinza yakali yalukono lwaziinga zyamusyobo wa Benjamini.

21Lino njeeyi minzi yamusyobo wa Benjamini muziinga zyawo: Jeliko, Betihogila, Emekikezizi, 22Betialaba, Zemalaimu, Beteli, 23Avimu, Pala, Ofula, 24Kefaamoni, Ofuni, awa Geba. Minzi eeyi yoonse yakali kkumi aine kubikkilizya atunzi twayo.

25Kwakali aimwi minzi eeyi, Gibiyoni, Lama, Beeloti, 26Mizipa, Kefila, Moza, 27Lekemu, Iipeeli, Talala, 28Zela, Haelefu, munzi wa Bajebusi, uuli ngu Jelusalemu, Gibeya, awa Kiliyati. Minzi yoonse eeyi yakali kkumi aine kubikkilizya atunzi twayo. Oolu ndulwakali lukono lwa Babenjamini muziinga zyabo.

Currently Selected:

Josyuwa 18: Tonga96

Highlight

Copy