Josyuwa 15

Nyika yakapegwa musyobo wa Juda

1Lino ndoolu lukono lwamusyobo wa Juda muziinga zyabo. Nyika yabo yakali kusika kucisi ca Edomu, kunkanda ya Zini nkoili kumusanza kwini. 2Munyinza wabo wakumusanza wakali kutalikila kugolela lwizi lwamunyo, 3ngooyo waakukosola mumpata wa Akilabimu mane waakusika ku Zini. Munyinza ooyu wakainda kumusanza wa Kadesyibaaneya ngooyo waakwiinda ku Heziloni mane waakusika ku Adaa. Kuzwa kooko waakunyona wagama ku Kaaka. 4Kuzwa aawo wakainda ku Azimoni, ooko wakaakunjila mumulonga wa Ijipiti, waakugolela mulwizi. Munyinza wabo wakumusanza mbuubede oobu.

5Munyinza wabo wakujwe wakali lwizi lwamunyo, mane kuyoosika kutilila mulonga wa Jolodani. Lino munyinza wakubbazu lyakunyika wakali kutalikila kulwizi ooko kutilila mulonga wa Jolodani, 6ngooyo waakwiinda ku Betihogila mane waakusika kubbazu lyakunyika lyaku Betialaba, kuzwa kooko wakaakusika kubbwe lya Bohani, mwanaa Lubeni. 7Lino kuzwa kukkuti lya Akoo, munyinza wakagama ku Debii, ngooyo waakunyona kubbazu lyakunyika waya ku Giligali, kulangana amumpata wa Adumimu kumusanza lyakkuti. Wakaindilila mane waakusika kutusensa twaku Enisyemesyi waakugolela ku Enilogeli. 8Kumane wakainda mukkuti lya Benihinomu, ngooyo waakusika kunselelo lyatulundu-lundu tuli kumusanza wa Bajebusi, uuli ngu Jelusalemu. Kuzwa kooko ngooyo wakainda mutulundu-lundu tuli kumbo lyakkuti lya Hinomu kubbazu lyakunyika kugolela kukkuti lya Lefaimu. 9Kuzwa mutulundu-lundu ooto munyinza wakaselela wagama kutusensa twaku Nefutowa, mane waakusika kucilundu ca Efuloni, ngooyo waindilila waya ku Baala, uuli ngu Kiliyatijeyalimu. 10Kumane wakanyona kuzwa ku Baala wagama lwaambo kucilundu ca Siiya, watobelezya cilundu ca Jeyalimu cili ngu Kesaloni, kugama kubbazu lyakunyika, ngooyo waakusika ku Betisyemesyi, kumane waakukosweda ku Timuna. 11Munyinza wakagama kunyika, waakuselela ku Ekiloni, ngooyo waakunyonena ku Syikeloni, ngooyo waakwiinda wagama kucilundu ca Baala mane waakusika ku Jebuneeli. Munyinza ooyu wakali kugolela kulwizi.

12Munyinza wakumbo wakali lwizi lupati. Eeyi njiyakali minyinza yamusyobo wa Juda muziinga zyabo.

Kalebi mbwaakazunda minzi ya Hebuloni a Debii

(Babetesi 1.11-15)

13Lino mbubonya mbuli Mwami Leza mbwaakalailila Josyuwa, Josyuwa wakapa cisela canyika ya Juda kuli Kalebi mwanaa Jefune. Wakapegwa munzi wa Kiliyatiaaba uuli ngu Hebuloni. Aaba wakali ngosikale wa Baanaki. 14Kalebi wakatanda lunyungu lwa Anaki loonse lwakali mumunzi wa Hebuloni. Mumunzi ooyu kwakali ziinga zyotatwe zyaba, Syasyayi, Ahimani, a Talimayi. 15Kuzwa kooko wakainka kuyoolwana bantu bamunzi wa Debii, kaindi wakali kutegwa Kiliyatisefa. 16Lino Kalebi wakati, “Silutwe wampi iiyoozunda munzi wa Kiliyatisefa uzookwata mwanaangu Akisa.” 17Mpawo Otiniyeli mwanaa Kenazi ooyo wakali musyoonto wa Kalebi wakazunda munzi ooyo, nkaako Kalebi wakakwasya mwanaakwe Akisa kuli nguwe. 18Nibakakwatana, Otiniyeli wakakombelezya mukaintu wakwe kuti akakumbile kuli wisi, mpoonya wakainka kuli Kalebi. Mbwaakaselukila buyo ambongolo, Kalebi wakamubuzya ncaakali kuyanda. 19Walo wakaingula kuti, “Ndali kuyanda tusensa. Kayi nyika njookandipa ili mucimpayuma ca Negebu.” Nkaako Kalebi wakamupa tusensa twamutala atwakunselelo.

Minzi yamusyobo wa Juda

20Ndoolu lukono lwamusyobo wa Juda muziinga zyabo. 21Njeeyi minzi njibakatola eeyo yakali kumusanza, yakabambene amunyinza wa Edomu. Minzi eeyi yakali: Kabuzeeli, Eda, Jaguu, 22Kina, Dimona, Adada, 23Kedesyi, Hozoo, Itinani, 24Zifu, Telemu, Beyaloti, 25Hazoohadata, Keliyotiheziloni, uuli ngu Hazoo. 26Amamu, Syema, Molada, 27Hazagada, Hesyimoni, Betipeleti, 28Hazasyuwali, Biyasyeba, Biziyotiya, 29Baala, Iimu, Ezemu, 30Elitoladi, Kesili, Hooma, 31Zikilagi, Madimana, Sansana, 32Lebayoti, Syilihimu, Aini, awa Limoni. Minzi eeyi yoonse yakali makumi obilo afuka kubikkilizya atunzi twayo.

33Minzi yakali mutulundu-lundu kumbo njeeyi: Esyitaoli, Zola, Asyina, 34Zanowa, Eniganimu, Tapuwa, Enamu, 35Jaamuti, Adulamu, Soko, Azeka, 36Syaalaimu, Aditaimu, awa Gedela, naa Gedelotaimu. Minzi eeyi yoonse yakali kkumi aine kubikkilizya atunzi twayo.

37Kwakali aimwi minzi eeyi: Zenani, Hadasya, Migidaligadi, 38Dileyani, Mizipa, Jokiteeli, 39Lakisyi, Bozikati, Egiloni, 40Kabboni, Laamasi, Kitilisyi, 41Gedeloti, Betidagoni, Namaa awa Makkeda. Minzi eeyi yoonse yakali kkumi acisambomwe kubikkilizya atunzi twayo

42Kwakali aimwi minzi eeyi: Libuna, Eta, Asyani, 43Ifuta, Asyina, Nezibu, 44Keila, Akizibu a Malesya. Minzi eeyi yoonse yakali fuka kubikkilizya atunzi twayo.

45Kwakali aimwi minzi eeyi: Ekiloni atunzi twayo. 46Kujatikizya aminzi atunzi toonse twakabambene aku Asyidodi kuzwa ku Ekiloni mane kuyoosika kulwizi lupati.

47Kwakali munzi wa Asyidodi atunzi twawo awa Gaza atunzi twawo, mane kuyoosika kumulonga wa Ijipiti, kumbali alwizi lupati.

48Munyika yatulundu-lundu kwakali minzi eeyi: Syamii, Jatii, Soko, 49Dana, Kiliyatisana, uuli ngu Debii 50Anabu, Esyitemo, Animu, 51Gosyeni, Holoni, awa Gilo. Minzi eeyi yoonse yakali kkumi aumwi kubikkilizya atunzi twayo.

52Kwakali aimwi eeyi: Alabu, Duma, Esyani, 53Janimu, Betitapuwa, Afeka, 54Humita, Kiliyatiaaba, uuli ngu Hebuloni awa Ziyoo. Minzi eeyi yoonse yakali fuka kubikkilizya atunzi twayo.

55Kwakali aimwi eeyi: Maoni, Kaameli, Zifu, Juta, 56Jezuleeli, Jokideyamu, Zanowa, 57Kaini, Gibeya, a Timuna. Minzi eeyi yoonse yakali kkumi kubikkilizya atunzi twayo.

58Kwakali aimwi minzi eeyi, Halihuli, Betizuu, Gedoo, 59Maalati, Batianoti, awa Elitekoni. Minzi eeyi yoonse yakali cisambomwe kubikkilizya atunzi twayo.

60Kwakali aimwi eeyi: Kiliyatibaali, uuli ngu Kiliyatijeyalimu awa Labba. Minzi eeyi yakali ibili kubikkilizya atunzi twayo.

61Kwakali minzi eeyi munkanda: Betialaba, Midini, Sekaka, 62Nibusyani, munzi wamunyo, awa Enigedi. Minzi eeyi yoonse yakali cisambomwe kubikkilizya atunzi twayo.

63Pele bamusyobo wa Juda tiibakakonzya kutanda Bajebusi aabo bakali kukkala mu Jelusalemu, nkaako Bajebusi nkobacili asunu akati kamusyobo wa Juda.

Currently Selected:

Josyuwa 15: Tonga96

Highlight

Copy