Joweli 2
2
Cikwikwi ncicenjezyo ca Buzuba bwa Mwami
1Amusibe mweembo mu Ziyoni, jwi lyakucenjezya limvwigwe kuzwa kucilundu
cangu cisalala. Boonse bakkede munyika bakankame.
Nkaambo buzuba bwa Mwami Leza bulaza ncobeni. Buliswenede.
2Mbuzuba bwamudima uuyoosya, mbwamakumbi aasiya mbi!
Mbubungwengwemuka busiku azilundu, mbubonya oobo impi yabasinguzu mboiboola.
Taakwe anicakabede, alimwi tacikabi limbi pe.
3Ilasyukutula zisyango mbuli mulilo. Kacitanasika nyika nimbotu mbuli muunda wa Edeni,
pele cainda kwatuba buu mbuli muluya. Taakwe cinga calisisa akusyaala.
4Cikwikwi ciboneka mbuli mabbiza,
cilakalanta mbuli mabbiza aabasilumamba.
5Cilazuma mbuli nkalaki, cilasotooka azilundu.
Cilapasauka mbuli bwizu buyumu bupya amulilo cilayala na mbuli mpi.
6Mbubacibonena buyo, boonse batetelwa, boomfokelwa.
7Cilavutuka mbuli basinkondo, cilatanta bwaanda mbuli basilumamba. Cilakwapa taceelebi pe.
8Tacinjilani pe, lyoonse cigaminide buyo. Cilapwaya bwaanda, kacitaandaani pe.
9Citijaanina mumunzi, cilalimba bwaanda,
cilanjila mumaanda gulu. Cilanjila mumpulungwido mbuli babbi.
10Noceenda nyika ilazenzema, julu lilayuuntana.
Alyalo zuba amwezi zilabaya, zyakali nyenyezi tazicibali.
11Mwami Leza nguuzuma nasololela mpi yakwe.
Impi eeyo njanguzu, tiibaliki pe.
Buzuba bwa Mwami Leza tabulikomeneni,
bulayoosya kapati. Ani nguni uukonzya kubuyumina?
Zyakweempa
12Mwami Leza ulati, “Noliba lino amuboole
kulindime amoyo woonse, kamuliimya kulya akulila misozi.
13Mulitondezye kuusa mumoyo, kuleka buyo kuzapaula zisani.
Amuboole ku Mwami Leza wanu, nkaambo ngusiluse alimwi ngusiluzyalo.
Ngusilweetelelo, ngwaluyando lunji. Ngwalweengelelo tasubuli-subuli buyo pe.”
14Ulakonzya kuleka makanze ngaajisi akweengelela,
akumuleleka azilyo zinji. Aawo mulakonzya kumupa alimwi zituuzyo zyamaila awaini.
15Amusibe mweembo mu Ziyoni. Amuliimye kulya,
iibungane mbungano iisalala.
16Amubunganye bantu mubasalazye. Amwiite bapati antoomwe abana.
Amutolelele abavwanda. Abasibwiinga basiye ŋanda baboole.
17Bapaizi babelekela Mwami Leza, balile akati kacipaililo amanjililo.
Bakombelezezye akuti, “Lekelela bantu bako O Mwami Leza.
Bantu bako basale batabi cisesyo akati kabamasi. Nkaambo nzi ncobanooyooti, ‘Uli kuli Leza wabo?’”
Mwami Leza ulaleleka
18Ciindi eeco Mwami Leza uyoobusya nyika akubafwida luzyalo bantu bakwe.
19Uyoobaambila kuti, “Ndamupa maila, waini mupya, amafuta
manji ciyooba ceyo. Taakwe limbi nimuyooba cisesyo kuli bamasi pe.
20Njoobatandaanyina kule basinkondonyoko bakunyika,
njoobatonkela munkanda. Bali kumbele bayooulalila
kulwizi luli kujwe, bali kusule bayooulalila kulwizi luli kumbo.
Kuyoomvwika kununka kwamitunta! Mwami Leza wamucitila zigambya.”
21Utayoowi, o nyika, tangala akusekelela! Nkaambo Mwami Leza wakucitila zigambya.
22Mutayoowi nobanyama bamusokwe, nkaambo mweemvwe wasyuuka,
amisamu yazyala, nkuyu ansaansa mbwee!
23“Amutangale nobamu Ziyoni, amusekelele akaambo ka Mwami Leza wanu.
Wakamupa mvula yamweto mubululami bwakwe. Wakamutumina civuna-ŋombe, wakamuwisizya nkukula-nsoke mbuli lyoonse.
24Matala ayoozula maila, matalo ayoofwasuka waini amafuta mwaa!
25Njoomubweedezezya nzimwakasweekelwa acikwikwi,
mpaso, basimooloka answabaanda, impi eeyo njindakatumide kumuvumpa.
26Munooyoolya cakulilekela, nkaako muyootembaula Mwami Leza wanu.
Wakamucitila zigambya, taakwe limbi bantu bangu nibayoosampaulwa pe.
27Eelyo no Baisilayeli nomuyooziba kuti ndili akati kanu,
akuti ndendime Mwami Leza wanu, alimwi taakwe Leza uumbi pe.
Taakwe bantu bangu nibayoosampaulwa limbi pepe.
Zyabuzuba bwa Mwami Leza
28“Musule akooku njootila Muuya wangu abantu boonse, bayooamba majwi aangu.
Bamadaala bayoolota ziloto, abalo bakubusi bayoobona zilengaano.
29Ee, njootila Muuya wangu ababelesi bangu, baalumi abakaintu mumazuba aayo.
30“Ndiyoocita zigambya kujulu aansi, kuyooba bulowa amulilo asikunku wabusi.
31Zuba liyoobaya, lyasiya mbii! Awalo mwezi uyoosalala pyuu mbuli bulowa,
kabutanasika buzuba bwa Mwami Leza buyoosya bupati.
32Lino ooyo uukomba Mwami Leza uyoofutuka, mbuli mbwaakaamba Mwami Leza kuti,
Bali mu Jelusalemu amu Ziyoni bayoofutuka, aabo bakasalwa a Mwami Leza.”
Currently Selected:
Joweli 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
