Joweli 1
1
Cikwikwi mbucakavumpa
1Makani a Mwami Leza ngaakapa Joweli mwanaa Petuweli.
2Amuteelele nywebo nobapati, amuswiilile nywebo nomukkede munyika.
Sena kuli nicakacitikide cili boobu mumazuba aanu?
Nikuba mumazuba aabasikale banu?
3Amukabaambile bana banu makani aaya,
abalo bakaambile bana babo mbubonya.
4Zilimwa zyakasyaala kucikwikwi, mpaso zyakazoomaninizya.
Zilimwa zyakasyaala kuli basimooloka, nswabaanda zyakazoomaninizya.
Zyakasyaala kunswabaanda, nsozi zyakazoomanizya.
5Amubbatamuke, nobakolwi mulile. Amoomoke nywebo nozidakwa zyawaini
nkaambo nsaansa zyakukumbya waini zyanyonyoonwa.
6Makata aacikwikwi avumpa nyika yangu, ncikali alimwi tacibaliki.
Meno aaco ali mbuli aasyuumbwa, bakambwili baco bali mbuli syuumbwa muzyazyi.
7Cakanyonyoona nsaansa zyesu, cakamaninizya nkuyu zyesu supu!
Cakakwapaula mikuyu, mitabi yatuba buu!
8Nobantu amulile mbuli musimbi uusamide masaka uukkalidwe, uulila yooyo watibe mwaalumi wakwe.
9Zituuzyo zyamaila azyazyakunywa tazicibonwi kuŋanda ya Mwami Leza.
Aboobo bapaizi abalo balalila, aabo babelekela kumbele lya Mwami Leza.
10Akaka, myuunda yatuba buu! Ayalo nyika yayuma nta!
Maila akaligwa do, doono waini yanyugwa, kucinyina mafuta pe.
11Amutyompwe nobalimi, amulile nomukokola nsaansa, nkaambo butebuzi bwamaila tabuko.
12Misaansa yakayuma, ayalo mikuyu cwaa! Maapulo, amapomegilaneti,
twakali tukunka amisamu imwi yoonse cwa-cwa-cwa! Masimpe kutangala kwabantu kwamana.
13Amusame masaka nywebo nobapaizi, mulile. Amoomoke nomubelekela kucipaililo.
Amulile busiku boonse, nywebo nomubelekela kumbele lya Leza wangu.
Nkaambo zituuzyo zyamaila azyazyakunywa taziciletwi kuŋanda ya Leza wanu.
14Amubunganye bantu, baliimye kulya. Amwiite bapati aboonse bakkala munyika.
Baboole kuŋanda ya Mwami Leza wanu, amulile!
15Maawe, bwayoosya buzuba! Bulaleta lunyonyooko luzwa kuli Singuzuzyoonse.
16Tee zilyo zyanyonyoonwa katulibwenene?
Kutangala akusekelela tazicimo muŋanda ya Leza wesu.
17Mbuto zyabbabbatila. Aakali matala amwaika,
zisanza zyooleka, nkaambo maila apuutila.
18Azyalo ŋombe zilalila. Matanga aingaila nkaambo taakwe bwizu. Azyalo mbelele zyapenga.
19O Mwami Leza, ndakoompolola, nkaambo lumwi lwabuumpa bwizu
bwamunkanda, antoomwe amisamu mbuli mulilo.
20Abakali banyama bamusokwe balilila nduwe,
nkaambo tulonga twayuminina, alwalo lumwi lwabuumpa bwizu.
Currently Selected:
Joweli 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
