Jobo 20
20
Zofa
1Mpoonya Zofa Munaamati wakaingula kuti,
2“Yebo Jobo, wandilutizya, ncenciceeco ncindafwambaana kwiingula.
3Makani aako alasampaula, pele ndizi mbondeelede kukwiingula.
4Masimpe ayebo ulizi kuti kuzwa kumatalikilo aaciindi,
liya muntu naakabikkwa anyika aano,
5lutangalo lwabasizinyonyoono nduce,
akukondwa kwabatakombi Leza nkwaciindi ciniini buyo.
6Nikuba kuti kulisumpula kwakwe kukasike kujulu, ampuwo yakwe ikabe buti.
7Uyoolobelela mbubonya mbuli bufumba bwakwe,
aabo bakamwizi bayoobuzya kuti, ‘Uli kuli?’
8Uyoozibingana mbubonya mbuli ciloto akutajanwa limbi pe,
uyoomwaika mbuli cilengaano camasiku.
9Bantu bakali kumubona tabacikamuboni, takabonwi limbi pe.
10Bana bakwe bayooyandaula bacete,
bayoobapilusizya lubono oolo ndwaakabanyangide.
11Mubili wakwe ujisi nguzu zyabukubusi,
pele nguzu eezyo ziyooloba anguwe muvu.
12Nikuba kuti bubi bulalweela kulinguwe,
ulabusisa kunsi amulaka wakwe.
13Nikuba kuti katayandi kubumena,
ulabuvubata mukanwa lyakwe.
14Cakulya cakwe cilasasa mwida, cilaba buyoka bwanzoka mulinguwe.
15Ulamena buvubi akubuluka alimwi, Leza ulaboowa.
16Kufumbwa ncamena mbuyoka bwanzoka,
buli mbuli meno aacisasa aakonzya kumujaya.
17Takooyoolanga milonga, milonga eeyo iikunka buci amabisi.
18Takooyootangala mubuvubi mbwaajanide,
mpindu zyakusambala kwakwe tazikamuleteli kukondwa.
19Nkaambo wakadyaminina akubakaka bacete,
wakatola maanda ngaatakayaka.
20Busindya bwakwe tabukkuti,
takooyoosiya niciba cintu comwe kuli zeezyo nzyayanda.
21Wakali kunga alya ulida limwi,
ono sunu lubono lwakwe lwamana!
22Nasumpuka kwiindilila, mapenzi mapati alamusikila,
alamufwaankanya canguzu.
23Muleke alye cabutavu, nkaambo Leza uyoomuwisizya,
kumuwisizya bukali bwakwe mbuli mvula.
24Nati atije sumo lyalubulo ulayaswa amuvwi wamukuba.
25Muvwi uyoomubbwabula kumusana,
insonga yawo iyootululizya amululwe,
aawo uyoozyangama kuti lufu lwamusikila.
26Kufumbwa nzyaakajanide ziyoomumanina amulilo
uutafulidwi uyoomusyukuta, uyootenta zyoonse zili muŋanda yakwe.
27Julu liyooyubununa bubi bwakwe, nyika iyoomubukila.
28Lubono lwamuŋanda yakwe luyookungululwa
luyootolwa mubuzuba bwakunyema kwa Leza.
29Aaya ngemamanino Leza ngaakabambila muntu mubi,
nempindu yamuntu uutaluleme.”
Currently Selected:
Jobo 20: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
