Jobo 16
16
Jobo
1Eelyo Jobo wakavuwa wakati,
2“Ndakamvwa kale zintu zinji zili boobo.
Nyoonse muli balailili babi.
3Ncinzi camucisa kuti mwaambe boobo?
Sena majwi aabuyo alijisi masimpilo?
4Ambebo inga ndakonzya kwaamba mboonya mbuli ndinywe,
nikwali kuti naa muli mbondibede nindamwiingula,
kumukazya amajwi aali mbuli aanu nkepukusa mutwe.
5Pele nindamuyumya amajwi aangu,
akumutontozya myoyo mukukanana kwangu.
6“Kuti ndakanana kucisa takundileki pe,
kuti naa ndaumuna ino cilandigwasya nzi?
7Ncobeni lino Leza wandikatazya, boonse bamukwasyi wangu wabanyonyoona.
8Alimwi wandikotezya, citondezya kuti tacili aandime,
akwalo kukotela kwangu mbobumboni kulindime.
9Wandiyaula mukunyema kwakwe,
wandivwima akundivungila ntuku.
Basinkondoma balanditunamina.
10Bantu balandikwankwamwida malomo nobandiweela,
balanduuma asaya calweeno, balalibunganya antoomwe kuti bandilwane.
11Leza wandaaba kubantu bataluleme,
wandiwaala mumaanza aababi.
12Ndakaliliibide, pele wakandipwayaula,
wakandijatila munsingo akundipwasyula mutubeela-beela.
Ndaba mbuli mbaakani yakwe.
13Basimivwi bakwe bandizinguluka. Ulayasa nsa zyangu,
teengeleli, utila mululwe wangu ansi.
14Ciindi coonse ulandaatula, ulandivuumukila mbuli sinkondo.
15Ndasama masaka mukulila kwangu.
Ndakkala mutwe nkezundidwe, anguzu zyandimanina.
16Meso andisalala nkaambo kakulila, azyalo zikoye zyalema.
17Nikuba kuti nsilubizizye pe, akukomba kwangu kuliluleme.
18Ovu utavumbi bubi bwacitwa kulindime,
alimwi utaleki matongoosi aangu kuti aumune.
19Nikuba kuciindi cino langa kamboni wangu uli mujulu,
ooyo uundikwabilila uli atala.
20Nikuba kuti beenzuma balandiseka cakusabula,
pele mebo ndooongolola kuli Leza.
21Nikwali kunga umwi wandiiminina kuli Leza,
mbuli muntu uukombelezezya mweenzinyina.
22Nkaambo kwamana buyo myaka mice,
njootola nzila njenga nsikapiluki alimwi pe.
Currently Selected:
Jobo 16: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
