Babetesi 1
1
Baisilayeli mbubakazunda Bakenani
1Lino Josyuwa naakafwa, Baisilayeli bakabuzya Mwami Leza kuti, “Ino mbaani batisaangune kuyoolwana Bakenani?”
2Mwami Leza wakaingula kuti, “Bamusyobo wa Juda mbabatisaangune, nkaambo nyika ndiiaba kale kulimbabo.”
3Basololi ba Juda bakati kubasololi ba Simiyoni, “Atweende tukalwane antoomwe kunyika eeyo njitwakapegwa. Twamana nituyoolwanina cipaanzi canu.” Aboobo Basimiyoni bakainka ambabo.
4Basololi ba Juda nibakalwana Mwami Leza wakaaba Bakenani kubikkilizya a Bapelezi. Bantu mbibakazunda ku Bezeki bakali zyuulu zili kkumi. 5Nkukonya ooko bakajana Mwami Adonibizeki akumulwana. 6Wakati sole kutija, pele bakamutandaanya akuyoomujata. Bakamukosola zyala zyakumaboko azyakumaulu. 7Aawo Adonibizeki wakati, “Ndakakosola zyala zyabami bali makumi aali ciloba, aabo mbindakacita kuti kababwezelela bufwefwelenga buwa atebule lyangu. Lino Leza wandicita mbubonya.” Bantu bakwe Adonibizeki bakamuleta ku Jelusalemu, nkabela ooko mwakafwida.
8Lino Bajuda bakalwana munzi wa Jelusalemu. Bakanyonyoona bantu bawo akuumpa. 9Bazwe buyo bakainka kuyoolwana Bakenani bakali kukkala munyika yamalundu akumusanza, amumakkuti. 10Kuzwa aawo bakainka kuyoolwana Bakenani bakakkede mumunzi wa Hebuloni, kaindi wakali kutegwa Kiliyataaba. Ooko bakazunda baziinga zya Syesyayi, Ahimani, a Talimayi.
Otiniyeli wazunda munzi wa Debii
(Josyuwa 15.13-19)
11Nibakazwa aawo Bajuda bakainka kuyoolwana munzi wa Debii, kaindi wakali kutegwa Kiliyatisefa. 12Kalebi wakati, “Silutwe wampi iiyoozunda munzi wa Kiliyatisefa uzookwata mwanaangu Akisa.” 13Otiniyeli mwanaa Kenazi musyoonto wa Kalebi, nguwakazunda munzi ooyo, nkaako Kalebi wakamupa mwanaakwe Akisa.
14Nibakakwatana, Otiniyeli wakakombelezya mukaintu wakwe kuti akumbile muunda kuli wisi, mpoonya wakainka kuli Kalebi. Mbwaakaselukila buyo ambongolo, Kalebi wakamubuzya ncaakali kuyanda. 15Walo wakaingula kuti, “Ndalikuyanda tusensa kayi nyika njookandipa ncimpayuma.” Nkaako Kalebi wakamupa tusensa twamutala atwamukkuti.
16Lino Bakenani balunyungu lwa syaanyinazyala Mozesi bakainka a Bajuda kuzwa kumunzi watukunka kuya kunkanda kumusanza wa Aladi munyika ya Juda ooko nkobakaakukkala a Baameleki. 17Bajuda antoomwe a Basimiyoni babunyina bakainka antoomwe, nkabela bakazunda Bakenani bakali kukkala mu Zefati, akubanyonyweeda limwi. Nkaako munzi ooyo bakuuulika kuti Holoma. 18Pele Bajuda tiibakatola munzi wa Gaza acisi cawo, munzi wa Asikeloni acisi cawo, amunzi wa Ekiloni acisi cawo. 19Nikuba boobo Mwami Leza wakali aa Bajuda, nkaako bakakonzya kutola nyika yamalundu. Mukuti bakajisi nkalaki zyalubulo, bakakacilwa kutanda bantu bakali kukkala mucibanda.
20Lino Kalebi wakapegwa Hebuloni mbubonya mbuli Mozesi mbwaakalaililide, alimwi wakatanda ziinga zyotatwe zya Baanaki. 21Pele Babenjamini taakwe nibakatanda Bajebusi bakali kukkala mu Jelusalemu. Ncenciceeco Bajebusi ncobacikkede antoomwe a Babenjamini asunu.
22Bamisyobo ya Josefa bakainka kuyoolwana munzi wa Beteli, Mwami Leza wakali aambabo. 23Bakatuma bantu kuti bakatwele munzi wa Beteli, kaindi wakali kutegwa Luzi. 24Basikutwela aabo bakabona muntu wakali kuzwa mumunzi, mpoonya bakati kulinguwe, “Twaambile mbotunga twanjila mumunzi ooyu, kutegwa yebo tukubede aankumbu.” 25Muntu ooyo wakabatondezya mbobanga banjila munzi. Mbombuboobu mbubakanyonyoona munzi ooyo. Kwaamba zyamuntu uulya bakamuleka amukwasyi wakwe. 26Lino muntu ooyo wakaya kunyika ya Bahiti akuyooyaka munzi mupati, ngwakaita kuti Luzi, mbuuciitwa abwasunu.
27Musyobo wa Manase tuuwakatanda banyinzi bamuminzi ya Batesyiyani, Taanaki, Doo, Ibuleyamu, a Megido atunzi twawo alimwi aminzi yakazingulukide. Aboobo Bakenani bakacilikkede ooko, tiibakabatanda pe. 28Baisilayeli nibakabaanguzu bakabelesya Bakenani cabuzike.
29Musyobo wa Efulemu tuuwakatanda Bakenani bamu Geza, aboobo bakalikkede ambabo. 30Awalo musyobo wa Zebuluni tuuwakatanda banyinzi bamuminzi ya Kitiloni a Nahalaii. Aboobo Bakenani bakacilikkede ambabo, bakababelesya cabuzike.
31Musyobo wa Asya tuuwakatanda banyinzi bamuminzi ya Ako, Sidoni, Ahalabu, Akizibu, Heliba, Afeki amu Lehobu. 32Aboobo Baasya bakacilikkede a Bakenani, nkaambo tiibakabatanda. 33Awalo musyobo wa Nafutali tuuwakatanda banyinzi bamuminzi ya Betesyemesyi a Betanati. Aboobo Bakenani bakacilikkede ambabo, bakababelesya cabuzike.
34Lino Baamoli bakasinkilizya Badani munyika yamalundu. Tiibakabaleka kuti baselemukile muzibanda. 35Baamoli bakakkede mu Hahelesi, Aijailoni, amu Syaalibimu. Pele bamisyobo ya Josefa nibakabaanguzu, bakabelesya Baamoli cabuzike.
36Munyinza wa Baamoli wakali kutalikila kumumpata wa Akilabimu kusikila kunyika ya Sela.
Currently Selected:
Babetesi 1: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
