Babetesi 14
14
Makani aa Samusoni amusimbi waku Timuna
1Lino Samusoni wakainka ku Timuna, ooko wakabona umwi wabasimbi ba Bafilisiti. 2Eelyo wakapiluka kumunzi, akuzooambila wisi abanyina kuti, “Ndakabona musimbi umwi Mufilisiti ku Timuna, lino amundigwasye mbwenga ndamukwata.”
3Pele wisi abanyina bakati kulinguwe, “Ino ncoinkila ku Bafilisiti batasyomi Mwami Leza ncinzi? Nkokuti uti kunyina musimbi akati kaciinga cesu nuuba musyobo wesu? Pele Samusoni wakaambila wisi kuti, ‘Mebo ndati undikwatile yooyo musimbi nkaambo wandibotela.’”
4Wisi abanyina taakwe nibakazi kuti makani aaya akazwa ku Mwami Leza nkaambo wakali kuyanda kubusya nkondo a Bafilisiti, kayi ciindi eeco Bafilisiti mbibakali kulela Baisilayeli.
5Lino Samusoni wakainka ku Timuna a wisi abanyina, nkabela bakainda mumyuunda yansaansa, bakamvwa syuumbwa kavuluma. 6Aawo muuya wa Mwami Leza wakasikila Samusoni, mpawo wakainka waakukwamuna syuumbwa ooyo amaanza buyo, mbuuli kuti nkapongo. Amane waboola, pele taakwe naakabaambila bazyalibakwe ncaakacita pe.
7Lino Samusoni wakainka kuyooambaula amusimbi, nkabela walo wakabotelwa kapati. 8Akkale-kkale wakapiluka kuti akamulete. Akasike aalya wakaleya kuti akabone munyama wakwe uulya. Mumunyama ooyo wakajana nzuki zibikkide buci. 9Wakalida, amane weenda, kaya bweenda wakali kuyabulya buci. Naakasika bazyali bakwe wakabapa bumwi buci, balya. Pele taakwe naakabaambila kuti buci wabulida mumunyama pe.
10Lino wisi wakainka kwabo musimbi, eelyo ooko Samusoni wakaakucita pobwe lyabwiinga, nkaambo mbombuboobu balombe mbubakali kucita. 11Bantu nibakamubona, bakamweetela beenzinyina bali makumi otatwe basikumumanya bukata. 12Eelyo Samusoni wakati kulimbabo, “Nkoo ndimulabike, tubone naa mulakajaya. Kuti mukajaye mumazuba aaya aapobwe ndilamupa masani aali makumi otatwe azisani zili makumi otatwe zyandeketela. 13Pele kuti naa mukacilwe kukajaya, nywebo mulandipa masani aali makumi otatwe, azisani zili makumi otatwe zyandeketela.” Bakati, “Kakeza!”
14Wakati,
“Muli sikulya, mwakazwa cakulya,
Muli singuzu, mwakazwa cilweela.”
Kwamazuba otatwe, tiibakakajaya.
15Lino mubuzuba bwane bakaambila muka Samusoni kuti, “Mukombelezye mulumi wako kuti atulabulwide kalabi. Kuti naa utaciti oobo, tulakutenta yebo aluzubo lwauso. Sena mwatutambila kuzootubbida?”
16Mpoonya muka Samusoni wakaya kumulumaakwe kalila, wakati, “Tondiyandi pe, wakalabika basicisima, pele tonakalabulula kulindime. Wakati kulinguwe, Toli nduwe buyo, nsinakalabulula kuli taata nibaba baama, ino ono yebo nkulabulwile buti?” 17Nkaako wakali kumulilila kwamazuba aali ciloba pobwe kalitanamana, lino mubuzuba bwaciloba wakamulabulwida nkaambo wakamukatazya. Mpoonya wakabaambila basicisinyina ncaakali kwaamba. 18Kalitanabbila mubuzuba bwaciloba baalumi bamumunzi ooyo bakati kuli Samusoni,
“Ani ncinzi cilweela kwiinda buci?
Ani ncinzi cilaanguzu kwiinda syuumbwa?”
Aawo Samusoni wakabaambila kuti,
“Nimwatalimya mpwizi yangu,
nimwatakalabulula pe.”
19Mpoonya aawo muuya wa Mwami Leza wakamusikila canguzu, mpawo wakaselela akuya kumunzi wa Asikeloni akuyoojaya baalumi bali makumi otatwe bamunzi ooyo, wakabasaala, wapa masani aabo kuli baabo bakapandulula kalabi kakwe. Kumane wakapilukila kwabo kanyemede kapati. 20Eelyo muka Samusoni wakakwatwa kumbi, wakakwatwa kumweenzinyina Samusoni ooyo wakamwiminide kulukwato.
Currently Selected:
Babetesi 14: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
