Izaya 57

Baisilayeli mbubakakalalilwa akaambo kamituni

1Bantu baluleme balanyonyooka, pele taakwe muntu uuzwa moyo pe. Bantu babotu balatolwa, pele taakwe muntu uumvwisya kuti baluleme balatolwa kuti baleke kubona bubi. 2Aabo beenda cakululama balajana luumuno, balalyookezya ciindi nobafwa. 3Pele nywebo nobantu amuboole kuno, nywebo nobana bamukaintu mulozi, nywebo nolunyungu lwabasimamambe abaamu! 4Ino nguni ngomusabwida? Nguni nywebo nobacengi ngomulapawida milaka? Sena tamuli balunyungu lwabazangi, lunyungu lwababeji? 5Myoyo yanu ilapya mukuyanda kucita zisusi munsi aamibanga amunsi aamasamu oonse aavwevwede. Mulapaizya bana banu munsi aatulonga amunsi aamajeleele. 6Mituni yanu iili akati katusindabwe twamutulonga, ncecanu. Iiyi, ncecaabilo canu, kayi mwakaitulila zyazyakunywa akupa zituulo zyamaila. Sena muyeeya kuti zintu zyamusyobo ooyu inga zyaleka kundinyemya? 7Mwakaakuyala atala aatulundu tulamfu mpomucitila bumambe, nkonkuko nkomupaizizya. 8Kusule aazitendele, aazikunguzyo zyanu mwakabikka zikozyanyo zyabakunze. Aawo mulandisiya, mulayala, mulatanta amalo aabaabo mbomuyanda akusamununa. Mwakapangana cizuminano abaabo mbomuyandana, mwakababonena zinswe zyabo. 9Mwakainka kuli Moleki mutuni kamujisi amafuta aaoliva, akuvuzya tufuta twanu tununkilila, mwakatuma batumwa banu kulaale, mwakaselemukila kwacivumwe. 10Mwakakatazigwa anzila zyanu nobeni, pele tiimwali kukonzya kwaamba kuti, “Munyina zibotu pe.” Mwakali kuzumanana, tiimwakalengaana. 11Ino baleza aaba mbomuyoowa mbaani cakuti mundaambile zyakubeja akundilubila limwi? Sena mwakaleka kundilemeka akaambo kakuti ndaluumwide kwaciindi cilamfu? 12Sena muyeeya kuti nzyomucita zililuleme? Pele lino ndayubununa bumpelenge bwanu, mituni yanu tiikamugwasyi pe. 13Mwaakulilauka kuyanda lugwasyo, dwi lyamituni yanu lizoomuvune! Luuwo luzooikukula yoonse, luuwo lutakwe ankoluya luyooipepulula. Pele muntu ooyo uuyubila mulindime, uyookona nyika uyookkala akundikomba acilundu cisalala.

Leza mbwasyomezya kugwasya bantu bakwe

14Mboobu mbwaamba Mwami Leza ulati, “Amubambe! Amubambe mugwagwa amubambile bantu bangu nzila kuti baboole kulindime! Amugwisye zifumpu munzila yabo!” 15Mboobu mbwaamba Uusumpukide uuli mujulu, ooyo Uuliwo lyoonse, uuli aazina Lisalala ulati, “Ndikkala mujulu mubusena busalala, pele alimwi ndakkala ayooyo mubombe moyo ayooyo uulitesya, kuti ndibukulusye moyo wayooyo uulitesya, ndibukulusye moyo wayooyo mubombe. 16Nkaako nsikaboombolozyi limbi, nsikabanyemeni limbi kwalyoonse, nkaambo bantu inga baba nobafwa bantu mbabonya mbindakalenga. 17Ndakalala, akaambo kazinyonyoono abulyato bwabo, ndakabasubula, akubafutatila mubukali bwangu, nikuba boobo bakacili zumanene munzila zyabo zibi. 18Ndizibwene nzila zyabo pele ndabaponya, ndabasolweda akubaumbulizya. 19Aabo balila mu Isilayeli njoobaumbulizya. Boonse njobaletela luumuno nobaba baabo bali kule abaafwiifwi njoobaponya,” mbwaamba Mwami Leza. 20Pele babi bali mbuli lwizi luyuuntana, lutakonzyi kubatama, lujisi mayuwe aayumba ntimba amatope. 21“Taakwe luumuno, kubantu babi,” mbwaamba Leza.

Currently Selected:

Izaya 57: Tonga96

Highlight

Copy