Izaya 48
48
Leza ngo Mwami akumazuba aaboola
1Amuswiilile makani aaya nywebo nolunyungu lwa Jakobo,
nywebo nomwiitwa zina lya Isilayeli, nobaciinga ca Juda,
nywebo nomubelesya zina lya Mwami Leza mukukonkezya kwanu
nomulibanda muzina lya Leza wa Isilayeli,
pele kutali mubwini nimuba mubululami.
2Nywebo muliita kuti muli bantu bakkala mumunzi uusalala,
musyomede buyo muli Leza wa Isilayeli uuli ngo Mwami Leza Singuzuzyoonse.
3Ndakalungulula zyazintu zyakali kuzoocitika kale-kale,
ndime ndakazyaambilizya amulomo wangu,
ndime ndakaziyubununa,
mpoonya ndakazicita ncobeni zilizuzikizidwe.
4Nkaambo ndakalizi kuti muli basicinguni,
muli bankwaambila bbwe, bayumu mitwe.
5Nkaako ndakamwaambila kale-kale,
ndakazyaambilizya kulindinywe kazitanacitika,
kutegwa mutaambi kuti,
“Mituni yangu njiyakacicita,
cikozyanyo cacisamu aleza walubulo nzizyakapa kuti zicitike.”
6Lino mwalibonena zintu eezyo nzimwakamvwa kuti ziyoocitika,
sena tamuzumini? Kuzwa ono ndamwaambila zintu zipya,
zintu zisisidwe nzyomutazi.
7Zintu zipya eezi ndazibamba ono kutali kaindi pe.
Nzetimwaambile sunu tamunazimvwide. Kuti mutati, “Iiyi, ndizizi kale.”
8Tamunamvwide nokuba kuswiilila, kuzwa lili,
eelyo matwi aanu taamvwi.
Ndizi kabotu-kabotu mbuli mbomuli basiluuni,
mwiitwa kuti bazangi kuzwa kukuzyalwa kwanu.
9Akaambo kazina lyangu, ndamuka kunyema,
mukuti bantu batembaule zina lyangu
ndalijata kutegwa intamunyonyooni.
10Amubone ndamusalazya nokutali mbuli nsiliva,
ndamusunka mubbibi lyamulilo wamapenzi.
11Akaambo kabulemu bwangu,
bulemu bwangu bulikke ncindacitila ceeci.
Ino inga ndalilekelela buti nkesampaulwa?
Nsiyandi kupa bulemu bwangu kuli uumbi.
Sailasi ngomusololi Mwami Leza ngwaakasala
12Amundiswiilile nywebo nolunyungu lwa Jakobo,
nywebo no Baisilayeli,
mbindakaita! Ndime Uuliwo,
ndime matalikilo alimwi ndime mamanino.
13Janza lyangu ndilyakasimpa ntalisyo yanyika,
janza lyangu lyalulyo ndilyakalandabula julu.
Ndaziita zyoonse zilaima antoomwe.
14Amubungane, muswiilile nyoonse!
Nguuli mutuni wakalungulula zintu eezi kazitanacitika?
Mulongwe wa Mwami Leza uyoolwana munzi wa Babuloni
kweendelana amakanze aa Leza, uyoolwana Bababuloni.
15Mebo lwangu ndemwini ndime ndaamba, iiyi ndime ndakamwiita.
Ndiyoomuleta nkabela uzoozwidilila muliceeco ncazoocita.
16Amuswene aafwiifwi andime kutegwa mumvwe nzendaamba.
Kuzwida kumatalikilo ndali kumulungulwida antangalala,
alimwi ciindi nozicitika ambebo inga mpeli aawo.
(Lino Mwami Leza wandituma a Muuya wakwe.)
Mwami Leza mbwayanda kucitila bantu bakwe
17Lino mboobu mbwaamba Mwami Leza,
Munununi wanu, Uusalala wa Isilayeli ulati,
“Ndime Mwami Leza wanu ooyo uumwiiisya zintu zibotu zimugwasya,
uumulailila nzila njomweelede kweendela.
18“Nikwali bantu baswiilila malailile aangu,
luumuno lwanu noluli mbuli mulonga uukunka,
lyoonse nemucitila ziluleme mbuli bukapaika mayuwe aalwizi.
19Lunyungu lwanu noluli mbuli musenga,
bana nobatabaliki mbuli lubwe-lubwe lwawo,
mazina aanu naataakumana,
nokuba kuzimaana kumbele lyangu.”
20Amuzwe mumunzi wa Babuloni,
amubasiye Bababuloni!
Amwaambilizye eeci cakukondwa,
mwaambilizye makani aaya.
Amwaazibye mane kusikila kumagolelo aanyika,
amwaambe kuti, “Mwami Leza wanununa Jakobo mubelesi wakwe.”
21Bantu bakwe tiibakafwa nyota ciindi naakabainzya munkanda,
wakabatuntumusizya maanzi kuzwa mumwaala.
Wakaandula mwaala, nkabela maanzi akapoomoka.
22“Pele sizinyonyoono takooyookkala muluumuno,”
mbwaamba Mwami Leza.
Currently Selected:
Izaya 48: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
