Izaya 26

Leza uyoozundya bantu bakwe

1Mubuzuba oobo bantu bayooimba lwiimbo oolu munyika ya Juda,

bayooti, “Tulijisi munzi muyumu,

Leza mwini nguukwabilila bwaanda bwawo azitantaala.”

2Kojalula milyango yamunzi kuti musyobo uululeme unjile,

musyobo ooyo uusyomeka.

3Yebo O Mwami Leza,

kapa luumuno lwini kuli baabo baimvwi mulinduwe,

kuli baabo bakusyoma.

4Amusyome mu Mwami Leza kwalyoonse alyoonse,

nkaambo Mwami Leza, Mwami Leza mmwaala uutamani.

5Ulababombya aabo balinonomona,

ulatola ansi munzi uulisumpula,

uluubambasika ansi, akuusowela mulusuko.

6Uyoolyataukwa, amaulu aabadyaminidwe, antaamo zyabacete.

7Nzila yamululami ilibambasede, yebo ooluleme,

nduwe oocita kuti nzila yeendela mululami kiili kabotu.

8Iiyi, O Mwami Leza, tweendele munzila yamilawo yako,

tulangila nduwe, ncotuyandide mumyoyo yesu ndizina lyako ampuwo yako.

9Ciindi camasiku moyo wangu uyeeya nduwe,

cifumo-fumo moyo wangu usukamina nduwe.

Mbeta zyako noziboneka ansi, bantu bamunyika baiya ziluleme.

10Nokuba kuti mubi wamubeda aaluse, taiyi ziluleme,

nomuba munyika yabaluleme walo ucita zibi, talemeki Mwami Leza pe.

11O Mwami Leza janza lyako lilisumpukide, pele tabaliboni pe.

Batondezye luyando lwako kuti bausigwe nsoni,

mulilo ooyo uubambilidwe basinkondonyoko ubasyukute.

12O Mwami Leza kotupa luumuno,

nkaambo nduwe wacita kuti tuzwidilile mumilimo yesu yoonse njotucita.

13O Mwami Leza, Leza wesu,

kwakali basimalelo bamwi kunze lyanduwe bakali kutweendelezya,

pele swebo tulemeka buyo zina lyako olikke.

14Lino balifwide, tabaciponi,

bantu aabo bafwide tabakakonzyi kubuka pe.

Wakabasubula akubanyonyoona,

wakacita kuti kabataciyeeyegwi pe.

15Wavuzya musyobo wesu,

O Mwami Leza, wavuzya musyobo wesu.

Akaambo kaceeci waliletela bulemu,

wakwakwabula minyinza yanyika yesu.

16O Mwami Leza bakaboola kulinduwe mumapenzi aabo,

nookabasansaula tiibacili kukonzya akupetekezya mukukomba pe.

17Mbubonya mbuli mukaintu uuminsi nayanda kutumbuka,

ulaminingana akulila namyongwa,

aswebo mbubonya mbutwakabede kumbele lyako O Mwami Leza.

18Twakali mbuli uuminsi, twakali kuminingana mukucisa,

pele twakazyala luuwo, tiitwakaleta lufutuko ansi, tiitwakazyala bantu pe.

19Pele bafu bayoopona mibili yabo iyoobuka.

Nywebo nomuli mubulongo amunyamuke musekelele.

Mume wanu uli mbuli mume wacifumo-fumo. Nyika iyoobusya bafu bayo.

20Kamuya nobantu bangu, amunjile mumaanda aanu, mulijalile mukati, amuyube kwakaindi kaniini, mane kusikila bukali bwakwe bumane. 21Amubone Mwami Leza ulaza kuzwa mubusena bwakwe, kuti asubule bantu bamunyika akaambo kazinyonyoono zyabo. Nyika iyootondezya bulowa oobo bwakatika mulinjiyo, tiikasisi limbi bantu bayo bakajaigwa.

Currently Selected:

Izaya 26: Tonga96

Highlight

Copy