Izaya 19

Leza uyoosubula cisi ca Ijipiti

1Ngaaya makani aaamba zyacisi ca Ijipiti. Bona Mwami Leza nguulya ulaboola ku Ijipiti utantide akkumbi lyeenda cakufwambaana. Mituni ya Baijipiti ilazyangama kumbele lyakwe abalo Baijipiti lyabaleka kapati. 2Njoocita kuti, “Muijipiti akabukile Muijipitinyina. Munyina akabukile mwanookwabo, simunzi asimunzinyina, munzi amunzinyina, bwami abwaminyina. 3Baijipiti bayootyompwa, ndiyoocita makanze aabo kuti akabe aabuyo, bayoobuzya mituni mizimo yabo, basondi, abamukabami. 4Njooaba Baijipiti kumuntu silunya, mwami mukali nguuyoobalela, mbwaamba Mwami Leza Singuzuzyoonse.” 5Milonga iiyooyuminina, musena uyooyuma akuyumina limwi. 6Tunkolola tuyoonunka, milonga yamu Ijipiti iyooyuminina, mabu amanyanja ayoopusama, 7atusyango toonse tuli munsi aamulonga wa Nailo ooko nkuutilila. Myuunda yoonse iisyangidwe mumbali aamulonga wa Nailo iiyooyuma. Iyookukulwa aguwo, cakumaninina. 8Bazubi banswi bayoosyolooka akulilauka, boonse baloba mumulonga wa Nailo, bateya tunyandi banoocinyina mulimo. 9Aabo babelesya butonje bayootyompwa, baluka masani aandeketela bayoobula lulangilo. 10Aabo baluka zisani bayoobijilwa, aabo babelekela mali bayoopenga mumyoyo. 11Bapati bamunzi wa Zowani mbafuba-fuba, balailili basongo ba Falo bamwaambila zitabujuli. Ino Falo inga wamwaambila buti kuti, “Ndime umwi wabaalumi basongo, ndakaiisigwa abamami bakale-kale?” 12Ino ono Falo bali kuli bantu bako basongo? Abakwaambile, bakuzibye eeco Mwami Leza Singuzuzyoonse ncakanzide kucita kucisi ca Ijipiti. 13Bapati bamunzi wa Zowani mbafuba-fuba, basololi bamunzi wa Memfisi bacengwa, basilutwe bawo basowa cisi ca Ijipiti. 14Mwami Leza wabalekela kuti kabaungilika, bacita cisi ca Ijipiti kuti kacilubizya, mbuli mukolwi mbwaziilika amalusi aakwe. 15Taakwe naba omwe mu Ijipiti, muvubi naa mucete uulemenede naba muntu buyo uukonzya kugwasya cisi ca Ijipiti.

Baijipiti bayookomba Mwami Leza

16Mubuzuba oobo Baijipiti bayooba mbuli bakaintu bayookankama mukuyoowa janza lya Mwami Leza Singuzuzyoonse eelyo libavuumukilide. 17Nyika ya Juda inooyoosya Baijipiti, kufumbwa uuyoomvwa zyacisi ca Juda uyooyoowa, akaambo kazeezyo Mwami Leza Singuzuzyoonse nzyakanzide kubacita.

18Mubuzuba oobo baminzi yosanwe yamu Ijipiti bayoocaamba Cihibulu, bayookonkezya muzina lya Mwami Leza Singuzuzyoonse. Umwi waminzi eeyo uyooitwa kuti, “Munzi wa Zuba.”

19Mubuzuba oobo kuyooba cipaililo ca Mwami Leza mukati kacisi ca Ijipiti, kuyoobikkwa kabwe kaciibalusyo ca Mwami Leza kumunyinza waco. 20Kayooba citondezyo cakuzibya kuti Mwami Leza Singuzuzyoonse mwali mucisi ca Ijipiti. Baakulilila Mwami Leza akaambo kabaabo babadyaminina uyoobatumina mufutuli, muvuni, nkabela uyoobafutula. 21Mwami Leza uyoolizibya lwakwe mwini ku Baijipiti, nkabela abalo mubuzuba oobo bayoomuziba Mwami Leza. Bayoomukomba mukumupa zipaizyo azituuzyo zyamaila, bayookonkezya ku Mwami Leza akuyoocita mbuli mbubakonkezya. 22Mwami Leza uyoosubula Baijipiti acuumo, uyoobauma amana uyoobaponya. Bayoopilukila ku Mwami Leza, nkabela uyooswiilila kukomba kwabo, eelyo uyoobaponya.

23Mubuzuba oobo kuyooba mugwagwa mupati uuzwida ku Ijipiti kuyoosika ku Asiliya. Baasiliya banooyooboola ku Ijipiti abalo Baijipiti banooyooinka ku Asiliya. Baijipiti bayookomba antoomwe a Baasiliya.

24Mubuzuba oobo Baisilayeli bayookomba kabali zisi zyotatwe a Baijipiti a Baasiliya, lino eeci ciyooba cileleko kunyika yoonse. 25Mwami Leza Singuzuzyoonse uyoobaleleka, uyooti, “Bantu bangu Baijipiti, Baasiliya mbindakalenga, a Baisilayeli lukono balelekwe.”

Currently Selected:

Izaya 19: Tonga96

Highlight

Copy