Izaya 17

Leza uyoosubula Baasiliya a Baisilayeli

1Ngaaya makani aamba zyamunzi wa Damasikasi. “Bona munzi wa Damasikasi, tuuciyoobi munzi alimwi, pele uyooba cilwi buyo. 2Minzi yaku Alowe iyoosyaala kakunyina uulimo iyooba ngamacelelo aamatanga, nkwayoobutila, taakwe uyooayamina pe. 3Minzi iikwabilidwe iyoozimaana mu Efulemu, babulelo bwaku Damasikasi basyeede baciinga ca Baalamu, bayooba abulemu mbuli bwa Baisilayeli.” Mbwaamba Mwami Leza Singuzuzyoonse. 4“Mubuzuba oobo bulemu bwa Jakobo buyoobbuluka. Kuneneya kwakwe kuyoomana. 5Buyooba mbuli buzuba mutebuzi naya kuyobolola maila aaimvwi, akwaatebula. Buyooba mbuli buzuba muntu navulula mukkuti lya Lefaimu. 6Nikuba boobo maila amwi ayoosyaala, mbuli litikinyizigwa muoliva, kulasyaala obilo otatwe ampela. One naa osanwe mumutabi iizyede kapati.” Mbwaamba Mwami Leza, Leza wa Isilayeli. 7Mubuzuba oobo bantu bayoolangila ku Mulengi wabo, bayoolangilila kuli Uusalala wa Isilayeli. 8Tabakooyoolangilila kuzipaililo eezyo nzibakalipangila pe, mituni yaleza mukaintu Asyela iyooba yabuyo. Zipaililo zyabo zyatununkilizyo eezyo nzibakayaka, ziyooba zyabuyo. 9Mubuzuba oobo minzi yabo yankwakwa, eeyo njibakatijide Baisilayeli, iyooba mbuli masena oomo mumenede lumpote abuvuna-vuna. Yoonse iyoosyaala buyo kakunyina uulimo. 10Nobaisilayeli, mwamuluba Leza wakamuvuna a kumukwabilila mbuli mwaala muyumu. Musyanga myuunda ya malende kuti kamukombela mumo baleza bambi. 11Pele nikuba isyuuke akulangazya mubuzuba mbubonya oobo mbumwaisyanga taakwe ncomwali kunootebula pe. Nimwali kujisi mapenzi amalwazi aatasilikiki.

Yazundwa misyobo yabasinkondonyina

12Bona bukali bwamisyobo minji, mbakali mbuli lwizi luukapaika! Bona kunyongana kwabantu, balavuuma mbuli buvuuma maanzi manji. 13Nikuba kuti bantu kabayoba mbuli maanzi aavuuma, kuti wabanyemena balatijila kulaale. Balabbubbulwa aluuwo mbuli bungu mutulundu, mbuli masanga libbubbula guwo. 14Lyaba kumangolezya balayoowa! Bwayanda kuca, batija. Mbociyooba akuli baabo batusaala, mbociyooba kuli baabo batunyanga lubono.

Currently Selected:

Izaya 17: Tonga96

Highlight

Copy