Izaya 16

Mapenzi aabaku Mowabu

1Amutumizye tubelele ube ngomutelo kumuleli wacisi, kuzwa ku Sela kukosola nkanda, mukasike kucilundu ca mwana musimbi wa Ziyoni. 2Mbuli bayuni bauluka-uluka bakongwa muziteente zyabo, mbobabede bakaintu baku Mowabu kuzito zyamulonga wa Amoni. 3Amutulailile mutwaambile ncotweelede kucita. Amutulailile, mutukoswede makani cabululami mube mbuli cimvule citontozya ciindi zuba nolitwa mwaaba. Amubasise batijide, mutaabi baabo batija lutuzi. 4Bamowabu batijide bakkale anduwe bakwabilile kuzwa kuli yooyo uuyanda kubanyonyoona. Sikudyaminina awalo buyoomweelela, kucinyina uuciyoonyonyooka, mulwani uyoozimaana munyika. 5Lino kwiindila muluyando cuuno cabwami ciyookkazikizigwa, mukusyomeka umwi mwaalumi uyookkala alincico, mwaalumi uuli ngwalunyungu lwa Devedi. Uuyoobeteka mubululami, uyoocita kuti baluleme kabacitilwa bweelede. 6Twakamvwa zyakulisumpula kwabantu baku Mowabu, balalisumpula akulikankaizya, kulisumpula akasampu-sampu kabo ziyooinda, nzyabuyo. 7Nkaako Bamowabu balalila, boonse balila Mowabu. Amweeme mulyeetezye akaambo kabulotwe bwaku Kiihaleseti. 8Myuunda yaku Hesyiboni yapusama, ayalo misaansa yaku sibuma mbubonya. Baleli bazisi zimwi balyatauka misaansa yesu mibotu, eeyo cimwi ciindi yakali kusika ku Jaza, mane njeeyo yaakuyandilila munkanda. Zisyuukila zyayo zyakayandalala mane nzeezyo zyaakusika kulwizi. 9Nkaako ndalila mbuli bulila baku Jaza akaambo kamisaansa yaku Sibuma. Akaka Hesyiboni a Eleyale, ndamutesya misozi! Kutangala kwamicelo yako yabizwa akutebula kwako zyoonse zyamana. 10Myuunda yamicelo tiicikutangazyi nikuba kukondwa, taacikwe muntu uucisina waini kumalindi, kayi ndakulesya koompoozya. 11Ndaguluma mumoyo wangu mbuli kalumbu akaambo ka Mowabu, nduuside akaambo ka Kiihelesi. 12Bamowabu baakusika kumalende aabo, bayoolikatazya buyo, baakusika kumalende kuti bapaile, taakwe aciyoobagwasya.

13Aaya ngamajwi Mwami Leza ngaakaamba aaamba zya Mowabu. 14Pele lino Mwami Leza ulati, “Mumyaka yotatwe, bulemu bwacisi ca Mowabu banji buyoosampuka. Nikuba kuti bakali banji batikasyaale kabali baumi banooli bace alimwi banoogonkedwe.”

Currently Selected:

Izaya 16: Tonga96

Highlight

Copy