Hosiya 7

1“Ndayanda kuti ndipilusye bantu bangu mububotu, ndayanda kuti ndiponye Baisilayeli, bubi bwabo bulalibonya antangalala. Milimo mibi ya bantu baku Samaliya tiisisiki pe. Tabasyomeki, balaunina. Bapwaya maanda mbuli babbi, bakwempa zintu zyabantu antangalala. 2Tabayeeyi kuti nsilubi milimo yabo mibi. Zinyonyoono zyabo zilibazingulukide, ndilizibwene lyoonse.”

Buzangi muŋanda yamwami

3Leza wakaamba kuti, “Bantu bacenga mwami abukkale bwabo bubi, abasololi bakwe balaunina abubeji bwabo. 4Boonse tabasyomeki, bukali bwabo buli mbuli mulilo uunyemfuma muoveni ngwatasoseli uujika kusikila akande mulwi wacinkwa mane wafufuma. 5Buzuba bwakusekelela bwamwami, basololi bakwe balakolwa, awalo mwami wiide kunjila munkamu yabaabo bamupanganina. 6Myoyo yabo ilapya mbuli oveni mbubonya amizeezo yabo mboibede. Masiku oonse bukali bwabo bulanyemfuma, lino kubucedo bulavutuka mbuli mulilo uuyakisya. 7Aboobo mubukali bwabo bapati balajaya basololi babo. Bami babo balawa omwe-omwe, pele kunyina naba omwe uundiita.”

Isilayeli a bamasi

8Mwami Leza wakaamba kuti, “Bantu ba Efulemu bali mbuli cinkwa cafuta nkaambo balisanganya abamasi. 9Bamasi babamanina nguzu, pele balo tabazi. Batuba mvwi buu, pele taakwe ancobazi pe. 10Kulisampula kwa Baisilayeli kulabazula. Pele nikuba boobo tabapilukili ku Mwami Leza wabo, tabamuyandauli aasyoonto pe. 11Baisilayeli bali mbuli cikwilimba cifuba-fuba. Balaita Baijipiti, alimwi balakumbila alugwasyo kuzwa ku Asiliya. 12Bali kuunka ndili kubateya kanyandi. Njoobausizya ansi mbuli bayuni. Njoobasubula akaambo kakubisya kwabo.

13“Maawe kulimbabo nkaambo bandisiya. Banyonyooke nkaambo bandizangila. Ndiyanda kubavuna, pele baamba zyandime, balabeja. 14Bandililila cakubeja, balila cakulijaya amalo aabo. Balalikankata mbuli bamasi akaambo kakuyanda kulya, pele balandizangila mebo. 15Nikuba kuti ndakabalela akubayumya-yumya, balandipanganina. 16Basandukila kuli bambi, kutali kuli Leza Sijulu wamajulu. Bali mbuli buta butaluzi. Basololi babo bayoojaigwa nkaambo balandisampaula. Nkaako baku Ijipiti bayoobaseka.”

Currently Selected:

Hosiya 7: Tonga96

Highlight

Copy

Compare