Hosiya 6

Bantu baamba zyakuyanda kupilukila

1Amuboole tubweede ku Mwami Leza. “Watukwamauna pele uyootuponya. Watucubbaula, pele uyooanga zicisa zyesu. 2Kwakaindi kasyoonto ulatusinsimuna, kwainda buyo mazuba obilo naa otatwe ulatubusya kuti tukabe aabuumi kumbele lyakwe. 3‘Atuyume-yume kuti tumuzibe Leza.’ Uyoosika ncobeni kulindiswe mbuli bucedo. Kuboola kwakwe kuyooba cileleko mbuli mvula ntuluka iitesya nyika.”

4Lino Leza wakaamba kuti, “Nywebo no Baefulemu ani mmucite buti? Nywebo nobantu ba Juda ani mmucite buti? Luyando lwanu kulindime lulazimaana mbuli sikunku, lulafwambaana kumana mbuli mume lizwa zuba. 5Aboobo ndamupandaula mbuli nkuni kwiindilila muncenjezyo zyabasinsimi. Ndamujaya amajwi aangu. Kubeteka kwangu kwaboneka antangalala mbuli bulaba mvula. 6Ncobeni ncenjandisya nduyando lwini-lwini, kutali zipaizyo buyo pe. Njanda kuti bantu bandizibe mebo nde Leza mubusena bwakwiide kupa zipaizyo zyakutenta.

7“Pele bantu aaba bakatyola cizuminano cangu mbuli Adamu. Nibakacita boobo, bakacita zyakutasyomeka. 8Giliyadi mmunzi wabasizibi, baide kujayana-jayana. 9Mbuli bafumpi mbobayubilila abalo bapaizi mbobabungana kuti kabajaya bantu munzila iiya ku Syekemu. Masimpe, bacita zyabugandanga. 10Akati kabantu ba Isilayeli ndabona zisesemya. Baefulemu bacita bwaamu, Baisilayeli balisofwaazya mukukomba mituni. 11Anywebo no Bajuda, muyootebula cisubulo.

Currently Selected:

Hosiya 6: Tonga96

Highlight

Copy

Compare