Bahibulu 1
1
Leza ulaamba kwiindila mu Mwanaakwe
1Ciindi cakale-kale Leza wakali kwaamba kuli basikale besu ziindi zinji-zinji munzila zyaandene-andene kwiindila mubasinsimi, 2pele mumazuba aano aamamanino ulaamba kulindiswe kwiindila mu Mwanaakwe. Mulinguwe Leza wakalenga nyika, alimwi ngonguwe ngwaakasala kuti abe mukamwini wazintu zyoonse. 3Walo nguubonya kubala kwabulemu bwa Leza, alimwi ngocinkozya cabube bwa Leza. Nguutabilila zintu zyoonse amajwi aakwe aanguzu. Naakamana kusalazya bantu mukubagwisizya zinyonyoono, wakaakukkala kujulu kubbazu lyalulyo lwa Leza Wabulemu.
Mwanaa Leza mupati kwiinda bangelo
4Mwanaa Leza mupati kwiinda bangelo, alyalo zina ndyaakamupa Leza ndipati kwiinda lyabangelo. 5Nkaambo ino ndilili Leza naakaambide kuli umwi wabangelo kuti,
“Nduwe mwanaangu, sunu ndakuzyala?”
Alimwi Leza taakaamba zyamungelo umwi kuti,
“Mebo ndiyooba wisi, awalo uyooba mwanaangu.”
6Pele naakatumya Mwanaakwe munyika, Leza wakati,
“Bangelo ba Leza boonse baleelede kumukomba.”
7Zyabangelo Leza ulati,
“Nguucita bangelo bakwe kufwipuka mbuli luuwo,
Basimilimo bakwe ulabacita mbuli mulilo uuvwilima.”
8Pele zya Mwanaakwe ulati,
“O Leza, cuuno cako cabwami ciyooba akutamani.
Mubwami bwako ulabeteka cabululami.
9Yebo wakayandisya bululami akusulaika zitaluleme.
Aboobo Leza, Leza wako, wakusumpula kwiinda beenzinyoko boonse
mukukunanika mafuta cakubotelwa.”
10Alimwi Leza wakati,
“Yebo, O Mwami, nduwe ncobeni wakalenga nyika kumatalikilo.
Wakapanga majulu amaanza aako.
11Nyika amajulu ayooloba,
pele yebo unooliwo.
Zyoonse ziyookulumpala mbuli zyakusama.
12Nyika amajulu uyooavunga-vunga mbuli cibaki.
Iiyi, ayoosanduka mbuli cakusama.
Pele yebo unooli mbubonya lyoonse,
alimwi myaka yako tiigoli pe.”
13Alili Leza taakwe naakaambila umwi wabangelo bakwe kuti,
“Kkala kubbazu lyalulyo lwangu
kusikila nkacite basinkondonyoko kuti babe cilyatilo cako.”
14Sena bangelo ba Leza tiili myuuya buyo iimubelekela? Aabo mbatuma kuli baabo bayoojana lufutuko.
Currently Selected:
Bahibulu 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
