Ezula 7

Ezula mbwaakapilukila ku Jelusalemu

1Musule aazintu eezi, muleli mupati Aatakisesi waku Pesiya kacilela, kwakali Mujuda umwi uutegwa Ezula mwanaa Selaiya, mwana wa Azaliya mwanaa Hilikiya, 2mwanaa Syalumu, mwanaa Zadoki, mwana wa Ahitubi, 3mwana wa Amaliya, mwana wa Azaliya, mwanaa Melaiyoti, 4mwanaa Zelahiya, mwana wa Uzi, mwanaa Buki, 5mwana wa Abisyuwa mwanaa Finehasi, mwana wa Eliyazaa, mwana wa Aloni mupaizi mupati. 6Wakaboola kuzwa ku Babuloni. Wakali mwiiyi wakazi kabotu zyamulawo wa Mozesi ooyo Mwami Leza wa Isilayeli ngwaakabapa. Muleli wakapa Ezula zintu zyoonse nzyaakakumbila, nkaambo Mwami Leza wakwe wakali aanguwe. 7Baisilayeli bamwi kubikkilizya abapaizi, Balevi, baimbi, balindizi bamilyango, abalo bakaboola ku Jelusalemu mumwaka waciloba wakulela kwa Aatakisesi.

8Ezula wakasika mu Jelusalemu mumwezi wasanu mumwaka waciloba wakulela kwamuleli mupati ooyu. 9Wakatalika lweendo lwakwe lwakuzwa ku Babuloni mubuzuba butaanzi bwamwezi mutaanzi. Wakaakusika ku Jelusalemu mubuzuba butaanzi bwamwezi wasanu, nkaambo Leza nguwakali kumweenzya. 10Ezula wakalilyaabide mukwiiya amukubamba mulawo wa Mwami Leza amukwiisya mbeta amilawo ya Leza ku Baisilayeli.

Lugwalo muleli mupati Aatakisesi ndwaakapa Ezula

11Mboobu mbulwakabede lugwalo oolo muleli mupati Aatakisesi ndwaakapa kuli Ezula mupaizi, mwiiyi, mwaalumi wakaiide kapati muli zyamilawo amalailile aa Mwami Leza ngaakapa ku Baisilayeli.

12“Kuzwa kuli Aatakisesi mwami wabami kuli Ezula mupaizi,

mwiiyi wamulawo wa Leza wajulu. Ndakujuzya.

13Lino mebo ndalailila kuti kufumbwa Muisilayeli uuli mubulelo bwangu

kubikkilizya abapaizi a Balevi aabo bayanda kuunka anduwe ku Jelusalemu

balakonzya kuunka.

14“Mebo abalailili bangu bali ciloba twakutuma

kuti ukavuntauzye zya Juda a Jelusalemu

kuti naa bacita zyeendelana amulawo wa Leza wako ooyo ngojisi.

15Kunze aakooku utolelezye nsiliva angolida

mebo abalailili bangu bali ciloba

nzitwapa cakuliyandila kuli Leza wa Isilayeli

ooyo uulaaŋanda iili mu Jelusalemu.

16Alimwi utolelezye nsiliva angolida zyoonse

nzyotijane mucisi coonse ca Babuloni antoomwe

azipego zyakuliyandila eezyo Bantu abapaizi nzyobatipe

kuti zikagwasilizye kuŋanda ya Leza wabo mu Jelusalemu.

17“Ubone masimpe kuti amali aaya waula bapoho,

bagutu atubelele tweenze kubikkilizya azituuzyo zyamaila azyazyakunywa

akuzipaizizya acipaililo camuŋanda ya Leza wako mu Jelusalemu.

18Nkaako yebo a Bajudanyoko

mukacite kufumbwa eeco ncomuyooyeeya

kuti ncibotu kunsiliva angolida ziyoosyaala,

mukazibelesye kweendelana akuyanda kwa Leza wanu.

19Uleelede kuyoopa zibelesyo eezi zyoonse nzyoopegwa kuŋanda ya Leza

mu Jelusalemu, nzyakubelesya mukukomba.

20Alimwi naa kuyooba zintu zimwi ziyooyandika kuŋanda ya Leza wako,

ukagwisye kuzwa kuziyobwedo zyabwami.

21“Lino mebo nde Aatakisesi,

ndailila bayobozi boonse bali muminzi iili kumbo lyamulonga wa Yufuletisi

kuti kabapa cakufwambaana kufumbwa eeco Ezula mupaizi,

mwiiyi wamulawo wa Leza wajulu ncaakumbila.

22Mulakonzya kumupa matalenta aansiliva aali mwaanda,

zisuwo zyamaila zili mwaanda,

matalo aawaini aali mwaanda,

matalo aamafuta aaoliva aali mwaanda, amunyo munji kapati.

23Kufumbwa eeco Leza wajulu ncaayanda kuti mucicite,

mukugwasilizya ŋanda yakwe amucicite cabunkutwe,

kutegwa atabi nandinyemena mebo abalunyungu lwangu.

24Alimwi amuzibe kuti tamweelede kutezya naa kubbadelezya bapaizi,

Balevi, baimbi, balindizi bamilyango,

balindizi baŋanda ya Leza nibaba babelesi bamwi bakuŋanda ya Leza eeyi.

25“Kwaamba nduwe Ezula mukweendelana

abusongo oobo Leza wako mbwaakakupa usale babelesi abeendelezi

banooendelezya bantu boonse bazi mulawo wa Leza

bali mutala limwi lyamulonga wa Yufuletisi.

Boonse aabo batazi weelede kubaiisya.

26Kufumbwa ooyo uutaswiilili mulawo wa Leza wako

amulawo wamuleli uleelede kujaigwa, kutandwa,

kunyangwa lubono lwakwe naa kubikkwa muntolongo.”

Ezula mbwaakalumbaizya Leza

27Aalumbwe Mwami Leza wabasikale besu ooyo wakacitya kuti muleli abe aamuzeezo wakuti alete bulemu kuŋanda ya Mwami Leza mu Jelusalemu munzila eeyi. 28Akaambo kaluse lwa Leza, ndafwidwa luzyalo amuleli mupati, abalupati-pati bakwe kubikkilizya abasintanze bakwe. Mwami Leza wangu wakali aandime, nkaako ndakaba sicamba, ndakabunganya basololi ba Baisilayeli kuti bainke aandime.

Currently Selected:

Ezula 7: Tonga96

Highlight

Copy

Compare