Ezula 5
5
1Lino Hagayi musinsimi a Zekaliya musinsimi walunyungu lwa Ido bakakambaukila Bajuda abamu Jelusalemu muzina lya Leza wa Isilayeli. 2Mpoonya Zelubbabeli mwana Syeyalitiyeli a Jesyuwa mwanaa Jozadaki bakainka kuyootalika kuyakulula ŋanda ya Leza mu Jelusalemu. Basinsimi ba Leza abalo bakali aambabo kababagwasilizya.
3Ciindi eeco Tatenayi mweendelezi waminzi iili kumbo lyamulonga wa Yufuletisi, Syetaabozenayi antoomwe abeenzinyina bakainka akuyooti kulimbabo, “Ino nguni wakamuzumizya kuti muyakulule ŋanda ya Leza eeyi?” 4Alimwi bakababuzya kuti, “Ino mbaani baalumi bayakulula ŋanda eeyi?” 5Pele Leza wakali abapati ba Bajuda aabo cakuti balupati-pati bakabaleka buyo, mane bakalemba lugwalo kuli Daliyasi, awalo wakabasandula. 6Ngaaya makani Tetanayi mweendelezi waminzi iili kumbo lyamulonga wa Yufuletisi, Syetaalibozenayi antoomwe abeenzinyina abalupati-pati bakumbo lyamulonga wa Yufuletisi ngibakalembela muleli.
7Bakati, “Kumuleli mupati Daliyasi,
8O mwami Daliyasi, twakujuzya.
O mwami tuyanda kuti uzibe kuti twakasika kucisi ca Juda
kuŋanda ya Leza mupati.
Bantu bayaka ŋanda eeyi bayasya mabwe mapati
alimwi ono basekka mapulanga mubwaanda.
Mulimo ooyu ulacitwa cabunkutwe alimwi baluuenzya kabotu.
9“Twakaakubuzya bapati aabo kuti,
‘Ino nguni wakamuzumizya kuti muyakulule ŋanda eeyi?’
10Alimwi twakababuzya mazina aabo kutegwa tukuzibye mazina aabasololi
babo.
11“Mboobu mbubakatwiingula,
‘Swebo tuli babelesi ba Leza wajulu anyika,
tuyakulula ŋanda ya Leza wa Isilayeli yakayakidwe kaindi
eeyo mwami mupati njaakayakide akumanizya.’
12Pele akaambo kakuti basikale besu bakanyemya Leza wajulu
wakabaaba kuli Nebukadineza Mukalidi,
mwami wa Babuloni wakoola ŋanda ya Leza eeyi
akutola bantu ku Babuloni.
13Pele mumwaka wakusaanguna wa Sailasi muleli mupati waku Babuloni,
Sailasi wakalailila kuti ŋanda ya Leza eeyi iyakululwe.
14Lwakwe mwini nguwakagwisya kuzwa mucikombelo caleza waku Babuloni
zibelesyo zyangolida ansiliva zyaŋanda ya Leza
eezyo Nebukadineza nzyaakatolede kucikombelo caleza waku Babuloni.
Mpoonya Sailasi wakazipa kumwaalumi uutegwa Syesyibaza
ooyo ngwaakabikka kuti abe mweendelezi wacisi ca Juda.
15Wakamwaambila kuti,
‘Tola zintu eezi ukazibikke muŋanda ya Leza mu Jelusalemu.
Ukayakulule ŋanda ya Leza aawo mpoonya mpoyakayakidwe.
16Mpawo Syesyibaza wakaboola akuzoosya ntalisyo yaŋanda ya Leza
mu Jelusalemu. Kuzwa buzuba oobo
kusikila sunu ŋanda eeyi iciyakwa, tiinamana pe.’
17“Kuti naa kacikubotela O mwami,
ino mbuti kuti kwalangwa-langwa mumabbuku aabwami bwa Babuloni
kubona kuti naa muleli mupati Sailasi wakalailila ncobeni
kuti ŋanda ya Leza iyakululwe mu Jelusalemu.
Eelyo inga watuzibya amakani aaya.”
Currently Selected:
Ezula 5: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
