Ezula 4

Basinkondonyina mbubakayanda kubalesya kuyaka ŋanda ya Leza

1Lino basinkondonyina abantu baku Juda abaku Benjamini nibakamvwa kuti aabo bakali baange bayaka ŋanda ya Mwami Leza wa Isilayeli, 2bakaboola kuli Zelubbabeli akubasololi bamikwasyi bazooti, “Tuyanda kuti tumugwasye kuyaka ŋanda nkaambo aswebo mbubonya mbuli ndinywe tukomba Leza wanu. Aswebo twali kupaizya kulinguwe kuzwa ciindi cakali kulela Esahadodi muleli mupati waku Asiliya ooyo wakatuleta kokuno.”

3Pele Zelubbabeli, Jesyuwa abamwi basyeede basololi bamikwasyi ya Baisilayeli bakaingula kuti, “Nywebo munyina lubazu mukuyaka ŋanda ya Leza wesu. Swebo tulaliyakila ŋanda ya Mwami Leza wa Isilayeli, mbubonya mbuli Sailasi muleli mupati waku Pesiya mbwaakatulailila.”

4Mpawo bantu aabo bakabazingulikide bakasoleka kutyompya bantu ba Juda akubakonga kutegwa baleke kuyaka ŋanda. 5Bakapa masinkamulomo kuli balupati-pati babulelo kuti bainge-inge mulimo akunyonganya makanze aabo. Bakali kucita oobo mukulela kwa Sailasi mane do mubulelo bwa Daliyasi.

Basinkondonyina mbubakayanda kubakasya kuyakulula Jelusalemu

6Lino kumatalikilo aakulela kwamuleli mupati Zekisesi basinkondonyina ba Bajuda abaabo bamu Jelusalemu bakatongooka.

7Lino muleli mupati Aatakisesi waku Pesiya kacilela Bisyilamu, Matiledati, Tabeeli antoomwe abeenzinyina bakalemba lugwalo kuli Aatakisesi. Lugwalo oolu lwakalembeledwe mumusyobo wa Cialamu. 8Awalo Lehumu mweendelezi a Syimusyayi mulembi bakalemba lugwalo mbubonya buyo lwakutongooka bantu baku Jelusalemu kuli Aatakisesi muleli mupati. Bakalemba kuti, “Kuzwa kuli,

9Lehumu mweendelezi a Syimusyayi mulembi antoomwe abeenzinyina,

babetesi abalupati-pati baku Pesiya, Eleki, Babuloni,

a Basusa bazwa ku cisi ca Elamu,

10abantu bamwi aabo Asyubanipali uulemekwa singuzu mbaakatanda.

Aaba bakaakukkala kumunzi wa Samaliya

akumabazu amwi aali kumbo lyamulonga wa Yufuletisi.”

11Lugwalo oolo ndubakatumina, lwakali kuti,

“Kumuleli mupati Aatakisesi,

ndiswe babelesi bako swebo notuli kuminzi iili kumbo lyamulonga wa

Yufuletisi.

12“Tuyanda kuti uzibe omwami

kuti Bajuda aaba bakaboola kuno kuzwa kooko

bakainka ku Jelusalemu bayakulula munzi uulya ulaabantu bazangi babi.

Bayakulula bwaanda akubambulula ntalisyo zyawo.

13Lino omwami oolemekwa ncoelede kuziba ncakuti,

kuti naa munzi ooyu uyakululwe abwaanda bwawo bubambululwe

tabacinooyoopi limbi mutelo

caamba kuti kulabula lubono lwabwami.

14Lino swebo mukuti nduwe ootulanga tatuyandi kubona kuti muleli wasampaulwa,

ncenciceeco ncitwakulembela zyamakani aaya kuti uzibe,

15kutegwa makani aaya alangwe-langwe mumabbuku aabami bakakusaangunina.

Mumabbuku aaya uyoojana kuti munzi ooyu ngwabantu bazangi,

bapenzya kubami azisi, kuzwa lili mbazangi.

Alimwi ncenciceeco cakapa kuti munzi ooyu woolwe.

16Ono omwami tukuzibya kuti naa munzi ooyu wayakululwa abwaanda

bwabambululwa,

kucinyina zyako mutala limwi lino lya Yufuletisi.”

17Muleli mupati wakaingula boobu,

“Kuli Lehumu mweendelezi a Syimusyayi mulembi

antoomwe abeenzinyina boonse bakkala mu Samaliya akumabazu amwi

aakumbo lyamulonga wa Yufuletisi. Ndamujuzya.

18“Lugwalo ndumwakatutumina lwakabalwa akusandululwa ndalimvwida.

19Ndakabalailila kuti,

balange-lange eelyo bakajana kuti bantu bamunzi

ooyu bapapila bami alimwi mbazangi.

20“Bami basinguzu mbibakali kulela mucisi eeco.

Aaba bakalelezya acisi coonse cili kumbo lyamulonga wa Yufuletisi

akutambula mitelo, zipego azimwi zili boobo.

21Nkaako balaililwa kuti baleke kuyakulula munzi ooyo

kusikila nkaambe kuti ono batalike.

22Mufwambaane kwaambilizya makani

kuti batanyonganyi zyabulelo ooko.”

23Mbulwakasikila buyo lugwalo oolu luzwa kumuleli mupati Aatakisesi akubalilwa Lehumu, Syimusyayi abeenzinyina bakainka cakufwambaana kuyoolesya anguzu Bajuda ku Jelusalemu bakali kuyakulula munzi.

Mulimo wakuyakulula ŋanda ya Leza mbuwakatalika alimwi

24Mulimo wakuyakulula ŋanda ya Leza wakaima kuzoosika mumwaka wabili wakulela kwa Daliyasi muleli mupati waku Pesiya.

Currently Selected:

Ezula 4: Tonga96

Highlight

Copy

Compare