Ezula 2

Mweelwe wabaabo bakapilukila ku Jelusalemu

(Nehemiya 7.4-73)

1Ooyu ngomweelwe wabantu bakapilukila kuzwa kubwaange, aabo Nebukadineza mwami waku Babuloni mbaakatolede. Bakapilukila ku Jelusalemu a Mujuda umwi aumwi kumunzi wakwe mwini. 2Bantu aaba bakali kusolwedwa a Zelubbabeli, Jesyuwa, Nehemiya, Selaiya, Leelaiya, Modekayi, Bilisyani, Misipa, Bigivayi, Lehumu alimwi a Baana.

Lino ngooyu mundandanda wabaalumi Baisilayeli bakapilukila.

3Balunyungu lwa Palosyi bakali zyuulu zyobilo amwaanda amakumi aali ciloba ababili, 4lwa Syefatiya bakali myaanda yotatwe amakumi aali ciloba ababili, 5lwa Ala bakali myaanda iili ciloba amakumi aali ciloba abasanu, 6lwa Pahatimowabu kwiindila muzyalani lya Jesyuwa a Jowabu bakali zyuulu zyobilo amyaanda iili lusele akkumi ababili, 7lwa Elamu bakali cuulu amyaanda yobilo amakumi osanwe abane, 8lwa Zatu bakali myaanda iili fuka amakumi one abasanu, 9lwa Zakayi bakali myaanda iili ciloba amakumi aali cisambomwe, 10lwa Bani bakali myaanda iili cisambomwe amakumi one ababili, 11lwa Bebayi bakali myaanda iili cisambomwe amakumi obilo abatatu, 12lwa Azigadi bakali cuulu amyaanda yobilo amakumi obilo ababili, 13lwa Adonikamu bakali myaanda iili cisambomwe amakumi aali cisambomwe acisambomwe, 14lwa Bigivayi bakali zyuulu zyobilo amakumi osanwe acisambomwe, 15lwa Adini bakali myaanda yone amakumi osanwe abane, 16lwa Ata kwiindila muli Hezekiya bakali makumi aali fuka alusele, 17lwa Bezayi bakali myaanda yotatwe amakumi obilo abatatu, 18lwa Jola bakali mwaanda akkumi ababili, 19lwa Hasyumu bakali myaanda yobilo amakumi obilo abatatu, 20lwa Gibbaa bakali makumi aali fuka abasanu.

21Baalumi bakali kuzwa ku Betelehemu bakali mwaanda amakumi obilo abatatu, 22ku Netofa bakali makumi osanwe acisambomwe, 23ku Anatoti bakali mwaanda amakumi obilo alusele, 24ku Azimaveti bakali makumi one ababili, 25ku Kiliyatijeyalimu, Kefila, aku Beeloti bakali myaanda iili ciloba amakumi one abatatu, 26ku Lama a Geba bakali myaanda iili cisambomwe amakumi obilo aumwi, 27ku Nikimasyi bakali mwaanda amakumi obilo ababili, 28ku Beteli a Ayi bakali myaanda yobilo amakumi obilo ababili, 29ku Nebo bakali makumi osanwe ababili, 30ku Magibisyi bakali mwaanda amakumi osanwe acisambomwe. 31Baalumi bakali kuzwa kumunzi umwi wa Elamu bakali cuulu amyaanda yobilo amakumi osanwe abane, 32ku Halimu bakali myaanda yotatwe amakumi obilo, 33ku Lodi, Hadidi aku Ono bakali myaanda iili ciloba amakumi obilo abasanu, 34ku Jeliko bakali myaanda yotatwe amakumi one abasanu, 35ku Senaa bakali zyuulu zyotatwe amyaanda iili cisambomwe amakumi otatwe.

36Bapaizi balunyungu lwa Jedaiya kwiindila muli Jesyuwa bakali myaanda iili fuka amakumi aali ciloba abatatu, 37lwa Ima bakali cuulu amakumi osanwe ababili 38lwa Pasyuu bakali cuulu amyaanda yobilo amakumi one aciloba, 39lwa Halimu bakali cuulu akkumi aciloba.

40Balevi balunyungu lwa Jesyuwa a Kidimiyeli kwiindila muzyalani lya Hodaviya bakali makumi aali ciloba abane. 41Baimbi balunyungu lwa Asafu bakali mwaanda amakumi obilo alusele.

42Bakali balindizi baamilyango ya ŋanda ya Leza, balunyungu lwa Syalumu, Ata, Talimoni, Akubu, Hatita a Syobayi bakali mwaanda amakumi otatwe afuka.

43Babelesi bakuŋanda ya Leza bakali balunyungu lwa Ziha, Husufa, Tabawoti, 44Kelosi, Siyaha, Padoni, 45Lebana, Hagaba, Akubu, 46Hagaba, Syalimayi, Hanani, 47Gideli, Gaha, Leyaiya, 48Lezini, Nekoda, Gazamu, 49Uza, Paseya, Besayi, 50Asina, Meyunimu, Nefusimu, 51Bakibuki, Hakufa, Haahuu, 52Baziluti, Mehida, Haasya, 53Baakosi, Sisela, Tema, 54Neziya a Hatifa.

55Lunyungu lwababelesi ba Solomoni bakali ba Sotayi, Hasofeleti, Peluda, 56Jaala, Daakoni, Gideli, 57Syefatiya, Hatili, Pokeletihazebaimu a Ami. 58Antoomwe babelesi bakuŋanda ya Leza abalunyungu lwa babelesi ba Solomoni bakali myaanda yotatwe amakumi aali fuka ababili.

59Aabo bakazwa kuminzi ya Telimela, Telihaasya, Kelubu, Adani a Ima, batakali kukonzya kutondezya kuti bakali Baisilayeli ncobeni, 60mbalunyungu lwa Delaiya, Tobiya a Nekoda, antoomwe bakali myaanda iili cisambomwe amakumi osanwe ababili.

61Kuzwa kubapaizi balunyungu lwa Habaiya, Hakozi a Baazilayi wakali kwiitwa boobo akaambo kakuti wakakwata mwanaa Baazilayi Mugiliyadi, 62bakasola kulangaula mumabbuku aamikwasyi aakonzya kutondezya kuti mbapaizi ncobeni, pele tiibakaajana, aabo bakagwisigwa muciinga cabupaizi mbuli bantu batasalali. 63Nkaako mweendelezi wakabalailila kuti kabatalyi zipaizyo zyeelede bapaizi ccita kakuli mupaizi uujisi Ulimu a Tumimu.

64Lino mweelwe wabantu bakapiluka kuzwa mubwaange wakali zyuulu zili makumi one azibili amyaanda yotatwe amakumi cisambomwe. 65Babelesi babo baalumi abakaintu bakali zyuulu zili ciloba amyaanda yotatwe amakumi otatwe aciloba. Alimwi kwakali abaimbi baalumi abakaintu bali myaanda yobilo. 66Bakaletelezya amabbiza aali myaanda iili ciloba amakumi otatwe acisambomwe, myuulu zyakali myaanda yobilo amakumi one aasanu, 67nkamela zili myaanda yone amakumi otatwe azisanu, ambongolo zili zyuulu zili cisambomwe amyaanda iili ciloba amakumi obilo.

68Ciindi nibakasika kuŋanda ya Mwami Leza ku Jelusalemu, bamwi basololi bamikwasyi bakapa zipego zyakuliyandila zyakugwasilizya kuyakulula ŋanda ya Leza mubusena bwayo. 69Bakapa mbubakali kukonzya kumulimo ooyu cakuti kwakajanika madulakimu aangolida aali zyuulu zili makumi aali cisambomwe acimwi, maminasi aansiliva aali zyuulu zyosanwe, amajansi aabupaizi aali mwaanda. 70Bapaizi, Balevi, baimbi, balindizi baamilyango ababelesi baku ŋanda ya Leza bakakkala muminzi yabo beni abantu bamwi. Abalo Baisilayeli bamwi bakakkala muminzi yabo.

Currently Selected:

Ezula 2: Tonga96

Highlight

Copy

Compare