Esita 8

Bajuda mbubakazumizigwa kulwana

1Mubuzuba mbubonya oobo muleli Zekisesi wakapa mwami mukaintu Esita lubono loonse lwakali lwa Hamani sinkondonyina Bajuda. Kumane Esita wakamwaambila muleli kuti Modekayi wakali musazinyina, eelyo Modekayi wakazumizigwa kunoonjila akubona muleli. 2Mpoonya muleli wakagwisya nweenwe yakwe yakudintya njaakanyanga Hamani wiipa Modekayi. Esita wakacita Modekayi kuti abe nguulanga lubono oolo lwakali lwa Hamani.

3Alimwi Esita wakakombelezya muleli, wakaliwaala kumaulu aakwe kalila. Wakakumbila muleli kuti ajane nzila imwi yakulesya bubi bwakali kuyanda kuleta Hamani walunyungu lwa Agagi ku Bajuda. 4Muleli wakatandabika musako wakwe wangolida kuli Esita, aawo Esita wakaima akwaamba kuti, 5“Kuti naa kacikubotela oolemekwa, alimwi naa mebo ulandiyanda, akuti kaciluzi kulinduwe, ambilizya kuti malailile aa Hamani atatobelwi. Malailile aayo Hamani mwanaa Hamedata walunyungu lwa Agagi ngaakapa kuti Bajuda boonse mubulelo banyonyoonwe. 6Ino inga mebo ndakonzya buti kupona kuti naa cili boobu cacitikila bantu bangu, kuti basinzuboma boonse bajaigwe?”

7Eelyo muleli Zekisesi wakaambila mwami mukaintu Esita a Modekayi Mujuda kuti, “Amubone, Hamani ndamujaya akaambo kakubukila Bajuda. Lubono lwakwe ndalupa kulinduwe Esita. 8Lino nywebo mulembe kwaamba zya Bajuda aabo mbuli mbomuyanda. Mulembe muzina lyamuleli akudinta anweenwe yamuleli. Nkaambo kufumbwa mulawo uulembedwe akudintwa anweenwe yamuleli tuukonzyi kusandulwa.”

9Eeci cakacitika mubuzuba bwamakumi obilo aatatu bwamwezi watatu, mwezi wa Sivani. Modekayi wakaita balembi bamuleli akubaambila zyakulembela Bajuda akubeendelezi, baleli, abalupati-pati bazisi zyoonse zili mwaanda amakumi obilo aciloba kuzwida ku Indiya mane kuyoosika ku Kusyi. Magwalo aaya akalembeledwe mumisyobo amilaka yaambwa muzisi eezyo alimwi aku Bajuda. 10Modekayi wakaalembya magwalo aaya muzina lyamuleli Zekisesi wadinta anweenwe yakwe, wapa basimposo bakaatola amabbiza aatijaanisya aakazyalilwa muziba zyamuleli.

11Magwalo aaya akali kwaambilizya kuti muleli wazumizya Bajuda bali muminzi yoonse kuti bakonzye kulikwabilila. Kuti naa balwanwa abaalumi bajisi zilwanyo, bamusyobo nuuba buti, bazwa muzisi zyakwe, inga bakonzya kulwana akubanyonyweeda limwi aabo abamakaintu abana babo, balakonzya kubajaya akutola lubono lwabo. 12Mulawo wakeelede kutalika kubeleka mubulelo bwa Pesiya boonse mubuzuba oobo bwakabikidwe kujaya Bajuda, buzuba bwakkumi aatatu bwa Adaa mwezi wakkumi aibili. 13Makani aaya akaambilizigwa mbuli mulawo, akuzibisigwa kubantu boonse bamuzisi kutegwa Bajuda bakonzye kulibambilila kubweedezezya basinkondonyina buzuba oobo bwaakusika. 14Kwiindila mukulailila kwamuleli basimabbiza bakatanta mabbiza aabwami akutijaanisya. Mulawo ooyu wakaambilizigwa amu Susa munzi mupati.

15Lino Modekayi wakazwa kuŋanda yabwami, kasamide jansi lyabwami lyamusyobo wacijulu-julu akutuba lyatutali twandeketela toosedwe kabotu, alimwi wakalisamide amusini wangolida. Mpoonya kwakamvwigwa mumigwagwa yamu Susa kusekelela akuyobeka kwakubotelwa kapati. 16Bajuda bakali kutangala kubotelwa akukkalwa myoyo. 17Mucisi cimwi acimwi amuminzi yoonse mwakaambilizigwa majwi aamuleli, antoomwe amulawo, kwakali kutangala akusekelela akati ka Bajuda. Bwakali buzuba bwakusekelela akulyookezya. Bantu bamisyobo iindene-indene bakatalika kulyaamba kuti Mbajuda, akaambo kakuyoowa Bajuda aabo.

Currently Selected:

Esita 8: Tonga96

Highlight

Compare

Copy