Esita 2

Esita mbwaakaba mwami mukaintu

1Musule aakooko, muleli naakaleka kunyema, wakatalika kuyeeya zeezyo zyakacita Vasyiti ambuli mbwaakaambilizya. 2Lino aawo bagwasyi bamuleli bakati kulinguwe, “Ino mbuti kuti kulangaulwe musimbi mubotu uutazi mwaalumi kuti abe mwami mukaintu? 3Nikwasalwa balupati-pati babulelo kuti balete basimbi babotu boonse akubabikka muŋanda iili mu Susa. Ubape kuti kabalangwa a Hegayi muzibe ooyo uulanga bakaintu bako, abape tufuta twakunana-nana. 4Kwamana umwi wabaabo uyookukonda akabe ngomwami mukaintu mubusena bwa Vasyiti.”

Malailile aaya akamubotela muleli, wakaatobela.

5Lino mumunzi wa Susa, kwakali mwaalumi Mujuda wakali kutegwa Modekayi, mwanaa Jaiya, mwanaa Syimeyi, mwanaa Kisyi, wakali wamusyobo wa Benjamini. 6Ciindi mwami Nebukadineza waku Babuloni naakajata mwami Jehoiyakini wacisi ca Juda akumutola mubwaange kuzwa mu Jelusalemu, awalo Modekayi wakatolelezegwa antoomwe ankamu yabaange bamwi. 7Wakajisi mweeninyina, wakali kwiitwa kuti Esita, Mucihibulu wakali Hadasa. Nibakafwa bazyali ba Esita, Modekayi wakatola mwana ooyu akuyoomulela mbuli mwanaakwe.

Esita wakali musimbi weebeka, 8lino kwakaba kuti muleli naakaambilizya kuti basimbi babotu batolwe ku Susa, Esita wakatolelezegwa. Wakaakubikkwa kuŋanda yabasimbi bamuleli, kabalangwa a Hegayi. 9Hegayi wakayandisya Esita kapati. Nkaako cakufwambaana wakamupa twakunana-nana atulyo-tulyo. Wakamubikka mubusena bubotu akucita kuti basimbi bamwi bakali ciloba bakuŋanda yabwami kabamukutaukila.

10Lino Modekayi wakaambilide Esita kuti atakabi naambila muntu naba omwe zyamukwasyi wakwe naa kuti wakali Mujuda. 11Buzuba abuzuba Modekayi wanoonga ulalyeenzeenzya kubbuwa lyaŋanda yabasimbi kuti azibe mbwaakali kupona Esita akuti abone naa zilamweendela buti.

12Cakali kutola mwaka woonse kuti musimbi abotezegwe. Mboobu mbucakali kucitwa: kwamyezi iili cisambomwe wakali kunana mafuta aamala, kwamyezi iimbi iili cisambomwe bakali kupegwa tununkilizyo tumwi. Kumana waawo bakali kutolwa omwe-omwe kumuleli Zekisesi. 13Ciindi musimbi naakali kuzwa kuŋanda yabasimbi kuya kuŋanda yabwami, wakali kukonzya kusama kufumbwa nzyaakali kuyanda. 14Wakali kutolwa kumuleli kumangolezya, eelyo bwaca wakali kutolwa kukampetu kambi kaŋanda yabasimbi, ooko nkubakali kulangwa aa Syaasyigazi wakali umwi wabazibe bamuleli, walo ngonguwe wakali kulangila mwami bamwanakasuwa bakwe. Musimbi ooyo taakali kupilukila limbi kumuleli ccita waitwa buya azina amuleli.

15Ciindi ca Esita nicakasika ooyo Modekayi ngwaakalela mbuli mwanaakwe lyakafwa Abihaili wisi wakali simizyaakwe Modekayi, Esita taakwe naakayanda cimbi kunze azeezyo Hegayi muzibe wamuleli wakali kulanga ŋanda yabasimbi nzyaakamupede. Esita wakabotela boonse bakamubona. 16Wakatolwa kumuleli Zekisesi kuŋanda yabwami mumwezi wakkumi wa Tebeti, mumwaka waciloba wakulela kwa Zekisesi. 17Awalo muleli wakayanda Esita kwiinda basimbi bamwi boonse, lyakatyokela liso lyakwe kuli Esita! Wakamusamika musini wabwami kumutwe akumucita kuti abe mwami mukaintu mubusena bwa Vasyiti. 18Amane muleli wakapanga pobwe pati lyakusekelela Esita. Wakatamba balupati-pati abeendelezi bakwe. Wakaambilizya kuti bube buzuba bwakulyookezya mubulelo bwakwe boonse, alimwi wakapa zipo kubantu mbuli mbwaakali kuyanda.

Modekayi mbwaakavuna muleli

19Ciindi eeci Modekayi wakapedwe cuuno amuleli kumulyango wabwami. 20Esita taakwe naakaambila muntu naba omwe kuti wakali Mujuda mbubonya mbuli bwakamwaambilide Modekayi. Esita wakali kuswiilila malailile aa Modekayi mbubonya mbuli mbwaakali kucita naakacili musyoonto.

21Mumazuba aayo ciindi Modekayi naakali kubelekela muleli kwakajanika kuti Bigitana a Telesyi, bazibe bobilo bakali balindizi baamulyango wamuleli, bakanyema akuyanda kubukila muleli kuti bamujaye. 22Pele Modekayi wakaaziba makani aaya, aboobo wakaambila Esita, walo wakaambila muleli eezyo zyakamwaambila Modekayi. 23Makani aaya naakavuntauzigwa akujanika kuti ngamasimpe baalumi bobilo aaba bakaangililwa mucisamu. Makani oonse aaya alilembedwe mubbuku lyamakani aabami.

Currently Selected:

Esita 2: Tonga96

Highlight

Compare

Copy