Mukambausi 11

Zyacinkwa atala aamaanzi

1Waala cinkwa cako atala aamaanzi, kwainda mazuba manji uzoocijana alimwi. 2Abila bantu bali ciloba, kwaambisya bali lusele, nkaambo tozi mapenzi aatiboole aanyika aano.

3Kuti makumbi kaajisi maanzi, alawisya mvula anyika. Kuti naa musamu wawida kumusanza naa kunyika kubbazu ooko nkuutiwide, nkuunoolangide. 4Ooyo uulangilila luuwo takalimi, ooyo uulangilila makumbi takatebuli. 5Mbubonya mbuli mbotazi nzila yaluuwo, ambotazi mbuli mubili wakasalalila mwida mbuukomena, mbubonya oobo ayebo mbotakonzyi kuziba milimo ya Leza, Mulengi wazintu zyoonse. 6Kosyanga mbuto zyako cifumo-fumo, kumangolezya utaleki buyo, nkaambo tozi ziyoozwidilila, ambweni njeeyi naa iilya, ambweni zyoonse zyobilo zilaba kabotu.

Koyeeya Mulengi wako nocili mukubusi

7Mumuni mubotu, meso alabotelwa kubona zuba. 8Nikuba kuti muntu aongole buti, aasekelele. Pele kayeeya mazuba aamudima, kuti anooli manji. Zyoonse ziyoocitika nzyabuyo.

9Kobotelwa omukubusi nocili mwana, kotangala mumazuba aabukubusi bwako. Kotobela ziyanda moyo wako azeezyo nzyobona, pele koyeeyede kuti muzintu zyoonse eezi Leza uyookubeteka. 10Nkaako ono koleka kuusa mumoyo wako, kosiya makatazyo aako, nkaambo bukubusi anguzu nzyabuyo.

Currently Selected:

Mukambausi 11: Tonga96

Highlight

Copy