Ciibalusyo 31
31
Josyuwa mbwaakatola busena bwa Mozesi
1Lino Mozesi wakaindilizya kwaambila Baisilayeli, 2wakati, “Ono ndijisi myaka iili mwaanda amakumi obilo, nkaako nsicikonzyi kumusolweda. Kunze aaboobo, Mwami Leza wakandaambila kuti, ‘Tokooyoozubuka mulonga wa Jolodani.’ 3Mwami Leza wanu lwakwe nguuyoomuzubusya. Uyoonyonyoona misyobo eeyo iikkala kooko, kutegwa mukatole nyika yabo. Josyuwa nguutibe musololi wanu mbubonya mbuli Mwami Leza mbwaakaamba. 4Mwami Leza uyoobanyonyoona mbubonya mbuli mbwaakacita Sihoni a Ogi bami ba Baamoli, aabo mbwaakanyonyoona antoomwe anyika yabo. 5Mwami Leza uyoobaaba kulindinywe, aboobo muleelede kuyoobatanda mbuli mbundamulailila. 6Amuyume mube basicamba. Mutayoowi nikuba kukankama, kayi Mwami Leza wanu ulaandinywe. Taakwe nayoomusiya nikuba kumulekelezya.”
7Mpoonya Mozesi wakaita Josyuwa akumwaambila Baisilayeli boonse kabamvwide kuti, “Koyuma ube sicamba, nkaambo nduwe uuyoonjizya bantu boonse aaba munyika eeyo Mwami Leza njaakakonkezya kuli basikale babo kuti uyoobapa. Weelede kuyoobaapawida nyika kuba lukono lwabo. 8Mwami Leza lwakwe uyookusolweda, alimwi unooli aanduwe. Taakwe nayookusiya nikuba kukulekelezya pe. Nkaako utayoowi nikuba kutyompwa.”
Mbubakalailila kubala Mulawo kwainda myaka iili ciloba
9Mpawo Mozesi wakalemba Mulawo ooyu akuupa kubapaizi, Balevi, aabo bakali kubamba bbokesi lyacizuminano ca Mwami Leza, abapati boonse ba Baisilayeli. 10Mpoonya Mozesi wakabalailila kuti, “Lyoonse kwainda myaka iili ciloba, mwaka walwaangunuko, lilekelelwa zikwelete mweelede kuyoobalulula Mulawo ooyu, muubaluluke muciindi capobwe lyazivuka. 11Mweelede kuyooubalila Baisilayeli boonse ciindi nibayoobungana kubusena bwakukombela oobo Mwami Leza wanu mbwayoosala. 12Mukabunganye bantu boonse, nkokuti baalumi, bakaintu abana, antoomwe abazwamasi aabo bali muminzi yanu, kutegwa baswiilile akwiiya kulemeka Mwami Leza wanu. Baleelede kutobela majwi a Mulawo ooyu cabunkutwe. 13Munzila eeyi balunyungu lwanu batanamvwide zya Mulawo wa Mwami Leza wanu balakonzya kuuteelela. Nkaako bayooiya kumulemeka mumazuba oonse ngomuyoopona munyika eeyo njomuyootola mwazubuka mulonga wa Jolodani.”
Mwami Leza mbwaakalailila Mozesi lwamamanino
14Lino Mwami Leza wakaambila Mozesi kuti, “Ono ulaafwiifwi kufwa. Ita Josyuwa, umutole kutente lyakubunganina kutegwa nkamulailile.” 15Mwami Leza wakalibonya kutente mumusumpuululu wakkumbi, kkumbi eeli lyakaima kumanjililo aatente.
16Mpawo Mwami Leza wakaambila Mozesi kuti, “Ono ulaafwiifwi kufwa, nkabela mbotifwide buyo, bantu aaba bayootalika kukomba baleza banyika eeyo njebayootola. Bayoondisiya akutyola cizuminano eeco ncindakapangana ambabo. 17Caakucitika eeci, ndiyoobanyemena kapati akubalekelezya. Njoobafutatila, nkaako bayoonyonyoonwa. Bayoosikilwa mapenzi manji, mane kusikila bakaliyeeye kuti mapenzi aaya abasikila akaambo kakuti mebo nde Leza nsicili aambabo pe. 18Nkasimpe, mubuzuba oobo njoobafutatila akaambo kacinyonyoono cabo cakukomba baleza bambi.
19“Lino ulembe lwiimbo, ubaiisye Baisilayeli boonse, balwiimbe kuti lube bumboni bwangu. 20Ndaakubasisya munyika eeyo iikunka mukupa abuci iili njindakasyomezya kuli basikale babo, bayootalika kukomba baleza bambi. Bayoondikaka akutyola cizuminano ncindakapangana ambabo akaambo kakuti bayoolya cakulilekela. 21Nkaako mapenzi manji ayoobasikila. Lwiimbo oolo luyooba bumboni mukuti balunyungu lwabo nsinabasisya kunyika eeyo njindakabasyomezya.”
22Mubuzuba oobo mbubonya Mozesi wakalemba lwiimbo oolo akwiisya Baisilayeli.
23Mpawo Mwami Leza wakalailila Josyuwa mwanaa Nuni kuti, “Koyuma ube sicamba, nkaambo nduwe uutisolwede Baisilayeli munyika eeyo njindakabasyomezya, mebo lwangu njoobaanduwe.”
24Lino Mozesi naakamana kulemba majwi oonse mubbuku lya Mulawo, 25wakalailila Balevi aabo bakali kubamba bbokesi lyacizuminano ca Mwami Leza kuti, 26“Amubweze bbuku lya Mulawo eeli, mulibikke kumbali lya bbokesi lyacizuminano ca Mwami Leza wanu. Ooko liyooba bumboni kulindinywe. 27Ndizi mbuli mbomuli basicinguni batamvwi. Mwabona mwakali kuzangila Mwami Leza, mebo nkecili muumi ino mebo ndafwa! 28Amubunganye bapati bamisyobo yoonse, abamwi balupati-pati boonse kuti ndaambe majwi aaya kabalimvwidide. Ndaita julu anyika kuti zibe bakamboni bangu. 29Nkaambo ndizi kuti kunze aakufwa kwangu, mulatalika kubisya alimwi akusiya nzindamulailila. Nkaako kumazuba aaza kumbele mapenzi ayoomusikila akaambo kakucita zinyonyoono kumbele lya Mwami Leza eezyo nzyaakamukasya.”
Lwiimbo lwa Mozesi
30Mpoonya Mozesi wakaimba lwiimbo oolu Baisilayeli boonse kabaswiilila.
Currently Selected:
Ciibalusyo 31: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
