Ciibalusyo 27
27
Zyamilawo ya Leza iilembedwe amabwe
1Lino Mozesi abapati ba Baisilayeli bakalailila bantu kuti, “Amubambe malailile ngetimupe sunu. 2Mwaakuzubuka mulonga wa Jolodani akunjila munyika eeyo Mwami Leza wanu njayoomupa, mukaimike mabwe mapati akwaalamba mulambo. 3Mukalembe alingawo milawo amalailile oonse. Muyakunjila munyika eeyo Mwami Leza wanu njayoomupa, nyika iikunka mukupa abuci, mbubonya mbuli Mwami Leza, Leza wabasikale banu, mbaakasyomezya. 4Mutala limwi lya Jolodani, mukaimike mabwe aaya aamulambo acilundu ca Ebali mbubonya mbuli mbwendimulailila sunu. 5Ooko mukayake cipaililo ca Mwami Leza wanu, kacili camabwe aalo. Mutakabelesyi cibelesyo calubulo niciba buti. 6Cipaililo eeco mukaciyasye mabwe aatabezedwe. Kwamana kamupaizya zipaizyo zyakutenta alincico ku Mwami Leza wanu. 7Nkukonya ooko mukape zituuzyo zyalumvwano, mukazilye akutangala kumbele lya Mwami Leza wanu. 8Mukalembe milawo yoonse ya Leza kabotu-kabotu amabwe aayo ngomwaimika.”
9Mpawo Mozesi antoomwe abapaizi, Balevi, bakaambila bantu kuti, “Amuumune, muteelele no Baisilayeli! Ono mwaba bantu ba Mwami Leza wanu. 10Amuswiilile Mwami Leza wanu akutobela milawo amalailile aakwe ngendimupa sunu.”
Zyakusinganya bataswiilili
11Mubuzuba oobu mbubonya Mozesi wakalailila bantu kuti, 12“Mwaakuzubuka mulonga wa Jolodani, misyobo eeyi ikaime acilundu ca Gelizimu kuti ikaleleke bantu, musyobo wa Simiyoni, Levi, Juda, Isakaa, Josefa awa Benjamini. 13Misyobo iiyooima acilundu ca Ebali kusinganya bantu njeyi, musyobo wa Lubeni, Gadi, Asya, Zebuluni, Dani awa Nafutali. 14Majwi ngobayooamba Balevi cakupozomoka ngaaya:
15“‘Asinganyizigwe muntu uupanga cikozyanyo niciba buti cibezedwe akucikomba, ncisesemyo ku Mwami Leza.’ Bantu boonse baingule kuti, ‘Akube boobo!’ 16Asinganyizigwe muntu uutalemeki wisi abanyina.
“Bantu boonse baingule kuti, ‘Akube boobo!’ 17Asinganyizigwe muntu uucesya munyinza wamweenzinyina.
“Bantu boonse baingule kuti, ‘Akube boobo!’ 18Asinganyizigwe muntu uuleesya moofu munzila.
“Bantu boonse baingule kuti, ‘Akube boobo!’ 19Asinganyizigwe muntu uuzundikizya bazwamasi, bamusyaala abamukabafu.
“Bantu boonse baingule kuti, ‘Akube boobo!’ 20Asinganyizigwe muntu uusika mukawisi amubili nkaambo wausya wisi nsoni.
“Bantu boonse baingule kuti, ‘Akube boobo!’ 21Asinganyizigwe woona aamunyama!
“Bantu boonse baingule kuti, ‘Akube boobo!’ 22Asinganyizigwe muntu uusika mucizi wakwe amubili naa wada limwi!
“Bantu boonse baingule kuti, ‘Akube boobo!’ 23Ansinganyizigwe muntu uusika banyinazyala amubili!
“Bantu boonse baingule kuti, ‘Akube boobo!’ 24Asinganyizigwe muntu uuyubilila muntunyina kuti amujaye!
“Bantu boonse baingule kuti, ‘Akube boobo!’ 25Asinganyizigwe muntu uuulwa kuti ajaye muntu uutakwe mulandu!
“Bantu boonse baingule kuti, ‘Akube boobo!’ 26Asinganyizigwe muntu uutabambi majwi aalembedwe mubbuku lyamulawo akwaatobela!
“Bantu boonse baingule kuti, ‘Akube boobo!’”
Currently Selected:
Ciibalusyo 27: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
