Ciibalusyo 26

Zipo zyabutebuzi

1“Lino mwaakunjila munyika eeyo Mwami Leza wanu njayoomupa akukkala, 2muleelede kuyoopa ku Mwami Leza wanu zitaanzi kubizwa munyika eeyo njayoomupa. Mukazibikke mucinzuma akuzitola kubusena bwakukombela oobo Mwami Leza wanu mbwayoosala. 3Mukainke kumupaizi uunoobeleka ciindi eeco mukati, ‘Mwami Leza wangu wakandileta ncobeni munyika njaakakonkezya basikale besu kuti uyootupa.’

4“Mpoonya mupaizi uyootambula cizuminano eeco akucibikka ansi kumbele lyacipaililo ca Mwami Leza wanu. 5Ndendilyo noyooamba majwi kumbele lya Mwami Leza wanu kuti, ‘Sikale wangu wakali Mualamu wiingaila. Wakainka ku Ijipiti abantu bace buyo, wakaakukkala ooko akuba musyobo wanguzu wabantu banji-banji. 6Ooko Baijipiti bakatulela calunya, bakatupenzya akutupa milimo miyumu. 7Mpawo twakalilila Mwami Leza, Leza wabasikale besu, nkabela wakamvwa kulila kwesu, akubona mapenzi, aakubeleka akudyamininwa kwesu. 8Mbombuboobu Mwami Leza mbwaakatugwisya mu Ijipiti anguzu zyakwe mpati. Wakacita maleele azigambya ziyoosya. 9Wakatuleta kunyika iino iikunka mukupa abuci. 10Lino O Mwami Leza ndaleta zyakutebula kwangu zitaanzi nzyookandipa.’

“Kamubikkide kale cinzuma eeco kumbele lyacipaililo ca Mwami Leza wanu, mukombe. 11Yebo abamukwasyi wako mutangale akaambo kazintu zibotu zyoonse Mwami Leza wanu nzyaamucitila. Balevi abazwamasi mbomukkala limwi batangale andinywe.

12“Mumwaka watatu mukape kwakkumi kwazisyango zyanu ku Balevi, bazwamasi, bamusyaala abamukabafu, kutegwa kabayoojisi zyakulya muminzi yanu yoonse. 13Ndendilyo nimuyooti ku Mwami Leza wanu, ‘Ndagwisya cipaanzi cisalala muŋanda yangu, ndacipa Balevi, bazwamasi, bamusyaala abamukabafu, mbubonya mbuli mbookalailila. Tiindatyola nikuba kuluba milawo yako pe. 14Tiindakalya cipaanzi cimwi cisalala ciindi ncindakali aadilwe, nikuba kucigwisya ciindi nketasalali mu Mulawo, nikuba kucituula kubafu pe. Ndakakuswiilila O Mwami Leza wangu, akucita zyoonse nzyookandilailila. 15Lino langa ansi kuzwa kucikkalilo cako kujulu, uleleke bantu bako Baisilayeli anyika eeyo njookasyomezya kutupa ciindi nookakonkezya kuli basikale besu nyika iikunka mukupa abuci.’

Bantu ba Mwami leza

16“Mwami Leza wanu umulailila kuti mutobele milawo amalailile aakwe oonse. Amukaabambe amyoyo yanu yoonse amyuuya yanu yoonse. 17Sunu mwazumina nobeni kuti Mwami Leza ngu Leza wanu akuti muyooenda munzila zyakwe akubamba milawo amalailile aakwe oonse. 18Awalo Mwami Leza wanu sunu wazumina kuti muli bantu bakwe, mbubonya mbuli mbwaakamusyomezya. Nkaako ono umulailila kuti mubambe milawo yakwe yoonse. 19Wasyomezya kuti uyoomusumpula kwiinda misyobo yoonse njaakalenga. Nkaako nywebo muyoomutembaula akumulumbaizya. Muyooba bantu bakwe bamugaminine, mbubonya mbuli mbwaakasyomezya.”

Currently Selected:

Ciibalusyo 26: Tonga96

Highlight

Copy

Compare