Ciibalusyo 23

Bantu bakasigwa kunjila mumbungano

1“Taakwe muzibe naa uukoswedwe weelede kubungana abantu ba Mwami Leza.

2“Taakwe mwana wamusokwe naba umwi walunyungu lwakwe weelede kubungana abantu ba Mwami Leza mane kusikila kuzyalani lyakkumi.

3“Taakwe Muamoni naba Mumowabu naba umwi wamusyobo wabo weelede kubungana abantu ba Mwami Leza, mane kusikila kuzyalani lyakkumi. 4Nkaambo aaba bakakaka kumupa zyakulya ciindi ciya nimwakazwa mu Ijipiti. Bakaita Balaamu mwanaa Peyo uuzwa ku Petoo ku Mesopotamiya kuti azoomusinganye. 5Nikuba boobo Mwami Leza wanu taakaswiilila zyakaamba Balaamu. Nkaako wakasandula kusinganya ooku kuti cibe cileleko canu, nkaambo kakuti Mwami Leza wanu ulamuyanda. 6Mubuumi bwanu boonse tamweelede kuyoopangana cizuminano caluumuno alusumpuko abantu aaba pe.

7“Tamweelede kusampaula Baedomu, nkaambo mulilunyungu lomwe. Tamweelede kusampaula Baijipiti, nkaambo mwakakkala munyika yabo mbuli bazwamasi. 8Balunyungu lwabo, bazyalani lyatatu balakonzya kubungana abantu ba Mwami Leza.

Zyakusalazya zivuka zyabasilumamba

9“Naa mwainka kuyoolwana basinkondonyoko, muleelede kubona kuti mwalitantamuna kuzwa kuzintu zyoonse eezyo zikonzya kumusofwaazya. 10Kuti umwi wanu walisofwaazya akaambo kakuti walilotela, weelede kuya kunze lyazivuka, akkale ooko. 11Pele kwaba kumangolezya asambe amubili, eelyo lyabbila ulakonzya kunjila muzivuka.

12“Musale lubazu lwazivuka nkonkuko nkomuti busena bwakuligwasyila. 13Muleelede kubeza cibelesyo cimwi cakuyoosisya, aawo mpomuyanda kukkalila, mwamana muvwikile. 14Nkaambo Mwami Leza wanu uleendeenda muzivuka zyanu kuti amukwabilile akwaaba basinkondonyoko kulindinywe. Zivuka zyanu kazisalala, kuti Mwami Leza wanu ataboni tubi mukuti inga wamufutatila.

Zyamilawo imwi

15“Kuti muzike umwi watija simalelaakwe akuboola kulinduwe, utamupilusyi pe. 16Muleke akkale anduwe, ulakonzya kuunka akukkala mumunzi uuli woonse ngwaayanda. Toelede kumupenzya pe.

17“Taakwe Muisilayeli mwaalumi naba mukaintu weelede kuba muvuule wakuŋanda ya Leza. 18Mali aajanwa munzila eeyi taaelede kupegwa ku Mwami Leza wanu kuti azuzikizye cikonke cakwe, nkaambo Mwami Leza wanu taziyandi zintu zili boobu.

19“Toelede kukweletesya Muisilayelinyoko mali niziba zilyo niciba cili buti coonse kuti ujane mpindu pe. 20Muzwamasi ulakonzya kumucita oobo, pele kutali Muisilayelinyoko, kuti Mwami Leza wanu akamuleleke mumilimo yanu munyika eeyo njayoomupa. 21Kuti wakonkezya ku Mwami Leza wako, toelede kumuka kubamba cikonke eeco, nkaambo Mwami Leza uyooyanda kuti ucite mbookaamba, kwataba boobo uyooba aamulandu. 22Pele kuti tokonkezyi, tokooyooba aamulandu pe. 23Kufumbwa eeco ncooamba weelede kucicita ncobeni, kayi waliyandila buya ku Mwami Leza wako.

24“Kuti naa wanjila mumuunda wamweenzinyoko wansaansa, ulakonzya kulya mboyanda, pele toelede kutolelezya mucinzuma ozwa pe. 25Kuti wanjila mumuunda wamweenzinyoko wamaila, ulakonzya kupuka makunka, pele toelede kugonka maila aimvwi acigonsyo pe.

Currently Selected:

Ciibalusyo 23: Tonga96

Highlight

Copy

Compare