Ciibalusyo 21

Zyamuntu wajaigwa amuntu uutazizilwe

1“Kuti naa kwajanika muntu wakajaigwa musokwe, munyika eeyo Mwami Leza wanu njayoomupa kuti ibe yanu, alimwi kakutazizilwe kuti naanguni wamujaya, 2bapati, bana ababetesi baleelede kuyooinka kubusena oobo bwakafwida muntu ooyo, bakaime musinzo uuli mbuubede kuzwa kuminzi eeyo iizingulukide mutumba ooyo. 3Lino bapati bamunzi ooyo wajanika kuti nguulaafwiifwi amutumba ooyo, bakatole mpwizi iitanabelesegwa nikuba kuvoleka. 4Baleelede bakatyole nsingo yayo kufwiifwi akalonga katayuminini. 5Kwakumana boobo, bapaizi Balevi, abalo, baleelede kuyooinka ooko aaba mbabanooyookosola twaambo twanzwanga toonse tuli buti. Mwami Leza wanu wakabasala aaba kuti bakamubelekele akuleleka bantu muzina lyakwe. 6Mpawo bapati bamunzi ooyo uulaafwiifwi aakajailwa muntu, baleelede kuyoosamba kumaanza atala aampwizi yakatyolwa mukosi mukkuti kabati, 7‘Nkasimpe, tatuli ndiswe twakajaya muntu ooyu, tiitwakamubona pe. 8Nkaako O Mwami Leza lekelela bantu bako Baisilayeli mbookavuna kuzwa ku Ijipiti. Tulekelele alimwi utatupi mulandu wakujaya muntu uunyina kaambo.’ 9Mwaakucita mbuli Mwami Leza wanu mbwamwaambila, nimutakooyoopegwa mulandu wabujayi.

Zyabakaintu basaalwa munkondo

10“Lino mwaakuzunda basinkondonyoko, Mwami Leza mbayooaba kulindinywe akubajata, 11kuti akati kabazike aabo wabona mukaintu wakubotela kapati, ulakonzya kumukwata. 12Weelede kumutola kuŋanda yako, aakusika ooko akagelwe, akutenda mala, 13akusamununa zisani eezyo nzyaakajatwa azyalo. Weelede kuti akkale muŋanda yako, kuzwa waawo inga wamukwata. 14Kuti bweende-bweende kotacimuyandi, ulakonzya kumuleka, ainke kufumbwa nkwayanda. Toelede kumuuzya nikuba kumucita mbuli muzike, kayi wakamusampula kale.

Zyakukona kwabana balombe bakusaanguna

15“Lino atwaambe kuti muntu kakwete bakaintu bobilo, kwamana boonse bazyala bana balombe, pele ooyo wakusaanguna kali ngwamukaintu uutayandwi, 16mubuzuba bwakuyooabanya bana bakwe lubono, teelede kuyoosalulula. Teelede kuti akape mwanaa mukaintu ngwayanda ceelelo cayooyo wakusaanguna. 17Weelede kupa mwanaakwe wakusaanguna kuzyalwa zyeelelo zyalubono lwakwe loonse kobilo, nikuba kuti tali mwanaa mukaintu ngwayanda. Mwana wakusaanguna mbulemu bwawisi.

Zyamwana sicinguni

18“Atwaambe kuti muntu kajisi mwana sicinguni uupenzya, uutamvwi bazyali bakwe, uuteempi nikuba kuti bamuuma. 19Bazyali bakwe baleelede kumutola kubapati kumulyango wamunzi. 20Basika ooku baambile bapati aaba kuti, ‘Mwaneesu ooyu ngusicinguni, ulapenzya. Notwaamba tamvwi, mutolo alimwi mukolwi.’ 21Mpawo baalumi boonse bamumunzi bakamuume mabwe afwe. Mbombuboobu mbomuyoogwisya bubi akati kanu. Baisilayeli boonse baakumvwa bayooyoowa.

Zyamilawo imwi

22“Kuti muntu wajaigwa akaambo kamulandu, waangililwa acisamu, 23mutumba wakwe tuuelede kulala aawo pe. Muleelede kumuzikka buzuba oobo mbubonya, nkaambo muntu waangililwa acisamu ulisinganyizidwe kuli Leza. Amukacite oobo kuti mutakasofwaazyi nyika eeyo Mwami Leza wanu njayoomupa kuti ibe lukono lwanu.

Currently Selected:

Ciibalusyo 21: Tonga96

Highlight

Copy

Compare