Ciibalusyo 20

Zyankondo

1“Lino naa mwainka kuyoolwana basinkondonyoko, kwamana mwabona kuti balo balijisi mabbinza, nkalaki ampi mpati kwiinda yanu, mutabayoowi pe, nkaambo Mwami Leza wanu ooyo wakamugwisya mu Ijipiti, uyooba aandinywe. 2Kamutanatalika kulwana, mupaizi weelede kwaambila basilumamba kuti, 3‘Komvwa yebo, Isilayeli sunu mulalwana abasinkondonyoko. Myoyo yanu itaduntaani, mutayoowi nikuba kukankama. 4Nkaambo Mwami Leza wanu nguumusolweda munkondo kuti amulwanine basinkondonyoko akubazunda.’ 5Bapati aaba baambile basilumamba kuti, ‘Sena kuli umwi aano wakayaka ŋanda, kwamana taakaipa kuli Leza? Ooyo abweede kumunzi ambweni inga ulabanafwa munkondo nkabela uumbi ulaba niipa nguwe kuli Leza. 6Sena kuli umwi aano wakalima muunda wansaansa, kwamana tanazilya? Ooyo abweede kumunzi, ambweni inga ulabanafwa munkondo, nkabela nsaansa eezyo kukazilye uumbi. 7Sena kuli umwi aano uukkalide mukaintu, kwamana tanamutola kuŋanda? Awalo abweede kumunzi, ambweni inga ulabanafwa munkondo, nkabela kukamukwate uumbi mukaintu ooyo.’

8“Bapati aabo bayooyungizya akuti, ‘Sena kuli umwi uuyoowede kapati? Awalo ooyo abweede kumunzi kuti beenzinyina batatyompwi abalo pe.’ 9Lino bapati bamana buyo kwaambila basilumamba, baleelede kusala musololi wankamu yomwe-yomwe.

10“Mwaswena afwiifwi amunzi ooyo ngomuyanda koola, kusaanguna mubape ciindi cakuti balikombye. 11Kuti bazumina kujalula manjililo, bantu boonse bamumunzi ooyo balaba bazike banu, banoomubelekela lyoonse. 12Pele kuti tabalikombyi, alimwi babusya nkondo, amubabbatikizye. 13Mwami Leza wanu waaba munzi ooyo mumaanza aanu, mujaye baalumi boonse apanga. 14Pele bakaintu, bana, zivubwa azimwi zyoonse zili mumunzi ooyo, mulakonzya kuzisaala kuti zibe zyanu. Alimwi mulakonzya kubelesya eezyo Mwami Leza nzyaamupa nimwasaala basinkondonyoko. 15Mbombuboobu mbomweelede kuyoocita kuminzi yoonse iili kulaale anyika yanu.

16“Pele kuminzi yamisyobo eeyo Mwami Leza wanu njayoomupa kuti lukono lwanu, mutakasiyi cintu niciba comwe cipona pe. 17Mbubonya mbuli Mwami Leza wanu mbwaakamulailila, amukabanyonyweede limwi, Bahiti, Baamoli, Bakenani, Bapelezi, Bahivi a Bajebusi. 18Nkaambo inga mulaba nimuccilila ziyanza zibi nzobacita zyakukomba baleza babo, mpawo mubisizye Mwami Leza wanu.

19“Ciindi nimuli mukuzunda mutagonki misamu yamucelo nikuba kuti nkondo itole ciindi cilamfu buti, kamulya micelo yayo. Kayi misamu taili mbabasinkondonyoko. 20Pele mulakonzya kugonka misamu eeyo iitaligwi akwiibelesya mukuyasya zitantaala mane kusikila munzi ooyo muuzunde.

Currently Selected:

Ciibalusyo 20: Tonga96

Highlight

Copy

Compare