Daniyeli 6
6
Daniyeli mbwaakawaalwa mumulindi wabasyuumbwa
1Lino Daliyasi wakayeeya kuti ncibotu kuti asale beendelezi bali mwaanda amakumi obilo kuti beendelezye bwami boonse, 2kuti kube bantu botatwe banoobalanga akati kabaabo kwakali Daniyeli. Beendelezi aaba bakacitwa kuti kabapa malailile kubabanzi kuti mwami atasweekelwi. 3Lino Daniyeli wakaba aampuwo mbotu akati kabeendelezi aabo mukuti wakali kulibatamika kabotu aboobo mwami wakayeeya kuti abe mupati mubwami boonse. 4Akaambo kaceeci balangi abeendelezi bakasolekesya kuti bamujanine kaambo Daniyeli mumakani aajatikizya zyacisi, pele tiibakakonzya kucita boobo. Tiibakajana bubi mulinguwe, nkaambo wakali kusyomeka, wakanyina kampenda nokaba kaambo kali buti. 5Kumamanino baalumi aaba bakati, “Tatukoojana kaambo kakutamikizya Daniyeli ccita twaambe cimwi cintu cijatikizya mulawo wa Leza wakwe.” 6Nkaako balangi abeendelezi bakabungana antoomwe akuunka kuyooti kumwami, “Omwami, Daliyasi woongole!” 7Balangi babwami, bapati, beendelezi, balailili abeendelezi bamwi boonse bakazuminana kuti mwami weelede kupa mulawo akubona kuti malailile aaya atobelwa, malailile aakuti kufumbwa muntu uukomba leza uumbi naba muntu mumazuba aali makumi otatwe kuzwa sunu, kuleka nduwe buyo omwami, uyoosowelwa mumulindi wabasyuumbwa. 8Lino omwami, obikka mulawo ooyu uulembe kutegwa utakasandulwi, kweendelana amilawo ya Bamedi a Bapesiya, iitakonzyi kuubausigwa. 9Aboobo mwami Daliyasi wakabikka mulawo akuulemba.
10Lino Daniyeli naakaziba kuti kwabikkwa mulawo, wakaya kuŋanda yakwe mukaanda kamujulu ooko mpulungwido nkozilangide ku Jelusalemu. Buzuba abuzuba wakali kufugama ansi akukomba kwaziindi zyotatwe kalumba Leza wakwe mbubonya mbuli mbwaakali kucita lyoonse. 11Mpoonya baalumi aabo bakainka munkamu yabo baakujana Daniyeli ulakomba akukumbila Leza kuti amugwasye. 12Nkaako bakainka kumwami akuyookanana kulinguwe azyamulawo ooyo bakati, “Omwami, sena tookabikkide mulawo wakuti kwamazuba aali makumi otatwe kuzwa sunu kufumbwa ooyo uukomba leza nali buti naba muntu, kuleka nduwe omwami, uyoosowelwa mumulindi wabasyuumbwa?”
Mwami wakaingula kuti, “Mulawo ooyo mpuuli, kweendelana amilawo ya Bamedi aya Bapesiya iitakonzyi kususyigwa.”
13Mpawo bakati kumwami, “Daniyeli, umwi wabaange bakazwa kucisi ca Juda, takuswiilili omwami nuuba mulawo ooyo ngookabikka uulembedwe. Asunu ucikomba ziindi zyotatwe abuzuba.” 14Lino mwami naakamvwa ceeci, wakausa kapati, walo wakali kuyandisya kuvuna Daniyeli nkaako wakasoleka mbwakonzya kuti amuvune.
15Pele baalumi aabo bakainka kumwami munkamu yabo, baakuti kulinguwe, “Koyeeya omwami kuti kweendelana amulawo wa Bamedi a Bapesiya, taakwe mulawo naaba malailile aaya mwami ngaabikka aakonzya kususyigwa pe.”
16Aboobo mwami wakapa malailile, eelyo bakaleta Daniyeli akumusowela mumulindi wabasyuumbwa. Mwami wakati kuli Daniyeli, “Leza wako ooyo ngobelekela lyoonse akuvune!”
17Mpoonya kwakaletwa bbwe lyakasinkwa amulyango wamulindi ooyo, mwami wakasimba anweenwe yakwe mwini anweenwe zyabaleli bakwe, kutegwa Daniyeli atabi neengelelwa. 18Kumane mwami wakabweeda kuŋanda yakwe yabwami, nkabela busiku oobo taakalya pe, taakwe cintu comwe cakumutangazya cakaletwa kulinguwe. Taakoona pe.
19Lino mbubwakangwengwemukila, mwami wakabuka akufwambaanina kuunka kumulindi wabasyuumbwa. 20Naakasika aafwiifwi amulindi wabasyuumbwa, wakaita Daniyeli ajwi lyabuumba, “Daniyeli, omubelesi wa Leza uupona, sena Leza wako, ooyo ngobelekela lyoonse, wakonzya kukuvuna kuzwa kuli basyuumbwa?” 21Daniyeli wakaingula kuti, “Omwami oongole! 22Leza wangu watuma mungelo, ooyo wamuma milomo yabasyuumbwa. Taakwe nibandicisa, nkaambo kakuti ndasalala kulinguwe. Kayi taakwe bubi mbundakakucitila omwami.”
23Amvwe boobo mwami wakakondwa kapati, eelyo wakalailila kuti Daniyeli agwisigwe mumulindi. Lino Daniyeli naakagwisigwa mumulindi ooyo, taakwe cilonda cakajanwa alinguwe, nkaambo wakasyomede muli Leza wakwe.
24Lino mukulailila kwamwami, bantu aabo bakatamikizizye Daniyeli bakaletwa akuyoosowelwa mumulindi wabasyuumbwa, antoomwe abamakaintu abana babo. Lino kabatanawa ansi, basyuumbwa bakabakwaba akupwayaula mafuwa aabo oonse.
25Mpoonya mwami Daliyasi wakalembela bantu boonse, masi oonse, abantu bamisyobo yoonse munyika yakwe kuti,
“Amuzwidilile kapati!
26Ndabikka mulawo wakuti kufumbwa ooko bwami bwangu nkobubede,
bantu baleelede kuyoowa akulemeka Leza wa Daniyeli.
Nkaambo ngu Leza uupona, nkwali lyoonse mane kukabe kutamani, bwami bwakwe tabukamani.
27Ulafutula akuvuna, ulacita zitondezyo azigambya, mujulu aansi.
Wakavuna Daniyeli kuzwa kunguzu zyabasyuumbwa.”
28Lino Daniyeli wakazwidilila mumazuba aakulela kwa Daliyasi akulela kwa Sailasi Mupesiya.
Currently Selected:
Daniyeli 6: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
