Daniyeli 10

Cilengaano ca Daniyeli

1Mumwaka watatu wakulela kwa Sailasi mwami wacisi ca Pesiya, Daniyeli uutegwa Belitesyaza wakabona cilengaano. Makani aaco akalisinizizye. Akali kwaamba zyankondo mpati. Kumvwisya makani aayo kwakamuboolela mucilengaano.

2Kuciindi eeco, mebo nde Daniyeli ndakali kulila kwamvwiki zyotatwe. 3Tiindakali kulya zilyo zinono pe, taakwe nindakalya nyama, naa kunywa waini, nketanani mafuta pe, mane kusikila lyakamana mvwiki zyotatwe.

4Mubuzuba bwamakumi obilo aane bwamwezi mutaanzi, nindakaimvwi ankomwe yamulonga mupati wa Taigilisi, 5ndakalanga, eelyo ndakabona muntu wakaimvwi kumbele lyangu, wakasamide zisani zyandeketela, mucibuno wakalyaangide lutambo lwangolida iini-ini. 6Mubili wakwe wakali mbuli bbwe libalangalisya, busyu bwakwe kabumweka mbuli lulabo, meso aakwe akali mbuli bbalabala lyamulilo, maboko amaulu aakwe akali kumweka mbuli mukuba wasyobwa, jwi lyakwe lyakali mbuli lyankamu yabantu.

7Mebo nde Daniyeli, ndime buyo endikke nindakabona cilengaano eeco, baalumi mbindakali aabo tiibakacibona pe. Pele kuyoosya ooku kwakabasikila cakuti bakatija baakuyuba. 8Aboobo ndakasyaala endikke, nkelangide acilengaano eeci, nkute zyakalindilokede, ndakasyulungana kumeso, taakwe ncindakali kukonzya kucita. 9Mpawo ndakamvwa kaambaula, lino nindakamuswiilila, ndakoona, ndakali vunteme ansi.

10Mpoonya kwakandiguma janza, lyakandicita kuti ndikankame maboko amazwi. 11Wakati, “Daniyeli, ulalemekwa kapati, uswiilisisye kapati majwi ngendiyanda kukwaambila. Ima nkaambo ndatumwa kulinduwe.” Lino naakaamba ceeci kulindime, ndakaima kandikankama.

12Lino wakaindilizya akuti, “Utayoowi Daniyeli kuzwa buzuba buya nookayandisya kumvwisya makani aaya akulibombya kuli Leza, majwi aako akamvwigwa, lino ndaboola akaambo kakuti aingulwa. 13Pele mungelo wabwami bwa Pesiya wakandikazya kwamazuba aali makumi obilo abumwi. Mpawo Mikayeli umwi wabaleli bapati, wakaboola kuzoondigwasya nkaambo ndakalaangidwe ooko amwami wa Pesiya. 14Lino ndaboolela kuti ndizookwaambile ciyoocitika kubantu bokwanu kumazuba aaboola, nkaambo cilengaano eeci cijatikizya ciindi ciboola.”

15Lino kacindaambila ceeci, ndakavuntama ansi nketaambauli pe. 16Lino umwi wakali kulangika mbuli kuti muntu wakaguma milomo yangu, aawo ndakaasama, ndatalika kukanana. Ndakaambila yooyo wakaimvwi kumbele lyangu kuti, “Ndapenga kapati mumoyo akaambo kacilengaano, osimalelo wangu, ndabula mbwecita. 17Lino mebo ndemubelesi wako inga ndakanana buti anduwe osimalelo wangu? Nguzu zyamana, nsicikonzyi akuyoya pe.”

18Alimwi ooyo wakali kulangika mbuli muntu wakandiguma, wandipa nguzu. 19Wakati, “Utayoowi pe yebo omuntu oolemekwa kapati. Koba aluumuno, yuma lino, koyuma!” Lino naakali kukanana kulindime, ndakayuma alimwi ndakati, “Kokanana osimalelo wangu, kayi ono ndayuma.”

20Nkaako wakati, “Sena ulizi ncindaboolela kulinduwe? Lino-lino njooboola kuzoolwana mungelo wa Pesiya, ono ndazwa buyo mungelo waku Gilisi ulaboola, 21pele nyanda kukulwiida zilembedwe mubbuku lyakasimpe. Taakwe uundigwasilizya mukubalwana ccita buyo Mikayeli, mungelo wanu”

Currently Selected:

Daniyeli 10: Tonga96

Highlight

Copy

Compare