Amosi 8
8
Cilengaano cacinzuma cijisi micelo
1Nceeci Mwami Leza ncaakanditondezya. Wakanditondezya cinzuma camicelo iibizidwe. 2Wakabuzya kuti, “Ubwene nzi, Amosi?” Ndakaingula kuti, “Ndibwene cinzuma camicelo iibizidwe.” Mpawo Mwami Leza wakati kulindime, “Ciindi cabantu bangu Baisilayeli casika, nsikoobalekelela pe. 3Mubuzuba oobo, nyimbo nzyobaimba muŋanda yakukombela ziyooba zyakulila, mbwaamba Mwami Leza. Nkabela mitumba minji inooyojanwa koonse-koonse. Eelyo bayootandilwa anze bayooumuna wi!”
Kunyonyoonwa kwa Isilayeli
4Amuswiilile makani aaya nywebo nomupenzya babulide akukatazya bacete bamucisi, 5nomuti, “Ino pobwe lyamwezi mupya lilamana lili kutegwa tutalike kuulisya maila, abuzuba bwa Sabata bulainda lili kutegwa tusambale maila amwi. Tucesye cakupimina, tudulisye, tubelesye zipimyo zyakucenga, 6tuule bacete ansiliva ababulide andyasyo, alimwi tuulisye maila aanyina ankwaaya.”
7Mwami Leza, Leza wa Jakobo, wakakonkezya wakati, “Nsikalubi zyoonse nzibakacita pe. 8Sena nyika tiikakankami akaambo kaceeci? Iiyi, bantu boonse bakkala mulinjiyo bayooema. Cisi coonse ciyoofuta mbuli mulonga wa Nailo, ciyooselauka akuyoosya mbuli mulonga wamu Ijipiti. 9Mwami Leza ulati, ‘Mubuzuba oobo, njoocita kuti zuba likabbile acilungu-lungu, nyika iyoosiya mbi ciindi casikati.’ 10Ndiyoocita mapobwe aanu aabukombi kuti akabe aakweema, kwiimba kwanu koonse kuyooba kwakulila. Ndiyoocita kuti nyoonse mukasame masaka akukululwa masusu. Ndiyoocita kuti muciindi eeco mukeeme mbuli muntu uulila mwanaakwe uuzyedwe alikke, mamanino ayooba mbuli buzuba bubi.”
11Mwami Leza ulati, “Mazuba alaza nendiyooleta nzala mucisi coonse, kutaamba nzala yazilyo, noiba nyota yamaanzi, pele nzala yakumvwa majwi aa Mwami Leza. 12Banooyoozeeleka kuzwa kulwizi lumwi kuyoosika kulwizi lumbi, bayoozelengana kuzwa kunyika kuyoosika kujwe kabayabuyandaula majwi aa Mwami Leza, pele tabakaajani pe.
13“Mubuzuba oobo, balindu beebelwa abakubusi balimvwide bayoonetauka akaambo kanyota. 14Aabo bakonkezya muzina lyamutuni Asyima waku Samaliya, naa baamba kuti, ‘Mbubonya mbuli Leza wa Dani mbwali muumi,’ naa bati, ‘Mbubonya mbuli Leza waku Biiyasyeba mbwali muumi, bantu aabo bayoowa tabakabuki limbi pe.’”
Currently Selected:
Amosi 8: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
