Milimo 23
23
1Nkabela Paulu wakalangisisya basinkuta akwaamba kuti, “Nobakwesu, nsidonaiki mumoyo wangu abuumi mbwiindakkala kuli Leza kusikila sunu.” 2Amvwe boobo mupaizi mupati Ananiyasi wakalailila aabo bakaimvwi aafwiifwi a Paulu kuti bamuume kumulomo. 3Paulu wakati, “Ncobeni ayebo Leza ulakuuma, yebo obwaanda bulambidwe mulambo uutuba! Ulayanda kundibeteka ku Mulawo, pele watyola Mulawo kwiindilila mukulailila kuti ngumwe!”
4Lino bantu bakaimvwi kufwiifwi a Paulu bakati kulingwe, “Yebo, utukila mupaizi mupati wa Leza!”
5Paulu wakaingula kuti, “Nsiindazi, nobakwesu, kuti ngomupaizi mupati. Nkaambo Malembe alati, ‘Toelede kwaamba zyabubi bwamuleli wabantu bako.’”
6Lino Paulu naakabona kuti bantu bamwi oomo bakali Basaduki abamwi bakali Bafalisi, wakaamba canguzu wati, “Nobakwesu, mebo ndili Mufalisi, mwanaa Mufalisi. Ndabetekwa aano nkaambo ndijisi lulangilo lwakuti bafu bayoobusigwa kubuumi!”
7Mbwaakaambila buyo oobo, Bafalisi a Basaduki bakatalika kukwankwana mulicabo, nkaako nkamu yakaandaana. 8(Nkaambo balo Basaduki baamba kuti bantu tabakooyoobusigwa kuzwa kubafu, alimwi akuti taakwe bangelo pe, niiba myuuya, pele Bafalisi balazizumina eezi zyoonse zintu zyotatwe eezi kuti mpozili.) 9Aboobo kuyobeka kwakaindilila. Mpoonya bamwi bamayi ba Mulawo, aabo bakali bankamu ya Bafalisi, bakaima akukazya canguzu bakati, “Taakwe acomwe cintu cibi ncitwajana mumuntu ooyu! Antela muuya umwi naba mungelo nguwakaamba ncobeni kulinguwe!”
10Bakakazyanya kapati cakuti mweendelezi wabasilumamba wakayoowa kuti bantu balakwamauna Paulu, aboobo wakalailila basilumamba bakwe kuti banjile mukati kankamu yabantu bakagwisye Paulu kuzwa mukati kabo, akuti bamutole muŋanda yabo.
11Masiku aayo ngoonya Mwami wakazooima munsi lya Paulu akuti kulinguwe, “Koba aacamba! Wandaambilizya muno mu Jelusalemu amwalo mu Loma ukacite mbubonya.”
Makanze aakujaya Paulu
12Nibwakaca, Bajuda bamwi bakabungana antoomwe akubamba nzila yambuli mbobeelede kucita Paulu. Bakakonkezya kuti tabakoolya akunywa cintu nociceya mane do bajaye Paulu. 13Bakali bantu baindilila kumakumi one bakabamba makanze aaya antoomwe. 14Mpoonya bakaya kubapaizi basilutwe akubapati akuti kulimbabo, “Twakonkezya kuti tatukooyoolya cintu mane tujaye Paulu. 15Nkaako lino nywebo, antoomwe abasinkuta boonse, amutumine kumweendelezi wabasilumamba kuti alete Paulu kulindinywe, mumucenge kuti muyanda kutola makani aabwini kuzwa kuli Paulu. Swebo tunoolibambide kale kumujaya katana akusika ooko.”
16Pele mujwaa Paulu, mulombe wakaamvwa makanze aabo, aboobo wakainka waakunjila muŋanda mwakali Paulu, waakumwaambila makanze aayo. 17Mpoonya Paulu wakaita umwi wabasilumamba, wamwaambila kuti, “Atole mulumbe ooyo kumweendelezi wabasilumamba. Ujisi makani aakumwaambila.” 18Silumamba wakabweza mulombe akumutola kumweendelezi wabasilumamba. Akasike wati kulinguwe, “Mwaange Paulu walindiitide akundikumbila kuti ndilete mulombe ooyu kulindinywe nkaambo ulaakakwaamba kulindinywe.”
19Mweendelezi wakajata mulombe kukuboko akumutola kumbali, mpoonya wakamubuzya kuti, “Ngaayo ngakuti nzi?”
20Mulombe wakati, “Bajuda bamwi bazuminana kuti baze kulindinywe juunza akuzoomwaambila kuti mukamutolelele Paulu kuli basinkuta. Bazoomucenga nywebo kuti baciyanda kumvwisya kapati zyakaambo kakwe. 21Pele mutazoobazuminini, nkaambo kuli baalumi bainda kumakumi one bayooyubilila munzila kulindila Paulu. Boonse bakonkezya kuti tabakoolya nikuba kunywa mane bajaye Paulu. Lino buya balilibambilide kale kucita oobo, balindila buyo mbomuzookosola nywebo.”
22Eelyo mweendelezi wabasilumamba wakati kumulombe, “Utaambili muntu uumbi kuti wandizibya makani aaya.” Mpoonya wakamuleka mulombe, wabweeda.
Paulu mbwaakatolwa kumweendelezi Filikisi
23Lino mweendelezi wabasilumamba wakaita balupati-pati bobilo akuti kulimbabo, “Amubambe basilumamba bali myaanda yobilo baye ku Sizaliya, antoomwe abasimabbiza bali makumi aali ciloba, alimwi abasimasumo bali myaanda yobilo, balibambe kweenda sunu masiku ciindi ncobamana kulalila bantu. 24Mumubambile mabbiza awalo Paulu, mukamusiye kabotu kumweendelezi wacisi Filikisi.” 25Mpoonya mweendelezi wabasilumamba wakalemba lugwalo luti:
26“Ndime Kilaudiyasi Lisiyasi ndilembela ndinywe nomulemekwa ba Filikisi. Ndamujuzya. 27Bajuda bakajata mwaalumi alimwi bali kuyanda kumujaya. Nindakaziba kuti wakali Muloma, ndakainka abasilumamba bangu kuyoomuvuna. 28Ndakali kuyanda kuziba kaambo nkibakamupede, aboobo ndakamutola kunkuta yabo. 29Ndakajana kuti taakwe cintu ncaakacitide ceelede kuti ajaigwe nikuba kuti abikkwe muntolongo, mulandu ngobakali kumupa wakali wamibuzyo yazyamilawo yabo. 30Nkabela nindakaambilwa kuti Bajuda bakanza kumujaya, ndakayeeya kuti ndimutumine kulindinywe. Ndakaambila aabo basikumupa kaambo kuti bazooambe mulandu wakwe kulindinywe.”
31Basilumamba bakacita mbuli mbobakalaililwa. Bakatola Paulu akuyoomusisya kumunzi wa Antipatilisi masiku aayo ngoonya. 32Buzuba bwakatobela basilumamba baansi bakapilukila nkobakkala akusiya basimabbiza kuti kabaciya a Paulu. 33Balo bakaakumusisya ku Sizaliya akuyoopa lugwalo kumweendelezi wacisi, bakasiya Paulu mumaanza aakwe. 34Mweendelezi wakabala lugwalo, amane wabuzya Paulu kuti naa wakali kuzwa kulubazu nzi lwacisi. Naakajana kuti uzwa ku Silisiya 35wakati, “Ndizookumvwa basika basimulandunyoko.” Mpoonya wakalailila kuti Paulu akwabililwe abasilumamba akubikkwa mumaanda aakasiya mwami Helodi.
Currently Selected:
Milimo 23: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
