2 Samuyele 22
22
Intembauzyo ya Devedi
(Intembauzyo 18)
1Lino Devedi wakaimbila Mwami Leza lwiimbo oolu buzuba oobo Mwami Leza naakamuvuna kuzwa kuli basinkondonyina boonse akuzwa kuli Saulu, 2Wakati,
“Mwami Leza ngomwaala ncecisitilizyo cangu cindivuna.
Ngonguwe ndomba, mayubilo aangu.
3Ulandifutula anguzu zyakwe,
nentobo acikwabilizyo cangu.
Nimpangala yangu alimwi ngamayubilo aangu.
Muvuni wangu uundivuna kuzwa kumapyopyongano.
4Ndamwiita Mwami Leza ulandifutula kuzwa kuli
basinkondoma, nkaako aalumbaizigwe Mwami Leza.
5Mayuwe aalufu akandizinguluka.
Fwipi-fwipi lyamaanzi aanyonyoona lyakandifwasukila.
6Zyandizinguluka ŋonzi zyakwacivumwe,
kundiboolela tukole twalufu.
7Mumapenzi aangu ndakalilila Mwami Leza,
ndakalilila Leza wangu kuti andigwasye,
wakamvwa jwi lyangu kuzwa kuŋanda yakwe,
wakakuswiilila kulila kwangu kwalugwasyo.
8Yakazyangama akuzungaana nyika,
ntalisyo zyakujulu zyakatenkaana,
zyakayuntaana nkaambo Leza wakanyema.
9Kwakali kuunta busi mumpemo zyakwe,
mulilo uusyukuta wakalikuvwilima mukanwa mwakwe,
mulinguwo mwakali kuzwa makala aasalala.
10Wakaandula julu, waza ansi,
kunsi lyamaulu aakwe kwakali makumbi aasiya.
11Wakatanta bakelebu wauluka,
amababa aaluuwo wapeeluka.
12Musinze wakali muvumbilide,
akalimuzingulukide makumbi mapati,
makumbi mapati aazwide maanzi.
13Mukubala kwakwe muzwa ndabo.
14Wakazuma kuzwa kujulu Mwami Leza,
Sijulu lyamajulu wakandindima.
15Basinkondonyina bakamwaika naakafusa mivwi yakwe,
zyakabatandaanya ndabo mpati.
16Tako lyalwizi lyakalibonya,
ntalisyo yanyika yakakkala aatuba,
eeci cakali ciindi nookatapatila basinkondonyoko,
ciindi muuya wamumpemo zyako nuwakabafula.
17“Kuzwa kujulu Mwami Leza wakalandabika janza,
wandijata akundinuna kuzwa mumaanzi malamfu.
18Kuzwa kuli basinkondoma basinguzu wakandivuna,
kundivuna, iiyi, kuzwa kulibaabo
bandilwana balaanguzu kwiinda ndime.
19Nkelaapenzi bakandilwana,
pele Mwami Leza wakandikwabilila.
20Abusena bubotu mpaakandibikka,
cakamubotela kuti andivune.
21“Bweelede bululami bwangu mbwaandicitila Mwami Leza,
mukuti nsijisi kaambo wandilumbula.
22Nzila zya Mwami Leza zyebamba lyoonse,
nsiindakabisya kwiindila mukusiya Leza wangu.
23Milawo yakwe njindakaswiilila lyoonse,
malailile aakwe nsiindakaasusya pe.
24Nsijisi kampenda kulinguwe,
ndalibamba kuzwa kububi.
25Kweendelana abululami bwangu,
Mwami Leza wandilumbula.
Mukuti nsijisi kaambo kulinguwe, wandipa bweelede.
26Kulibaabo bakusyoma,
O Mwami Leza, ulasyomeka.
Ubacitila kabotu aabo banyina kampenda.
27Zisalala zyocitila baabo balondokede,
pele bapilingene ulibacenjelede.
28Mwami Leza ufutula babombede,
pele balisumpula ulababombya.
29Nduwe lambe lyangu, yebo O Mwami Leza,
mudima nduwe oousandula kuti ube mumuni.
30Ndilakonzya kulwana mpi niiba buti nondigwasya,
zikwabilizyo zyabo ndazipola.
31Nzila zyakwe zililondokede,
aalo majwi aakwe alasyomeka,
nentobo yabaabo bayubila mulinguwe.
32“Alikke Mwami Leza ngo Leza,
mwaala wakuyubila kunze lyakwe taaku.
33Ooyu Leza ngamayubilo aangu mayumu,
nguupa kuti nzila zyangu zilondoke.
34Maulu aangu waayumya mbuli aanjeleele,
nimuba mumajeleele ndakonzya kwiima.
35Ngonguwe uundiiisya kulwana nkondo,
ndakonzya kufusa abuta bwamukuba.
36Antobo yako yalufutuko ulandisinkilizya,
janza lyako lyalulyo lilandikwabilila.
37Nzila yangu nguuikwakwabula, kuti intabi nesyikuka.
38Ndakali kubeenzya basinkondoma ndabatandaanya,
ndakali kubazunda, nsiindakali kupiluka
kusikila ndabanyonyweeda limwi.
39Ndakabapwayaula cakuti tiibakabuka limbi pe,
amaulu aangu ndemwini ndakabalyatauka.
40Nguzu zyakulwanya nkondo nguwakandipa,
nguwakapa kuti nnzunde basinkondoma.
41Nguwakacitya kuti basinkondoma banditije,
bandicimwa ndakabanyonyweeda limwi.
42Bakalangaula lugwasyo,
wakakonzya kubagwasya taakwe pe,
akaka doono ku Mwami Leza,
pele taakwe naakabavuna pe.
43Ndakabaziya baba mbuli lusuko,
mbuli ntimba munzila mbundakabadyaminina.
44“Kuzwa kulibaabo bakali kundilwana wakandivuna,
nduwe wakapa kuti ndilele zisi zyoonse,
mpaawa kwandibelekela bantu mbindatakazi.
45Majwi aangu balaaswiilila mbubaamvwida buyo,
cakuyoowa bamasi balandikotamina.
46Balatuntuma kalibalekede,
balaza kuzwa muziyubilo zyabo.
47Mwami Leza muumi.
Mukuti ngomwaala mupati uundikwabilila aalemekwe,
abwaambilizigwe bupati bwa Leza uundivuna.
48Nguundibwedezezya basinkondoma,
nguundizundila bazwa masi.
49Kuzwa kuli basinkondoma nguundifutula,
nguwandizundya basinkondoma,
kuzwa kulibaabo bapyopyongene wandivuna.
50Nkaako O Mwami Leza njookulumbaizya kubazwa masi,
munyimbo njoolumbaizya zina lyako.
51Nduwe oopa kuti mwami wako azunde,
nduwe ooyandisisya munanike wako
Devedi alunyungu lwakwe kwa lyoonse a lyoonse.”
Currently Selected:
2 Samuyele 22: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
