2 Samuyele 20

Buzangi bwa Syeba

1Lino kwakali muntu umwi mubi, wakali kutegwa Syeba mwana mulombe wa Bikili Mubenjamini. Eelyo wakasiba mweembo akupozomoka wati, “Swebo tatukwe ncotujisi muli Devedi, alimwi tatujisi lukono mumwanaa Jese. Muntu amuntu wa Isilayeli abweede kuŋanda yakwe.” 2Aboobo Baisilayeli boonse bakasiya Devedi, batobela Syeba mwanaa Bikili. Pele bantu ba Juda bakatobela mwami wabo akweenda anguwe kuzwa ku Jolodani kuyoosika ku Jelusalemu.

3Lino Devedi wakasika kuŋanda yakwe ku Jelusalemu, ooko nkwaakabweza bamwanakasuwa bakwe bali kkumi mbaakasiide kuti kabalanga ŋanda, wakabajalila muŋanda imwi akubikka mulindizi. Pele mwami taakwe naakali kubasandukila pe. Bakalijalilidwe mane do kusikila kulufu lwabo, bakalikkede mbuli bamukabafu.

4Mpawo mwami wakati kuli Amasa, “Kondiitila bantu ba Juda kuzwa mumabbazu otatwe, wamana ayebo ube waano.” 5Aboobo Amasa wakainka kuyooita ba Juda, pele wakamuka taakasika muciindi ncaakaambilidwe. 6Devedi wakati kuli Abisyayi, “Wabona Syeba mwanaa Bikili ulatubisizya kwiinda Abisalomu. Tola basinkondo bangu, umutandile atatoli minzi iili aankwakwa, akutukatazya.” 7Aboobo basinkondo ba Jowabu, Bakeleti, Bapeleti antoomwe abaalumi basinguzu bakainka kabasolwedwa a Abisyayi, kuya ku Jelusalemu kutandila Syeba mwanaa Bikili. 8Nibakasika kubbwe pati lyaku Gibiyoni, Amasa wakaboola kuzoobacingauzya. Lino Jowabu wakasamide cibaki cabusilumamba, nkabela atala lyaco kwakali lutambo apanga mucikanda calyo, ciindi naakaya kumbele lyakasomoka lyawida aansi. 9Mpawo Jowabu wakati kuli Amasa, “Uli kabotu, mukwesu?” Mpoonya Jowabu wakajata Amasa kucilezu ajanza lyakwe lyalulyo kuti amumyonte. 10Pele Amasa taakwe naakabika moyo kupanga lyakali mujanza lya Jowabu pe. Aboobo Jowabu wakamuyasa andilyo mwida, mpoonya mala aa Amasa akafwasuka, taakamuyasa lwabili pe, wakafwa. Mpoonya Jowabu a Abisyayi munyina bakatobela Syeba mwanaa Bikili. 11Umwi wabantu ba Jowabu wakaima munsi lya Amasa akwaamba kuti, “Kufumbwa ooyo uuyanda Jowabu alimwi kufumbwa ooyo uuyanda Devedi, atobele Jowabu.” 12Amasa wakali kulikanda mubulowa akati kanzila. Lino muntu ooyo naakabona kuti bantu boonse baliimvwi, wakamugwisya Amasa munzila, wakamutola musokwe akumuvumba cibaki, nkaambo wakabona kuti kufumbwa bantu basika balaima aawo. 13Nkabela naakamana kumugwisya munzila, bantu boonse bakainda kumbele kutobela Jowabu kuyootobezya Syeba mwanaa Bikili.

14Syeba wakainda mumisyobo yoonse ya Isilayeli mane waakusika ku Abelabetimaaka. Abalo bana balombe bakwe bakabungana akumutobela. 15Mpawo bantu boonse bakali a Jowabu bakasika akumuzinguluka ku Abelabetimaaka. Bakalundika citantaulu cavu kumbali abwaanda, mane ceelana abulamfu bwabwaanda. Bakatalika kuuma bwaanda kuti buwe. 16Mpoonya umwi mukaintu musongo wakoongolola kuzwa mumunzi kuti, “Amuswiilile, amuswiilile. Amwaambile Jowabu kuti aboole kuno ndaambaule anguwe.”

17Eelyo wakasika Jowabu kumukaintu ooyo, mukaintu wakati, “Sena ndonduwe Jowabu.”

Jowabu wakaingula kuti, “Iiyi ndendime.” Mpoonya mukaintu wakamwaambila kuti, “Swiilila majwi aamubelesi wako.” Walo wakaingula kuti, “Ndiswiilide.”

18Mukaintu wakati, “Kale-kale kwakaambwa kuti, ‘Amubaleke batazi cakucita bakabuzye maanu ku Abela.’ Oobu mbubakali kubamba makani. 19Ndiswe basiluumuno basyomeka mu Isilayeli wamana uyanda kunyonyoona munzi, walo uuli ngobanyina Muisilayeli. Ino nkaambo nzi noyanda kutunyonyoona swebo tolukono lwa Mwami Leza?”

20Mpawo Jowabu wakaingula kuti, “Peepe, takuli boobo. 21Tacili camasimpe pe. Mwaalumi uuzwa kucisi catulundu-lundu ca Efulemu uutegwa Syeba mwanaa Bikili, wakabukila mwami Devedi. Amutupe ooyo alikke buyo, eelyo tulazwa mumunzi.”

Mpoonya mukaintu wakati kuli Jowabu, “Linda tulawaala mutwe wakwe anze lyabwaanda.” 22Eelyo mukaintu wakainka kubantu boonse mubusongo bwakwe. Mpawo bakakosola mutwe wa Syeba mwanaa Bikili akuusowela anze kuli Jowabu. Aboobo Jowabu wakasiba mweembo, eelyo bakazwa kumunzi ooyo, bapilukila kumaanda aabo. Aawo Jowabu wakapiluka ku Jelusalemu kumwami.

Basinkuta ba Devedi

23Jowabu wakali ngosilutwe wabasilumamba ba Isilayeli. Benaiya mwanaa Johoiyada wakali silutwe wa Bakeleti, a Bapeleti. 24Adonilamu wakali ngosikubelesya basicibbalo, Jehosyafati mwana wa Ahiludi wakali mulembi wamakani aabwami. 25Syeva wakali mulembi, ba Zadoki a Abiyata bakali bapaizi, 26awalo Ila Mujaili wakali mupaizi wa Devedi.

Currently Selected:

2 Samuyele 20: Tonga96

Highlight

Copy

Compare