2 Samuyele 2
2
Devedi mbwaakaba mwami wacisi ca Juda
1Lino makani aaya naakamana, Devedi wakabuzya Mwami Leza kuti, “Sena ndipiluke akuyooendelezya munzi umwi wa Juda?” Mwami Leza wakati, “Iiyi koya.” Aawo Devedi wakabuzya kuti, “Ino ndiye kuli?”
Mwami Leza wakati, “Koya ku Hebuloni.” 2Aboobo Devedi wakainka nkuko antoomwe abakaintu bakwe bobilo, Ahinowamu waku Jezuliili a Abigelo mukamufu Nabali waku Kaameli. 3Devedi wakaletelezya boonse mbaakali aabo, umwi aumwi amukwasyi wakwe, baakukkala kuminzi ya Hebuloni. 4Aawo bantu baku Juda bakasika, bananika Devedi ooko kuti abe mwami wabo.
Ciindi Devedi naakamvwa kuti, “Bantu baku Jabesyi Giliyadi mbibakazikka Saulu.” 5Wakatuma mulomo kubantu baku Jabesyi Giliyadi wakuti, “Mwami Leza amuleleke, nkaambo mwakasyomeka nimwakazikka mwami wanu Saulu. 6Lino Mwami Leza amutondezye luyando lwakwe lutamani. Mebo njoomucitila bubotu nkaambo kaceeci. 7Nkaako amube basicamba, mube basinguzu, Saulu mwami wanu wakafwa, nkaako ba Juda bakandinanika kuti ndibe mwami wabo.”
Isyibosyeti wananikwa bwami bwa Isilayeli
8Lino Abina mwanaa Nee, silutwe wabasilumamba ba Saulu, wakanjizya Isyibosyeti mwanaa Saulu, wamuleta mutalaa Jolodani ku Mahanaimu. 9Wakamubikka kuti abe mwami waku Giliyadi, Asyu, Jezuliili, Efulemu, Benjamini a Isilayeli yoonse. 10Isyibosyeti wakalijisi myaka iili makumi one ciindi naakatalika kulela mu Isilayeli, nkabela wakalela kwamyaka yobilo. Pele Bajuda bakatobela Devedi. 11Devedi wakali mwami wa Juda kwamyaka iili ciloba acisela.
Inkondo akati ka Isilayeli a Juda
12Lino Abina abasinkondo ba Isyibosyeti bakazwa ku Mahanaimu baya ku Gibiyoni. 13Jowabu mwanaa Zeluiya abasinkondo ba Devedi bakainka kuyooswaangana ambabo kuziba lya Gibiyoni, bakakkala ansi, bamwi kubbazu limwi lyaziba abamwi kubbazu limwi. 14Mpoonya Abina wakati kuli Jowabu, “Bakubusi banu abanyamuke balwane tweebele.”
Jowabu wakati, “Mbubo, banyamuke.”
15Mpoonya bakanyamuka, nkabela kwakasalwa akati kabamusyobo wa Benjamini bali kkumi ababili kuti babe ba Isyibosyeti mwanaa Saulu, akwalo kubbazu lya Devedi kwakasalwa bali kkumi ababili. 16Bakubusi aaba bakajata kumitwe umwi aumwi bayasana mapanga mumbazu bawa bbu bafwa! Ncenciceeci busena oobo ncobwiitwa kuti Muunda wamapanga.
17Mubuzuba oobo nkondo yakabbebba, Abina abantu ba Isilayeli bakazundwa abasilumamba ba Devedi. 18Bana ba Zeluiya botatwe bakali kooko mbaa: Jowabu, Abisyayi, a Asaheli. Asaheli wakali aluno mbuli lubondwe. 19Nkabela wakatandaanya Abina, katalangi lubazu lumwi ugeme buyo Abina. 20Abina wakacebuka musule akuti, “Sena nduwe Asaheli?”
Walo wakaingula kuti, “Iiyi ndime.”
21Abina wakati kulinguwe, “Leela kumwi ukajate umwi wabalombe, ukatole zilwanyo zyakwe.” Pele Asaheli taakwe naakaleya pe. 22Alimwi Abina wakati kuli Asaheli, “Leka kunditanda. Sena ncibotu kuti nkuumine ansi? Ino tukalangane buti amupati wako Jowabu?” 23Nikubaboobo Asaheli wakakaka kwiinda kumbali, nkaako Abina katija wakayasa Asaheli sumo mubula mane lyakapolela anze kumusana. Asaheli wakawa mpoonya aawo akufwa. Boonse bakasika abusena akafwida Asaheli, bakaima.
24Jowabu a Abisyayi bakamutobela Abina, lino zuba kaliya kumabbililo bakaakusika kucilundu ca Ama cili kumbele lya Giya munzila iiya kunkanda ya Gibiyoni. 25Ooko Babenjamini bakabungana kuti bagwasye Abina akuba mpi yomwe, kabali acilundu. 26Mpoonya Abina wakoongolweda Jowabu wati, “Sena katunoojayana lyoonse? Sena tozi kuti mamanino ayoolula? Ino ulabalesya lili kutandaanya banabokwabo?”
27Mpawo Jowabu wakati, “Mbubonya mbuli Mwami Leza mbwali muumi, kuti nootaamba bantu bangu nibataleka kutanda banabokwabo kusikila cifumo-fumo. 28Mpoonya Jowabu wakasiba mweembo, eelyo bantu bakwe bakaima baleka kutanda Baisilayeli, nkondo yakamana.”
29Abina abantu bakwe bakeenda masiku oonse mane bakainda mukkuti lya Jolodani, bakazubuka mulonga wa Jolodani, bainda moonse mu Bitiloni mane baakusika ku Mahanaimu. 30Jowabu wakapiluka kuzwa kukutandaanya Abina, lino ciindi naakabunganya bantu antoomwe kwakajanika kuti takuwo basilumamba ba Devedi bali kkumi afuka, kubalilizya a Asaheli. 31Bantu ba Devedi bakajaide basilumamba ba Abina bali myaanda yotatwe amakumi aali cisambomwe bamusyobo wa Benjamini. 32Aawo bakabweza Asaheli akuyoomuzikka mucuumbwe cawisi cakali ku Betelehemu. Jowabu abantu bakwe bakeenda masiku oonse, nibwakaca cifumo-fumo bakasika ku Hebuloni.
Currently Selected:
2 Samuyele 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
