2 Samuyele 1
1
1Lino mwami Saulu naakafwa, Devedi wakapiluka kukuzunda Baameleki, eelyo wakakkala mumunzi wa Zikilagi kwamazuba obilo. 2Nkabela mubuzuba bwatatu kwakasika mwaalumi kuzwa kucivuka cakali ca Saulu, azisani zidelaukide alimwi kalizilide mulambo kumutwe. Naakasika kuli Devedi, wakaliwaala ansi akumulemeka, 3mpawo Devedi wakati kulinguwe, “Ino wazwida kuli?”
Wakaingula kuti, “Ndaloboka kuzwa kuzivuka zya Baisilayeli.” 4Mpoonya Devedi wakamubuzya kuti, “Kondaambila ncinzi cacitika?” Walo wakati, “Bantu Baisilayeli batija kuzwa kunkondo, alimwi bunji bwabo bajaigwa, awalo mwami Saulu a Jonatani mwanaakwe bafwa.”
5Mpoonya Devedi wakati kumwaalumi ooyo, “Uzi buti kuti Saulu a Jonatani bafwa?”
6Mwaalumi ooyo wakati, “Mebo ndali acilundu ca Gilibowa, ooko ndabona Saulu kayaamine sumo lyakwe, eelyo basinkalaki abasimabbiza ba Bafilisiti bakalimuccilide. 7Naakacebauka, akubona ndime wakandiita. Mpawo ndakaingula kuti, ‘Mwami.’ 8Eelyo wakati, ‘Nduweni?’ Lino ndakamwiingula kuti, ‘Ndili mu Ameleki.’ 9Mpawo wakati kulindime, ‘Swena afwiifwi undijaye ndalicisa kapati, nikuba boobo ndicili muumi.’ 10Aboobo ndakaswena kumbali aanguwe ndamujaya. Nkaambo ndakaziba ncobeni kuti mbwatiwide takoobuka, mane ndakabweza musini wakali amutwe wakwe ankaya yakali kukuboko kwakwe, lino ndazileta kuno kulinduwe, O mwami wangu.”
11Mpoonya Devedi wakadelaula zisani zyakwe, abalo mbaakali aabo bakacita mbubonya. 12Bamane bakalila akuliimya kulya mane do nikwakaba kumangolezya, nkaambo ka Saulu a Jonatani mwanaakwe antoomwe a Baisilayeli bantu ba Leza mukuti bunji bwabo bakajaigwa munkondo.
13Lino Devedi wakabuzya mwaalumi ooyo wakamwaambila makani kuti, “Ino uzwa kuli?”
Mpawo wakaingula kuti, “Ndimweenzu Muameleki.”
14Kumane Devedi wakamubuzya alimwi kuti, “Ino mbuti mbootakayoowa kujaya munanike wa Mwami Leza?” 15Aawo Devedi wakaita umwi wabaalumi akumwaambila kuti, “Mujaye.” Mpoonya wakamuuma amutwe wafwa. 16Nkabela Devedi wakamwaambilide kuti, “Bulowa bwako bube amutwe wako, walijazya omwini kayi mulomo wako nguwakupezya mulandu, nooti, ‘Ndajaya munanike wa Mwami Leza.’”
Devedi mbwaakalila Saulu a Jonatani
17Mboobu Devedi mbwaakalila Saulu a Jonatani mwanaa Saulu. 18Wakati oolu lwiimbo lwabuumba luleelede kuiigwa abantu ba Juda. Ndoolu mbuli mbolulembedwe mubbuku lya Jasya. Wakati,
19“Bulemu bwako, Isilayeli, bwazimaana muzilundu.
Ma! basinguzu bafwa buti!
20Mutacaambi mu Gati,
mutamwayi makani mumigwagwa ya Asyikeloni,
kuti bakaintu ba Bafilisiti batatangali,
kuti bakaintu babatapalwidwe batasekeleli pe.
21“Nywebo nozilundu zya Gilibowa,
mutawidwi mume niiba mvula.
mutabi aamyuunda iizyalisya micelo!
Nkaambo ooko ntobo yabasinguzu nkuyakasampwidwa,
ntobo ya Saulu tiicinanikwi mafuta.
22Jonatani wakali kujaya basinkondonyina
banji-banji abuta bwakwe.
Awalo Saulu wakali kujaya basinguzu apanga lyakwe.
23“Saulu a Jonatani mbayandwi babotu!
Mubuumi amulufu taakwe nibakaandaana pe.
Bakali kufwambaana kwiinda basikwaze,
bakalijisi nguzu kwiinda basyuumbwa!
24“Nywebo nobakaintu bamu Isilayeli, amumulile Saulu,
Mwakalikusama zisani zyeebesi zisalala pyu.
Ede ngonguwe wakapa kuti musame zyeebesi zyakabikkidwe ngolida.
25“Ma! Basinguzu bafwa buti munkondo!
Jonatani wajaigwa mumasena aanu muzilundu.
26Moyo wangu waatikila akaambo kamukwesu Jonatani,
wakali kundibotezya kapati!
Luyando lwakwe kulindime lwakali kugambya,
lwakali kwiinda niluba luyando lwabakaintu.
27“Ma! Basinguzu bafwa buti,
zilwanyo zyabo zyanyonyoonwa.”
Currently Selected:
2 Samuyele 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
