2 Samuyele 16
16
Devedi a Ziba
1Lino Devedi naakainda kumbele buniini kuzwa atala aacilundu, Ziba mubelesi wa Mefibosyeti wakaswaangana anguwe, ambongolo zyobilo zyakaangidwe kale zyuuno, kumwi kaziyumwide zinkwa zili myaanda yobilo, zikama zyansaansa ziyanikidwe zili mwaanda, zibunge zyankuyu zili mwaanda, alimwi ankomo yawaini. 2Mwami wakabuzya Ziba kuti, “Ino waziletela nzi eezi?”
Ziba wakaingula kuti, “Mbongolo nzyakutanta bamukwasyi wamwami, zinkwa amicelo nzyabasinkondo kuti balye awalo waini ngwakunywa aabo bakatala munkanda.”
3Mpawo mwami wakati, “Ino Mefibosyeti muzyukulu wa Saulu simalelo wako uli kuli?”
Ziba wakati kumwami, “Bona, ulikkede mu Jelusalemu nkaambo wakati, ‘Cino ciindi Baisilayeli balandipilusizya bulelo bwasyaanene.’”
4Mpoonya mwami Devedi wakati kuli Ziba, “Bona, zyoonse zyakali zya Mefibosyeti, lino zyaba zyako.”
Ziba wakati, “Ndakomba kondibeda aaluse lyoonse, o mwami simalelo wangu.”
5Ciindi mwami Devedi naakasika ku Bahilimu, kwakasika mwaalumi umwi wamukwasyi waciinga ca Saulu, wakali kutegwa Syimeyi mwana mulombe wa Gela, kaza buza wakali kusinganya mwami. 6Alimwi wakafusa mabwe kuli Devedi akuli balupati-pati bakwe boonse, nikuba kuti balindizi abasilumamba bakazingulukide mwami. 7Ciindi Syimeyi naakali kutukila wakali kuti, “Kozwa, kozwa, yebo omujayi, omuntu mubi! 8Mwami Leza wabweedezya mulandu wabujayi bwako kumukwasyi wa Saulu, ooyo ngookanyanga bwami. Ino ncili Mwami Leza wapa mumaanza amwanaako Abisalomu bulelo. Bona lino mapenzi akusikila, nkaambo uli mujayi.”
9Aawo Abisyayi mwanaa Zeluiya wakati kumwami, “Ino nkaambo nzi eeci cibwa cifwide nocisinganya mwami simalelo wangu? Nkoo nduunke mebo nkacizutule mutwe.”
10Pele mwami wakati, “Peepe, tabusyi oobo nobana ba Zeluiya! Ooyu uusinganya ndiza Mwami Leza nguwamwaambila kuti, ‘Singanya Devedi.’ Ino nguni uunga wabuzya kuti, ‘Nkaambo nzi ncoocita obuya?’” 11Mpoonya Devedi wakati kuli Abisyayi akubabelesi bakwe boonse, “Amubone, mwanaangu ndemwini wamuŋanda nguuyanda kundijaya, ino mwati cilaba buti ku Mubenjamini ooyu. Amumuleke buyo, kasinganya, ambweni Mwami Leza nguwamulailila. 12Ambweni inga cilaba kuti Mwami Leza ulabona mapenzi aangu aakuti uyoondiboozezya bubotu akaambo kakusinganyizigwa ooku.” 13Aboobo Devedi abantu bakwe bakali kuya bweenda munzila, awalo Syimeyi keenda kunselelo lyacilundu kubbazu limwi, ooku kasinganya akufusa mabwe kumwi kalundumuna lusuko. 14Mwami Devedi abantu boonse aabo mbaakali aabo, bakasika kabakatede ku Jolodani, eelyo ooko nkukonya wakalyookezya.
Abisalomu mu Jelusalemu
15Lino Abisalomu a Baisilayeli boonse bakali aanguwe nibakasika ku Jelusalemu, Ahitofeli wakali aambabo. 16Nkabela Husyayi Muanaki, mweenzinyina Devedi, wakasika kuli Abisalomu, mpoonya wakati kulinguwe, “Aongole mwami! Aongole mwami!”
17Abisalomu wakati kuli Husyayi, “Ino wamulekela nzi mweenzinyoko? Ino nkaambo nzi nootakainka anguwe?”
18Husyayi wakati kuli Abisalomu, “Peepe, nkaambo ooyo wasalwa a Mwami Leza, abantu boonse Baisilayeli, ndiyooba wakwe akukkala anguwe. 19Alimwi, ino nguni ngwetimanine milimo? Njelede kumanina mwana. Mbubonya mbuli mbwindakamanina uso, ayebo mbwetikumanine milimo.”
20Mpoonya Abisalomu wakati kuli Ahitofeli, “Tulailile, ino tweelede kucita buti?”
21Mpawo Ahitofeli wakati kuli Abisalomu, “Konjila kuli bamwanakasuwa bauso, aabo mbaakasiya kuti kababamba ŋanda. Baisilayeli boonse mbobatikavwide bayooziba kuti wabasinkondonyina uso, eelyo bantu boonse aabo mboli aabo bayooyuma-yuma.” 22Mpawo bakabambila Abisalomu tente atala aalululi, eelyo Abisalomu wakanjila kuli bamwanakasuwa bawisi Baisilayeli boonse kababwene.
23Malailile aakapa Ahitofeli akali mbuli kuti majwi aazwa kuli Leza wini. Mbombuboobu malailile aa Ahitofeli mbubakali kwaaswiilila boonse bobilo Devedi a Abisalomu.
Currently Selected:
2 Samuyele 16: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
