2 Samuyele 15
15
Abisalomu mbwaakazangila mwami
1Bweende-bweende Abisalomu wakalijanina nkalaki amabbiza abasinkondo bali makumi osanwe bazuzaana kumbele lyakwe. 2Nkabela Abisalomu wakali kunga wabuka cifumo-fumo ulaima kumbali aanzila kumanjililo, eelyo kufumbwa muntu wakali kusika kumwami akaambo kakutongooka, Abisalomu wakali kumwiita akubuzya kuti, “Ino wazwida kumunzi nzi?” Nkabela aamba kuti, “Mubelesi wako ngwamusyobo uuli bobuya mu Isilayeli.” 3Abisalomu wakali kuti, “Bona, makani aako ali kabotu alimwi aliluleme, pele mwami taakabika muntu wakuswiilila matongoosi aanu pe.” 4Abisalomu wakali kwiindilizya akuti, “Akaka, nikwali kuti ndendime mubetesi, nikwali kunga muntu woonse uuli aamulandu naa matongoosi asika kulindime ndamubeteka buluzi.” 5Kwakali kunga muntu aswena afwiifwi kuzoomulemeka, wakali kutandabika maanza wamujata akumumyonta. 6Mbombuboobu Abisalomu mbwaakali kucitila Baisilayeli boonse bakali kusika kumwami kuzoobetekwa, nkaako Abisalomu wakabatola myoyo Baisilayeli.
7Nikwakamana myaka yone Abisalomu wakati kumwami, “Nkoo nduunke nkape cikonke cangu ku Mwami Leza mu Hebuloni. 8Nkaambo mebo ndemubelesi wako ndakakonkezya ciindi nindakacikkede ku Gesyu mu Alamu ndakati, ‘Kuti naa ncobeni Leza akandipilusye kabotu ku Jelusalemu, ndizoomukomba ku Hebuloni.’”
9Mpoonya mwami wakati, “Koya muluumuno.” Aboobo Abisalomu wakanyamuka akuunka ku Hebuloni. 10Nikuba boobo wakatumide bantu cakusisikizya kumisyobo yoonse ya Isilayeli kati, “Mbomuti mvwide buyo mweembo uulila, mwaambe kuti, ‘Abisalomu ngo mwami mu Hebuloni.’” 11Nkabela Abisalomu wakainka abasinkondo bali myaanda yobilo kuzwa ku Jelusalemu bakali kumusindikila kabatazi cakali kucitika. 12Abisalomu naakacili kupa zipaizyo, wakatumina kuyooita Ahitofeli, mulailili wa Devedi uuzwa ku Gilo. Mbombuboobu nkamu yabazangi mbuyakakomena kapati, mbubakali kuyabuvula bantu bakali a Abisalomu.
Devedi mbwaakatija kuzwa ku Jelusalemu
13Lino kwakasika mutumwa kuli Devedi wakati, “Bantu ba Isilayeli baccilila Abisalomu.”
14Mpoonya Devedi wakati kubabelesi bakwe boonse aabo bakali aanguwe ku Jelusalemu, “Amunyamuke tutije, nkaambo ambweni inga taakwe naba omwe uuti zookonzye kutija asika Abisalomu. Amufwambaane kunyamuka atatweenzyi akutuletela bubi anyonyoona munzi woonse apanga.”
15Eelyo babelesi bamwami bakati kulinguwe, “Bona, babelesi bako balilibambilide kucita kufumbwa mwami simalelo wabo ncayeeya.” 16Aboobo mwami wakainka kumbele, abalo bamukwasyi wakwe boonse bakamutobela. Mwami wakasiya bamwanakasuwa bakwe bali kkumi kuti babambe munzi wakwe.
17Lino mwami wakainka, bantu bakwe boonse bakamutobela, bakaakwiima kuŋanda yamamanino. 18Ooko babelesi bakwe boonse nkubakalikwiinda kumbali aanguwe, Bakeleti, Bapeleti, a Bagiti boonse bakali myaanda iili cisambomwe bakamutobela kuzwa ku Gati. 19Mpoonya mwami wakati kuli Itayi Mugiti, “Ino yebo ututobelela nzi? Kobweeda ukakkale amwami uyoolela, nkaambo yebo uli wamasi, alimwi wakatija buya kunyika yako. 20Ookasika jilo, ono sunu inga ndakucita buti kuti uunke andiswe, kakuli ambebo nsizi nkweya? Kobweeda, uunke abasicisinyoko. Mwami Leza akubede aaluse alimwi asyomeke kulinduwe.”
21Itayi wakaingula mwami kuti, “Mbubuli Mwami Leza mbwali muumi amwami simalelo wangu mbwali muumi, kufumbwa ooko mwami simalelo wangu nkwayooba, nikuba kufwa naa buumi, ambebo ndemubelesi wako nkweyooba.”
22Mpoonya Devedi wakati kuli Itayi, “Koya ino, inda kumbele.” Itayi Mugiti wakainda kumbele, walo abantu bakwe boonse amikwasyi yabo. 23Bantu boonse nibakabona mwami abantu bakwe kabainda, bakalila kumane mwami abantu bakwe boonse bakazubuka kalonga ka Kidiloni bagama kunkanda.
24Lino Zadoki a Balevi boonse bakasika, mpoonya awalo Abiyata wakasika. Balevi bakayumwide bbokesi lyacizuminano ca Leza bakalitula kusikila bantu boonse nibakaindilila munzi. 25Mpoonya mwami wakati kuli Zadoki, “Bweedezya bbokesi lyacizuminano ca Leza mumunzi. Kuti naa Mwami Leza andibede aaluse, uyoondiboozya kuzoolibona mbolikkede. 26Pele kuti naa Mwami Leza waamba kuti, ‘Nsiboteledwe anduwe, mbubo citicitike cicitike, eelyo acite kufumbwa cimubotela.’” 27Alimwi mwami wakati kuli Zadoki mupaizi, “Langa nduwe muntu mupati wa Mwami Leza. Lino kobweeda buyo kumunzi muluumuno, yebo a Abiyata abana banu bobilo, Ahimaazi mwanaako, a Jonatani mwana wa Abiyata. 28Bona, njoolindila kuzito zya Jolodani munkanda mane kusikila nkamvwe kuzwa kulinduwe. 29Aboobo Zadoki a Abiyata bakabweedezya bbokesi lyacizuminano ca Mwami Leza ku Jelusalemu akukkala nkukonya.”
30Devedi wakatanta atala aacilundu ca Oliva kaya bweenda amaulu buyo kumwi ulalila, alimwi kalivumbide kumutwe. Abalo bantu boonse bakali aanguwe bakalilivumbide kumitwe kabamutobela ooku kabaya bulila. 31Mwami Devedi wakamvwa kuti, “Ahitofeli uli akati kabazangi ba Abisalomu.” Mpawo Devedi wakati, “O Mwami Leza, ndakukomba, kosandula kulailila kwa Ahitofeli kuti kube kwabufuba-fuba.”
32Devedi naakasika atala aacilundu aawo aakali kukombelwa Mwami Leza, wakabona Husyayi Muanaki kazoomucingauzya acibaki cidelaukide, alimwi kabikkide vu amutwe. 33Devedi wakati kulinguwe, “Bona wanditobela tacikootugwasya pe, 34noopiluka kumunzi ukaambile Abisalomu, kuti ‘Ndaba mubelesi wako, omwami mbubonya mbuli mbundakali mubelesi wauso ciindi cakamana, lino ndaba mubelesi wako.’ Munzila eeyi uyoozunda malailile aa Ahitofeli. 35Kayi Zadoki a Abiyata bapaizi banookkede anduwe kuya? Aboobo kufumbwa ncoyoomvwa kuzwa kuŋanda yabwami, ukaambile Zadoki a Abiyata bapaizi. 36Nkaambo balijisi bana balombe ba: Ahimaazi mwanaa Zadoki, a Jonatani mwana wa Abiyata, aaba mbotinoyootuma kufumbwa ncoomvwa.”
37Aboobo Husyayi mweenzinyina Devedi wakanjila mumunzi ciindi Abisalomu naakali kunjila mu Jelusalemu.
Currently Selected:
2 Samuyele 15: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
