2 Samuyele 13

Aminoni a Tamaa

1Abisalomu mwana mulombe wa Devedi, wakalijisi mucizi mubotu wakali kutegwa Tamaa. Aminoni mwana wamuŋanda imwi ya Devedi wakamuyanda. 2Nkabela Aminoni wakapenga kapati mumoyo, mane limwi wakaciswa nkaambo kakuyeeya mucizi wakwe ooyo, mukuti taakana kwatwa pe. Eelyo cakamuyumina Aminoni kucita cintu cimwi kuli Tamaa. 3Aminoni wakalijisi mweenzinyina wakali kutegwa Jonadabu, mwana mulombe wa Syimeyi, munyina Devedi. Jonadabu wakali mumpelenge. 4Wakati kulinguwe, “O mwanaa mwami, nkaambo nzi ncoumbaalilwa buzuba abuzuba? Sena tokonzyi kundaambila.”

Aminoni wakati kulinguwe, “Ndiyanda Tamaa mucizi wamupati wangu Abisalomu.”

5Eelyo Jonadabu wakati kulinguwe, “Kolala abulo bwako ulicisye-cisye. Nkabela uso asika kuzookubona, umwaambile kuti, ‘Nikwaboola mucizi wangu Tamaa azoondibambile cakulya akundipa, andisanine.’” 6Aboobo Aminoni wakalala akulicisya-cisya.

Nkabela mwami naakasika kuzoomubona, Aminoni wakati kulinguwe, “Nikwaboola mucizi wangu Tamaa azoondibambile zinkwa nkebwene amana azoondisanine.”

7Mpoonya Devedi wakatuma Tamaa kuŋanda ya Aminoni, wakati, “Koya kuŋanda yamunyinandumi wako Aminoni, ukamujikile cakulya.” 8Aboobo Tamaa wakainka kuŋanda yamunyinandumi wakwe wakalede. Eelyo wakabuula busu bweelede wabukanda. Wakapanga tunkwa kalangilila. 9Wakagwisya cikangilo wapula, pele wakakaka kulya. Mpoonya Aminoni wakati, “Bantu boonse bazwide anze.” Aboobo bantu boonse bakazwa. 10Mpoonya Aminoni wakati kuli Tamaa, “Leta cakulya kubulo, undisanine kabotu.” Eelyo Tamaa wakabweza zinkwa eezyo nzyaakakanga akuzitola kubulo bwa Aminoni munyinandumi. 11Ciindi naakaswena aafwiifwi kuti amusanine, wakamujata akumwaambila kuti, “Ino mbuti kuti toona a yebo, o mucizi wangu?”

12Walo wakamwiingula kuti, “Peepe, o munyinandumi wangu, utandisungilizyi pe, nkaambo cintu cili boobo cilatondwa, tacicitwi mu Isilayeli. Utaciciti cintu eeci cabufuba-fuba. 13Ino bantu bayoondilanga buti? Ayebo lwako omwini uyooba mufuba-fuba mu Isilayeli. Nkaako lino ndakukumbila, ukaambaule amwami nkaambo takookukasya kukwatana ambebo pe.” 14Pele taakwe naakamuswiilila, alimwi mukuba aanguzu kwiinda nguwe, wakamujata woona anguwe.

15Mpoonya Aminoni wakamucimwa, wakamucimwa kwiinda mbwaakali kumuyanda. Eelyo Aminoni wakati kulinguwe, “Buka, uunke.”

16Walo wakati, “Peepe, o munyinandumi wangu, kuti unditande ulabisya kwiinda ceeci ncoocita.”

Aminoni taakwe naakamuswiilila. 17Wakaita mubelesi wakwe mulombe akumwaambila kuti, “Mutandile anze ooyu mukaintu ujale mulyango azwa.” 18Aboobo mubelesi wakwe wakamutandila anze akuujala mulyango ciindi naakazwa. Ciindi eeco Tamaa wakasamide cisani cilamfu cakajisi maboko malamfu, nkaambo mbombuboobu basimbi bapati bamwami batakazi baalumi mbubakali kusama mumazuba aayo. 19Mpoonya Tamaa wakalibikka twe kumutwe akudelaula cisani eeco ncaakasamide, eelyo wakalijata kumutwe akuya bweenda kumwi kaya bulilisya. 20Mpoonya aawo mupati wakwe Abisalomu wakati kulinguwe, “Sena munyinandumi wako Aminoni wali aanduwe? Koumuna buyo omucizi wangu mmunyinandumi wako, utakatazigwi amakani aaya.” Aboobo Tamaa wakakkala kali mubuumba muŋanda yamunyinandumi Abisalomu.

21Nkabela ciindi mwami Devedi naakamvwa zintu eezi zyoonse, wakanyema kapati. 22Pele Abisalomu taakwe ncaakaambaula kuli Aminoni niciba cili buti, nikuba boobo Abisalomu wakasula Aminoni, nkaambo kakuti wakajata mucizi wakwe.

23Lino nikwakainda myaka yobilo iizwide, Abisalomu wakali abasikugela mbelele ku Baalihazo kufwiifwi aku Efulemu, eelyo Abisalomu wakati atambe bana balombe boonse bamwami. 24Mpawo Abisalomu wakasika kumwami akwaamba kuti kulinguwe, “Langa mubelesi wako ulijisi basikugela mbelele, ndakumbila mwami ababelesi bakwe bainke amubelesi wako.”

25Pele mwami wakati kuli Abisalomu, “Peepe, mwanaangu, tutainki toonse, kutegwa tutakakukatazyi.” Lino wakamukombelezya, nikuba boobo taakwe naakazumina, wakamuleka buyo.

26Mpoonya Abisalomu wakati, “Kuti naa toyandi, ndakukumbila kuti Aminoni mwanookwesu tuunke limwi.”

Eelyo mwami wakati kulinguwe, “Nkaambo nzi nceelede kuunka andinywe?” 27Pele Abisalomu wakamukombelezya mane kusikila naakamuzumizya Aminoni abana balombe bamwami, bakainka anguwe.

28Mpoonya Abisalomu wakalailila babelesi bakwe kuti, “Mumulangisisye, ciindi Aminoni akolwa waini, mumuume akumujaya. Mutayoowi pe. Kayi ndime ndamulailila! Amube basicamba alimwi amube baalumi basinguzu.” 29Aboobo babelesi ba Abisalomu bakacita Aminoni mbubonya mbuli mbwaakabalailila. Mpoonya boonse bana balombe bamwami bakanyamuka, umwi aumwi wakatanta myuulu yakwe batija.

30Nibakacili kuya butija, makani akasika kuli Devedi kuti, “Abisalomu wajaya bana balombe boonse bamwami, taakwe naba omwe wasyaala pe.” 31Mpoonya mwami wakanyamuka, wadelaula zisani zyakwe walala ansi, babelesi bakwe boonse bakaimvwi munsi lyakwe, abalo bakadelaula zisani zyabo. 32Pele Jonadabu mwana mulombe wa Syimeyi, munyina Devedi wakati, “Mwami wangu, utayeeyi kuti balombe boonse bajaigwa pe, Aminoni alikke nguwajaigwa, kwiindila mukulailila kwa Abisalomu. Aaya ngamakanze ngaakajisi kuzwa ciindi naakajata mucizi wakwe Tamaa. 33Lino mwami simalelaangu, atabi nacibikka kumoyo cakuyeeya kuti bana balombe boonse bamwami bafwa, Aminoni alikke nguwafwa.”

34Lino Abisalomu wakalitijide. Nkabela mulindizi naakalanga, wakabona bantu banji kapati bakali kuzwida kunzila ya Holonaimu kubbazu lyakucilundu. 35Mpoonya Jonadabu wakati kumwami, “Langa, bana balombe bamwami basika, mbubonya mbuli mbwindakwaambila, ncobeni mbokubede.” 36Mbwaakamanina buyo kwaamba, bakasika akoomoka, awalo mwami ababelesi bakwe boonse bakalila kapati.

37Pele Abisalomu wakalitijide akuunka kuli Talimayi, mwana mulombe wa Ahihudi mwami waku Gesyu. Nkabela Devedi wakalila mwanaakwe Aminoni buzuba abuzuba.

38Mbombuboobu Abisalomu mbwaakatija akuunka ku Gesyu, wakakkala ooko kwamyaka yotatwe. 39Lino mwami wakayandisya kuya kuli Abisalomu, nkaambo moyo wakwe wakakkala kumakani aalufu lwa Aminoni naakabona kuti wafwa kale.

Currently Selected:

2 Samuyele 13: Tonga96

Highlight

Copy

Compare