2 Bami 9
9
Jehu mbwaakaba mwami wa Isilayeli
1Lino Elisya musinsimi wakaita umwi wankamu yabasinsimi, wamwaambila kuti, “Kolyaangaanga, utole nsazi yamafuta eeyi, uye ku Lamotigiliyadi. 2Lino waakusika ooko ukalangaule Jehu mwanaa Jehosyafati mwanaa Nimusyi, ukamutole ambali kuzwa akati kabeenzinyina mukanjile muŋanda yamukati iini. 3Mwaakunjila ukabweze nsazi eeyi, ukamutile amutwe ukati, ‘Mwami Leza, wakunanika kuti ube mwami wacisi ca Isilayeli.’ Mboyoomanina ukazwe ukatije, utakaimi-imi.”
4Aboobo musinsimi ooyo wakainka ku Lamotigiliyadi. 5Lino naakaakusika wakajana bapati bampi balikkede, mpawo wakati, “Ndijisi cakukwaambila silutwe.” Eelyo Jehu wakati, “Nguuli ngoyanda akati kesu toonse?” Walo wakaingula kuti, “Nduwe silutwe.” 6Mpoonya wakanyamuka wanjila muŋanda anguwe eelyo musinsimi ooyo wakamutila mafuta amutwe wati, “Mboobu mbwaamba Mwami Leza wa Isilayeli ulati, ‘Ndakunanika kuti ube mwami wa Baisilayeli bantu ba Mwami Leza.’ 7Uleelede kunyonyoona mukwasyi wa Ahabu simalelo wako, kuti ndibweedezye bubi kumfu zyabasinsimi bangu mbaakajaya Jezebeli. 8Mukwasyi wa Ahabu woonse uyooloba, njoonyonyoona kufumbwa buna mwaalumi mumukwasyi wa Ahabu muzike naa muzyale mu Isilayeli. 9Njoocita kuti mukwasyi wa Ahabu ube mbuli wa Jelobowamu mwana Nebati awa Baasya mwanaa wa Ahija. 10Kwaamba zya Jezebeli, babwa bayoolya mutumba wakwe ku Jezuliili, taakwe uyoomuzikka pe.” Mpoonya wakajalula mulyango watija.
11Eelyo Jehu naakaboola kuli balupati-patinyina, umwi wabo wakamubuzya, “Sena kuli kabotu? Ino musondosi ooyu wazidilide nzi?” Walo wakabaambila kuti, “Mulimuzi ambwaamba.”
12Bakati, “Peepe, ulabeja, twaambile buyo?” Mpawo wakabaambila kuti, “Ngaaya makani ngaandaambila, wati ‘Mboobu mbwaamba Mwami Leza, ndakunanika kuti ube mwami wa Baisilayeli.’”
13Mpoonya cakufwambaana baalumi boonse bakabweza majansi aabo akwaayala munsi aamatantilo mpaakabede, bamane bakalizya mweembo bapozomoka bati, “Jehu ngomwami.” 14Lino mboobu Jehu mwanaa Jehosyafati mwanaa Nimusyi mbwaakabukila Jolamu. Jolamu a Baisilayeli boonse bakali kukwabilila Lamotigiliyadi kuli Hazayeli mwami wa Alamu. 15Pele mwami Jolamu wakali pilukide kuti akalimvwe kabotu kuzwa kuzilonda nzibakamuyasa Baalamu nibakali kulwana a Hazayeli mwami waku Alamu. Aboobo Jehu wakati, “Naa muyanda kuti ndibe mwami ncobeni, mutalekeli muntu naba omwe kuti azwe mumunzi akuyooamba makani aaya ku Jezuliili.” 16Mpoonya Jehu wakatanta munkalaki yakwe wainka ku Jezuliili, nkaambo Jolamu nkwaakabede kuyoolyookezya, awalo Ahaziya mwami wacisi ca Juda wakali nkuko kuyoomubona.
17Lino mulindizi wakaimvwi aŋanda ndamfu yamu Jezuliili, naakabona Jehu abasilumamba kabaza buza wakati, “Ndabona basilumamba.” Mpawo Jolamu wakati, “Amutume sibbiza akaswaangane ambabo akubabuzya kuti, ‘Sena mwaza aaluumuno?’” 18Mpoonya sibbiza wakainka kuyooswaangana Jehu akuti, “Mboobu mbwaamba mwami, ‘Sena mwaza aaluumuno?’”
Jehu wakaingula kuti, “Ino ulajana nzi amakani aaya? Nditobela.” Mpawo mulindizi wakaamba kuti, “Mutumwa kwalo kusika waakusika kulimbabo, pele tabooli pe.” 19Aboobo wakatuma wabili, wakaakusika kulimbabo akuti, “Mboobu mbwaamba mwami, ‘Sena mwaza aaluumuno?’” Mpawo Jehu wakati, “Ino ulajana nzi amakani aaya? Nditobela.”
20Aawo mulindizi wakaamba kuti, “Kwalo kusika awalo ooyu waakusika kulimbabo, pele tabooli pe. Alimwi uuboola ukoyaanga ngu Jehu mwanaa Nimusyi, kayi nguuenzya aanga ngusikalalu.”
21Jolamu wakati, “Amundivolekele.” Mpoonya bakamuvolekela nkalaki yakwe. Eelyo Jolamu mwami wacisi ca Isilayeli a Ahaziya mwami wacisi ca Juda bakatanta, umwi aumwi munkalaki yakwe kuyooswaangana a Jehu. Bakamuswaanganina kumuunda wa Naboti Mujezuliili. 22Jolamu naakabona Jehu wakati, “Sena mwaza aaluumuno, Jehu?” Jehu wakati, “Ino inga kwaba luumuno buti kakuli mituni abulozi butaambiki bwabanyoko Jezebeli nkobucili?” 23Mpoonya Jolamu wakanyona watija waambila Ahaziya kuti, “Ahaziya bantu aaba bandibukila!” 24Jehu wakagwisya buta bwakwe akufusa canguzu, wayasa Jolamu andelo mumvwi wakabbwalula moyo wakwe, wakavuntamuka munkalaki yakwe. 25Mpoonya Jehu wakaambila Bidikaa silutwe wakwe kuti, “Mugwisye umusowele mumuunda wakali wa Naboti Mujezuliili, ulayeeya ciindi ciya yebo ambebo katutantide nkalaki kutobela Ahabu wisi, mbuli Mwami Leza mbwaakamuyubunwida makani aaya aakuti, 26‘Jilo ndakabona bulowa bwa Naboti abwabana bakwe, mbwaamba Mwami Leza, njoobweedezya bubi oobu mumuunda uuno, mbwaamba Mwami Leza.’ Aboobo mubweze umusowele mumuunda ooyu kweendelana amajwi akaamba Mwami Leza.”
27Ahaziya mwami wacisi ca Juda naakabona boobu wakatijila kumugwagwa uuya ku Betihagani, Jehu wakamutandaanya kaya buti, “Ajaigwe awalo.” Nkabela bakamuyasa munkalaki kuya ku Gaa munsi aa Ibuleyamu. Pele wakazembukila ku Megido nkwaakaakufwida. 28Babelesi bakwe bakamubweza munkalaki bamutola ku Jelusalemu, baakumuzikka mucuumbwe cakwe, oomo muzikkidwe basikale bakwe mumunzi wa Devedi.
29Mumwaka wakkumi aumwi wa Jolamu mwana wa Ahabu, Ahaziya wakaba ngomwami ku Juda.
Jezebeli mbwaakajaigwa
30Lino Jehu naakaza ku Jezuliili, Jezebeli wakamvwa makani aayo. Aboobo wakalinanika cisila ameso, akulisakatizya kumane wakali kusondela ampulungwido. 31Jehu mbwaakanjilila buyo Jezebeli wakati, “Sena waza aaluumuno yebo Zimuli omujayi wasimalelo wako?”
32Mpawo wakalungumana kumpulungwido eeyo wati, “Mbaani bali kulubazu lwangu? Mbaani?” Nkabela kwakamulanga bazibe bobilo naa botatwe. 33Mpoonya wakati, “Amumuwaalile aansi Jezebeli.” Aawo bakamuwaala, nkabela bulowa bwakwe bumwi bwakatapaukila aabwanda aalo mabbiza akamulyatauka. 34Kumane Jehu wakanjila walya akunywa, waamba wati, “Amumubweze mukaintu ooyu uusinganyizidwe, mukamuzikke, nkaambo mwanaa mwami.” 35Pele ciindi nibakainka kuyoomuzikka bakajana kuti taakwe cakaliwo pe, ccita buyo mutwe amyeendo amaanza. 36Eelyo nibakapiluka kuzooambila Jehu makani, Jehu wakati, “Mbombubo bwakaambide Mwami Leza kwiindila muli Elija Mutisyibi naakati, ‘Munyika ya Jezuliili, babwa bayoolya mubili wa Jezebeli, 37mutumba wa Jezebeli uyooba mbuli bufumba buyo buli anyika yamuunda munyika ya Jezuliili, aboobo taakwe muntu omwe uuyooziba kuti ooyu ngu Jezebeli.’”
Currently Selected:
2 Bami 9: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
