2 Bami 25

Munzi wa Jelusalemu mbuwakawa

(2 Makani 36.13-21; Jelemiya 52.3b-11)

1Lino mumwaka wafuka wakulela kwa Zedekiya, mubuzuba bwakkumi bwamwezi wakkumi, Nebukadineza mwami waku Babuloni wakaya kuyoolwana munzi wa Jelusalemu abasilumamba bakwe boonse. Wakayaka zivuka anze lyamunzi akuyaka zitantaala zyakuusinkilizya kuuzinguluka woonse. 2Munzi ooyu wakalisinkilizidwe mane kusika mumwaka wakkumi aumwi wakulela kwa mwami Zedekiya. 3Eelyo mubuzuba bwafuka bwamwezi wane nzala yakabbebba kapati cakuti bantu mumunzi bakabula cakulya. 4Mpoonya bakaandula bwaanda, nikuba kuti Bababuloni bakazingulukide munzi, balo basilumamba ba Zedekiya boonse bakatija ciindi camasiku, bakainda kumulyango uuli akati kabwaanda bobilo kumbali aamuunda wa mwami. Bakatijila kufwiifwi aku Alaba. 5Pele basilumamba ba Bakalodiya bakatandaanya mwami akuyoomweenzya kumabanda aa Jeliko. Nibakabona boobo basilumamba bakwe bakamumwaika akutija, 6walo wakajatwa. Wakatolwa kumwami waku Babuloni ku Libula ooko nkubakaakumupeda mulandu. 7Zedekiya kalangilila bakajaya bana bakwe balombe. Bamane walo bakamudonkola meso akumwaanga ankeetani zyamukuba, bamutola ku Babuloni.

Ŋanda ya Mwami Leza mbuyakamwaigwa

(Jelemiya 52.12-33)

8Lino mubuzuba bwaciloba, bwamwezi wasanu mumwaka wakkumi afuka wakulela kwa Nebukadineza mwami waku Babuloni, Nebuzaladani mulailili wabalindizi uuli ngoumwi wabalupati-pati bamwami wa Babuloni, wakasika ku Jelusalemu. 9Wakatenta ŋanda ya Mwami Leza, ŋanda yabwami, alimwi amaanda naali buti oonse mu Jelusalemu. Wakatenta amaanda aabalemenede oonse. 10Basilumamba ba Bakalodiya boonse bakali kusolwedwa amulailili wabalindizi, bakamwaya bwaanda bwakazingulukide munzi wa Jelusalemu. 11Mpawo Nebuzaladani mulailili wabo wakatola bantu mubuzike aabo bakasyeede mumunzi abamwi kubikkilizya abaabo bakalyaabide kumwami waku Babuloni. 12Pele mulailili ooyu wakasiya bamwi bacete babacete munyika kuti kabalima mumisaansa amyuunda.

13Lino Bakalodiya bakapwaya zicinda zyamukuba, zikkazikilo, acibumbe caziba eezyo zyakali muŋanda ya Mwami Leza. Bamane bakabweza mukuba wazyo akuutola ku Babuloni. 14Alimwi bakatola azibiya, mafocolo, tuzimyo twamalambe, mitiba, tulongo twatununkilizyo azibelesyo zyoonse zyamukuba zyakali kubelesegwa muŋanda ya Mwami Leza. 15Mulailili ooyu wakatola ankaye zyoonse alimwi amitiba yakusansaizya yakali yangolida naa yansiliva. 16Mukuba wakali wazicinda zyobilo, wazipumpu alimwi awacibumbe caziba eezyo Solomoni zyaakapangilide ŋanda ya Mwami Leza, tiiwakali kukonzeka kweelekwa bulemu bwawo pe. 17Cicinda comwe-comwe cakali kulampa tukokola tuli kkumi alusele. Cipumpu cakali atala lyacicinda cakali kulampa tukokola totatwe, alimwi cakabotezegwa atubulo tupatangene amapomegileneti aamukuba kucizinguluka. Cicinda cimwi acalo cakali mbubonya, cakali atubulo tupatangene.

Bantu ba Juda mbubakatolwa ku Babuloni

(Jelemiya 52.24-27)

18Lino mulailili wabalindizi wakatola Selaiya mupaizi mupati a Zefaniya uumuccilila mumulimo, alimwi abalindizi baamilyango botatwe mubuzike. 19Akati kabaabo bakasyeede mumunzi, wakatola awakali mupati wabasilumamba kubikkilizya abalailili bamwami bosanwe. Wakatola yooyo amulembi wakali mupati wampi yakulemba, wakatolelezya beelede munkondo abamwi bamwi bamugwasya bali makumi aali cisambomwe. 20Nebuzaladani mulailili wakatola bantu aaba boonse akuyoobasisya kumwami waku Babuloni ku Libula. 21Ooko ku Libula mucisi ca Hamati mwami wakasungula kuti bajaigwe.

Mbombuboobu bantu ba Juda mbubakatolwa mubuzike kulaale anyika yabo.

Gedaliya mweendelezi wacisi ca Juda

(Jelemiya 40.7-9; 41.1-3)

22Lino mwami Nebukadineza wakasala Gedaliya mwana wa Ahikamu mwanaa Syafani kuti eendelezye bantu aaba bakasyeede mu Juda. 23Bapati babasilumamba baku Juda abamwi nibakamvwa kuti mwami waku Babuloni wakasala Gedaliya kuti abe mweendelezi, bakaboola antoomwe abasilumamba babo kuli Gedaliya ku Mizipa. Bapati babasilumamba aaba mbaa: Isyimayeli mwanaa Netaniya, Johanani mwanaa Kaleya, Selaiya mwanaa Tanumeti Munetofati, a Jaazaniya mwanaa Mumaakati. 24Gedaliya wakasyomezya baalumi aabo abantu babo, “Mutayoowi kubelekela ba Kalodiya, amukkale munyika muno mubelekele mwami waku Babuloni, ndendilyo zyoonse nozitimweendele kabotu.”

25Pele mumwezi waciloba, Isyimayeli mwanaa Netaniya, mwana wa Elisyama waciinga cabwami, wakaboola abaalumi bali kkumi wazoojaya Gedaliya abamwi bamu Juda alimwi a Bababuloni aabo bakali aanguwe ku Mizipa. 26Eeci nicakacitika, bantu boonse kutalikila kubantu buyo kuyoosika kuli balupati-pati antoomwe abapati babasilumamba bakatijila ku Ijipiti akaambo kakuyoowa Bababuloni.

Jehoiyakini mbwaakaangununwa

(Jelemiya 52.31-34)

27Lino mumwaka wamakumi otatwe aciloba Jehoiyakini mwami waku Juda katoledwe mubuzike, mumwaka ooyo Evilimelodaki wakaba mwami wacisi ca Babuloni, wakaangununa Jehoiyakini kuzwa muntolongo mubuzuba bwamakumi obilo aciloba mumwezi wakkumi aibili. 28Wakaamba calubomba anguwe wakamusumpula akumupa cuuno cabulemu kwiinda baminyina mbaakali aabo mu Babuloni. 29Nkaako Jehoiyakini wakasamununa zyantolongo, alimwi mumazuba aabuumi bwakwe boonse wakali kulida antoomwe amwami. 30Buzuba abuzuba mwami wakali kupa Jehoiyakini zyakuvola kwakwe kwabuumi bwakwe boonse.

Currently Selected:

2 Bami 25: Tonga96

Highlight

Copy

Compare