2 Bami 24

1Lino Jehoiyakimu kacilela mwami Nebukadineza waku Babuloni wakasaala cisi cakwe, wakamucita kuti abe mutwanga wakwe kwamyaka yotatwe. Pele wakazangila Nebukadineza. 2Mwami Leza wakamutumina mpi yaku Babuloni, Baalamu, Bamowabu alimwi a Baamoni kuzoomulwana. Wakabatuma kuzoonyonyoona cisi ca Juda, mukweendelana amajwi Mwami Leza ngaakaamba kwiindila mubabelesi bakwe basinsimi. 3Ncobeni eeci cakacitika mu Juda kweendelana ambwaakaamba Mwami Leza, amukuti abagwisye kulinguwe, nkaambo kazibi zya Manase azyoonse nzyaakacita, 4alimwi akaambo kabulowa mbwaakatila bwabantu batakwe mulandu. Wakazuzya Jelusalemu abulowa bwabantu batakwe mulandu, nkaako Mwami Leza taakalekelela pe. 5Lino eezyo zyoonse Jehoiyakimu nzyaakacita azimwi, zililembedwe mubbuku lyamakani aabami ba Juda. 6Aboobo Jehoiyakimu wakafwa akuzikkwa abasikale bakwe, nkabela mwanaakwe Jehoiyakini wakaba ngomwami mubusena bwakwe. 7Eelyo mwami wacisi ca Ijipiti taakwe naakaya limbi kukulwana nkaambo mwami wacisi ca Babuloni wakatola cisi coonse kuzwida kumulonga wa Ijipiti kusikila kumulonga wa Yufuletisi.

Mwami Jehoiyakini wacisi ca Juda

(2 Makani 36.9-10)

8Jehoiyakini wakali aamyaka iili kkumi alusele naakatalika kulela, wakalela kwamyezi yotatwe mu Jelusalemu. Banyina bakali ba Nehusyita mwana wa Elinatani waku Jelusalemu. 9Awalo ooyu wakabisizya Mwami Leza, mbubonya mbuli bwakacita wisi.

10Lino ciindi eeco balupati-pati babasilumamba ba Nebukadineza mwami wacisi ca Babuloni bakasika ku Jelusalemu akuzoosinkilizya munzi. 11Mpawo Nebukadineza mwami wacisi ca Babuloni wakaboola kumunzi ooyo, ciindi balupati-pati bakwe aaba kabasinkilizizye munzi ooyu. 12Eelyo Jehoiyakini mwami wacisi ca Juda wakalyaaba walo kumwami wacisi ca Babuloni abanyina, bagwasyi bakwe, balemekwa alimwi abalupati-pati bakwe. Lino mwami wacisi ca Babuloni wakatola Jehoiyakini mubuzike mumwaka walusele wakulela kwakwe. 13Alimwi wakagwisya zintu muziyobwedo zyaŋanda ya Mwami Leza, aŋanda yabwami akutola zintu zyoonse zyangolida eezyo mwami Solomoni wa Isilayeli nzyaakabambilide ŋanda ya Mwami Leza, mbubonya mbuli Mwami Leza mbwaakaamba. 14Wakatola bantu boonse bamu Jelusalemu, nkokuti balupati-pati, abaalumi bakali kukonzya kulwana basibuuya abafuzi antoomwe bakali zyuulu zili kkumi. Wakasiya buyo bacete mucisi. 15Nebukadineza wakatolelela a Jehoiyakini, banyina, bakaintu bakwe, balupati-pati, abantu balaampuwo ku Babuloni. 16Alimwi mwami wacisi ca Babuloni wakatola bazike ku Babuloni, baalumi basinguzu beelede kulwana, bakali zyuulu zili ciloba. Wakatolelezya abasibuuya abafuzi bali cuulu. 17Mpawo wakabikka Mataniya wisi musyoonto Jehoiyakini kuba mwami mubusena bwakwe, amane wakasandula zina lyakwe akumwiita kuti Zedekiya.

Mwami Zedekiya wacisi ca Juda

(2 Makani 36.11-12; Jelemiya 52.1-3a)

18Zedekiya wakajisi myaka iili makumi obilo aumwi naakatalika kulela. Wakalela kwamyaka iili kkumi aumwi mu Jelusalemu. Banyina bakali ba Hamutali, mwanaa Jelemiya waku Libuna. 19Awalo ooyu wakabisizya Mwami Leza mbubonya mbuli Jehoiyakimu mbwaakacita. 20Eeci cakacitika kumunzi wa Jelusalemu akucisi ca Juda akaambo kakunyemya Mwami Leza, mpawo wakabatanda kuzwa kulinguwe.

Currently Selected:

2 Bami 24: Tonga96

Highlight

Copy

Compare