2 Bami 1
1
Zya Elija a Ahaziya
1Musule aalufu lwa mwami Ahabu, Bamowabu bakazangila Isilayeli.
2Lino bumwi buzuba Ahaziya wakawa kuzwa ampulungwido yaŋanda yakwe yamujulu yakali mu Samaliya, aboobo wakalicisa, mpoonya wakatuma batumwa wati, “Kamuya mukabuzye kuli Baalizebube, leza waku Ekiloni, ndizibe naa ndilapona kuzwa kubulwazi oobu.” 3Pele mungelo wa Mwami Leza wakati kuli Elija Mutisyibi, “Koya ukaswaangane abatumwa bamwami wacisi ca Samaliya, ukabaambile kuti, ‘Sena nkaambo kakuti taakwe Leza mu Isilayeli ncomuunkila kuyoobuzya Baalizebube leza waku Ekiloni?’” 4Nkaambo kaako Mwami Leza wakati, “Mukamwaambile Ahaziya kuti, ‘Tokooyoobuka aabulo aawo mpobede, ulafwa.’” Amane kwaamba boobo Elija wakabasiya.
5Batumwa bakapilukila kumwami, walo wakababuzya kuti, “Ino mwapilukila nzi?”
6Bakaingula kuti, “Twaswaangana muntu umwi watwaambila kuti, ‘Amupilukile kumwami ooyo wamutuma’ mukati, ‘Mboobu mbwaamba Mwami Leza,’ ulati, ‘Sena nkaambo kakuti taakwe Leza mu Isilayeli ncootumina bantu kuti bakabuzye Baalizebube leza waku Ekiloni? Nkaambo kaako tokoobuka aabulo aawo mpolede, ulafwa ncobeni!’”
7Walo wakati, “Ino uli buti muntu ooyo ngumwaswaanganya wamwaambila makani aaya?”
8Bakamwiingula kuti, “Wasamide jansi lyaboya alutambo lwacikanda mucibuno.” Mpawo mwami wakati, “Ngu Elija Mutisyibi.”
9Eelyo mwami wakamutumina silutwe ankamu yakwe yabasilumamba bali makumi osanwe. Nkabela naakasika kulinguwe wakajana ulikkede atala aacilundu, mpawo wakati, “Omuntu wa Leza, seluka.”
10Pele Elija wakaingula silutwe ooyo kuti, “Kuti naa nkendi muntu wa Leza ncobeni, akuseluke mulilo kuzwa kujulu ukusyukute yebo abantu bako bali makumi osanwe.” Mpoonya mulilo wakazwa kujulu akumusyukuta abantu bakwe bali makumi osanwe.
11Alimwi mwami wakatumina aumbi silutwe ankamu yakwe yabasilumamba bali makumi osanwe waakuti, “Omuntu wa Leza, mwami waamba kuti, ‘Fwambaana seluka.’”
12Pele Elija wakamwiingula kuti, “Kuti naa nkendi muntu wa Leza ncobeni, akuseluke mulilo kuzwa kujulu ukusyukute yebo abantu bako bali makumi osanwe.” Mpoonya mulilo wakazwa kujulu akumusyukuta abantu bakwe bali makumi osanwe.
13Alimwi mwami wakatuma silutwe ankamu yakwe yabasilumamba, nkabela ooyo silutwe watatu wakaakusika kuli Elija wamuvuntamina akumukumbila kuti, “Akaka O muntu wa Leza, utandinyonyooni abaaba mbeli aabo babelesi bako. 14Tulibwene mulilo mbuli mbuwakazwa kujulu akusyukuta basilutwe bataanzi bobilo antoomwe abantu babo, pele lino akaka utandinyonyooni.”
15Mpoonya mungelo wa Mwami Leza wakati kuli Elija, “Seluka uunke anguwe, utayoowi pe.”
Mpawo wakanyamuka waseluka akuunka anguwe ku mwami, 16eelyo wakamwaambila kuti, “Mboobu mbwaamba Mwami Leza ulati, ‘Sena nkaambo kakuti taakwe Leza mu Isilayeli ncootuma bantu kuti bakabuzye kuli Baalizebube leza waku Ekiloni? Akaambo kakuti wacita ceeci tokoobuka abulo aawo mpolede, ulafwa ncobeni.’”
17Mbombuboobu mbwaakafwa kweendelana amajwi aa Mwami Leza aakaamba Elija. Mukuti Ahaziya wakanyina mwana mulombe Jolamu munyina, wakaba ngomwami mubusena bwakwe. Jolamu wakaba mwami mumwaka wabili wakulela kwa Jeholamu mwanaa Jehosyafati mwami wacisi ca Juda. 18Lino zyoonse Ahaziya nzyaakacita azimwi, zililembedwe mubbuku lyamakani aabami ba Isilayeli.
Currently Selected:
2 Bami 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
