1 Joni 5
5
Lusyomo ndoluzunda zyaansi ano
1Kufumbwa uuzumina kuti Jesu ngo Munanike wa Leza muntu ooyo mmwanaa Leza. Lino uuyanda muzyali ulayandilizya amwana. 2Mboobu mbotuzi kuti bana ba Leza tulabayanda, tulabayanda ciindi notuyanda Leza akuswiilila milawo yakwe. 3Nkaambo kuyanda Leza nkubamba milawo yakwe, alimwi milawo yakwe tiili miyumu pe. 4Kufumbwa mwanaa Leza ulazunda zyabuntunsi. Ncotuzundya zyabuntunsi ndusyomo. 5Ino nguni uunga wazunda zyabuntunsi, tee nguyooyo uusyoma kuti Jesu Mwanaa Leza.
Bumboni bwaamba zya Jesu Kilisito
6Jesu Kilisito nguwakaboola kwiindila mumaanzi aalubbapatizyo amubulowa bwalufu lwakwe. Taakaboola mumaanzi buyo, pele mumaanzi abulowa bwakwe. Lino Muuya Uusalala nguupa bumboni, nkaambo Muuya ooyo mbobwini. 7Kuli bakamboni botatwe, 8aaba: Muuya Uusalala, maanzi, abulowa. Boonse botatwe balazuminana. 9Tee tulatambula bumboni bwabantu, bumboni bwa Leza mbupati kwiindilila. Bumboni oobu mbombubo Leza mbwaakacitila Mwanaakwe. 10Ooyo uusyoma Mwanaa Leza, ulijisi bumboni oobu mulinguwe. Ooyo uutasyomi, Leza wamucita mubeji, nkaambo tasyomi bumboni oobo Leza mbwacitila Mwanaakwe. 11Mboobu bumboni oobo, Leza wakatupa buumi butamani, alimwi buumi oobu bujanwa mu Mwanaakwe. 12Ooyo uujisi Mwana ulijisi buumi, pele ooyo uutajisi Mwanaa Leza tajisi buumi pe.
Zyabuumi butamani
13Ndamulembela eezi nywebo nomusyoma Mwanaa Leza kuti muzibe kuti mulijisi buumi butamani. 14Lino tuli basicamba kuli Leza nkaambo ulatuswiilila notumukumbila kufumbwa cintu mukweendelana akuyanda kwakwe. 15Kuti naa tulizi kuti kufumbwa ncotumukumbila ulatumvwa, tulizi alimwi kuti ulatupa ncitwamukumbila.
16Kuti naa umwi wabona mweenzinyina wabisya cibi citali calufu amumukumbilile, eelyo Leza ulapa wabisya ooyo buumi. Ngamba aabo batabisyi cibi calufu. Pele nkocili cinyonyoono ciletela lufu, alimwi tiindaamba kuti ulakombela ncico pe. 17Kubisya koonse ncinyonyoono, pele zibi zimwi ziletela lufu.
18Tulizi kuti mwanaa Leza tazumanani kucita zibi. Jesu Mwanaa Leza ulamubamba, kuti Mubi uulya atamugumi.
19Tulizi kuti tuli bakwe Leza, nikuba kuti bantunsi boonse mba Mubi.
20Tulizi kuti Mwanaa Leza wakaboola akutupa busongo kuti tuzibe Leza wini-wini nkaambo tuli mu Mwanaakwe Jesu Kilisito. Ooyo ngo Leza wini-wini abuumi butamani.
21Nobana bangu, amulibambe mutanookombi mituni!
Currently Selected:
1 Joni 5: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
