2 Bakolinti 5

1Mubili ngotujisi ansi aano uli mbuli civuka. Pele tulizi kuti civuka eeci caakumwaigwa, tuyooba aaŋanda Leza njatubambila kujulu, yalo yatakayakwa amaanza aabantu, alimwi iyookkalilila. 2Ncencico eeco ncotutongela akusukama kuti Leza atusamike ŋanda yesu yakujulu. 3Twaakwiisama, tatukajaniki katunyina mubili. 4Swebo notuli mucivuka eeci tulatongela mumapenzi. Takuli kuti tuyanda kusamununa civuka eeco pe, pele tuyandisisya kusamikwa ŋanda yakujulu mukuti eeco cimwaikika cisandulwe cabuumi. 5Leza nguutubamba kuti tukatambule zintu eezi, eelyo wakatupa Muuya Uusalala mbuli cizibyo cakwe.

6Aboobo swebo lyoonse tulaacamba, alimwi tulizi kuti ciindi notuli mumubili tuli kulaale kuzwa ku Mwami. 7Nkaambo cipati ndusyomo kutali kulibonena aameso. 8Iiyi, tulaacamba, pele ncotuyandisya nkuti tuzwe mumubili akuba aa Mwami. 9Aboobo nikuba kuti tuli waano naa tuli aa Mwami, tuyanda kumubotezya. 10Nkaambo toonse tuleelede kuyooima kuli Kilisito kuti atubeteke. Ooko muntu amuntu uyootambula zimweelede, kweendelana anzyaakacita ansi aano, zibotu naa zibi.

Zyakuyanzanyizigwa a Leza kwiindila muli Kilisito

11Mukuti tulizi ncocaamba kulemeka Mwami, tulakombelezya bantu. Leza ulituzi cakumaninina, alimwi tulasyoma kuti anywebo mulituzi mumyoyo yanu. 12Tatulilumbaizyi lwesu tobeni kulindinywe alimwi pe, pele tuyanda kuti nywebo mulisumpule akaambo kandiswe. Tuyanda kuti mube acakwiingula baabo balisumpwida ziboneka ameso kutali aamoyo. 13Kuti naa twakali kuboneka aanga tulisondokede, twakali boobo nkaambo ka Leza. Kuti naa tulisitikide, tuli boobo nkaambo kandinywe.

14Luyando lwa Kilisito ndolutweendelezya, nkaambo tulasyoma kuti omwe wakafwida boonse, nkaambo kaako boonse bakafwa mulinguwe. 15Wakabafwida boonse kuti aabo bapona kabataciliponeni beni, pele baponene yooyo wakabafwida akubusigwa nkaambo kabo.

16Nkaambo kaako, kuzwa sunu tatuciyeeyeli muntu kuti muntu buyo pe. Nikuba kuti twakali kuyeeyela Kilisito mbuli muntu buyo, sunu tatucimuyeeyeli boobo pe. 17Kuti naa muntu umwi waba muli Kilisito, walengwa bupya. Zintu zikulu-kulu zyamana, zyoonse zyaba zipya. 18Wacita eezi ngu Leza, walo muli Kilisito wakayanzana andiswe. Eelyo wakatupa mulimo wakukambauka luyanzano oolu. 19Tukambauka kuti muli Kilisito, Leza ulayanzanya bamunyika anguwe, tabali zibi zyabo. Eelyo watupa makani aaluyanzano oolu. 20Tuli baiminizi ba Kilisito, nkaako Leza ulamukombelezya mulindiswe. Nkaambo kaako twamukomba muzina lya Kilisito kuti amuyanzane a Leza. 21Kilisito wakanyina cinyonyoono, pele Leza wakabikka zinyonyoono zyesu alinguwe, kuti swebo tube balulami kuli Leza.

Currently Selected:

2 Bakolinti 5: Tonga96

Highlight

Copy

Compare