2 Makani 35
35
Josiya mbwaakasekelela pobwe lya kwiindilila
(2 Bami 23.21-23)
1Mwami Josiya wakasekelela pobwe lya kwiindilila lya Mwami Leza mu Jelusalemu, mubuzuba bwakkumi aane bwamwezi wakusaanguna bakajaya kabelele kapobwe eeli. 2Bapaizi wakabapa milimo yabo yakuŋanda ya Leza akubayumya kuti kababeleka kabotu. 3Alimwi wakapa malailile ku Balevi balo bakaiisya Baisilayeli, bakapedwe ku Mwami Leza kuti, “Babikke bbokesi lyacizuminano ca Mwami Leza muŋanda yakwe eeyo mwami Solomoni njaakamuyakila. Tamweelede kuciliyumuna-yumuna aziwezo, pele mweelede kubelekela Mwami Leza abantu bakwe Baisilayeli. 4Muleelede kwiima muŋanda ya Leza mukweendelana aziinga zyanu, kweendelana ambuli bwakalailila mwami Devedi wa Isilayeli amwanaakwe Solomoni. 5Mulibambilile cakuti bamwi banu kabajanika bayandika kugwasya mukwasyi umwi wabantu Baisilayeli. 6Mweelede kujaya tubelele twapobwe lyakwiindilila. Kwamana mulisalazye mumulawo akubamba zipaizyo boobo cakuti, Baisilayelinyoko balakonzya kutobela malailile aa Mwami Leza ngaakabapa kwiindila muli Mozesi.”
7Mwami Josiya wakapa kuzwa kubutanga bwakwe ŋombe ambelele zili zyuulu zili makumi otatwe zyambelele, tubelele, tupongo alimwi abapoho bali zyuulu zyotatwe zyakubelesya bantu kupobwe eeli. 8Balupati-pati bakwe abalo bakapa cakulyaaba, kubantu, bapaizi a Balevi. Abalo balupati-pati bakali kulanga zyaŋanda ya Leza mbaa, Hilikiya mupaizi mupati, Zekaliya a Jehiyeli bakapa kubapaizi tubelele tuli zyuulu zyobilo amyaanda cisambomwe, tupongo alimwi abapoho bali myaanda yotatwe zyakupaizya muciindi capobwe lyakwiindilila. 9Basololi ba Balevi mbaa, Konaniya, Syemaiya amunyina Netaneli, Hasyabiya, Jeiyeli a Jozabadi bakapa tubelele tuli zyuulu zyosanwe atupongo alimwi abapoho bali myaanda yotatwe kuti Balevi bapaizye.
10Lino zyoonse zyapobwe lyakwiindilila nizyakabambwa, bapaizi a Balevi bakabweza masena aabo, mbuli mbubakalaililwa, 11Balevi mbibakafunda, bapaizi mbibakasansaila bulowa acipaililo. 12Bamane bakaapawida bantu mumikwasyi yabo, banyama baakupaizya, kutegwa bapaizye mukweendelana amalailile aamulawo wa Mozesi. 13Bapaizi bakayoka zipaizyo eezyo amulilo, mukweendelana amalailile, akujika zipaizyo zisalala mumpoto, zibiya azikangilo. 14Nizyakamana zyoonse eezi, Balevi bakabweza nyama yabo, aya bapaizi balunyungu lwa Aloni mukuti bapaizi aaba bakali kujata bubi kusikila masiku, kupaizya banyama bakali kutentelwa limwi alimwi amafuta aazipaizyo. 15Baimbi Balevi baciinga ca Asafu bakaima mumasena aakalailila mwami Devedi mbaa, Asafu, Hemani a Jedutuni munsinsimi wamwami. Balindizi bakumanjililo aakuŋanda ya Leza tiibakeelede kusiya masena aabo, nkaambo Balevi bamwi bakabambila pobwe lyakwiindilila. 16Kweendelana ambuli bwakalailila mwami Josiya yoonse milimo yakukomba Mwami Leza yakacitwa buzuba oobo, mbuli kubamba pobwe lyakwiindilila alimwi akupa zipaizyo zyakutenta acipaililo. 17Kwamazuba aali ciloba bantu boonse Baisilayeli bakaliko bakasekelela pobwe lyakwiindilila alya cinkwa citakwe mimena. 18Kuzwa kuciindi ca Samuyele musinsimi, pobwe lyakwiindilila tiilyakali kusekelelwa boobu. Bamami bamwi boonse tiibakali kusekelela pobwe lyakwiindilila eeli mbuli bwakacita mwami Josiya, bapaizi, Balevi, bantu bacisi ca Isilayeli alimwi wabaku Jelusalemu, 19mumwaka wakkumi wakulela kwa Josiya.
Mamanino aakulela kwa Josiya
(2 Bami 23.28-30)
20Lino mwami Josiya naakacita zyoonse eezi kuŋanda ya Leza, mwami Neko waku Ijipiti wakasolweda mpi yakwe kuyoolwana Kaacemisyi kumulonga wa Yufuletisi. Josiya wakasoleka kumukasya. 21Pele Neko wakatumina Josiya makani aaya aakuti, “Kulwana ooku takukujatikizyi, omwami wa Juda. Tiindazida kukulwana, pele kulwana basinkondoma, alimwi Leza wandaambila kuti ndifwambaane. Leza uli aandime, utandiingi-ingi, watacita boobo ulakunyonyoona.” 22Pele Josiya wakazumanana kulwana. Wakakaka kuswiilila kuli zyakaambwa kwiindila mumwami Neko, wakaligabbaika akuunka mukulwana, mumabanda aa Megido.
23Kabalwana mwami Josiya wakayaswa amimvwi ya Baijipiti. Wakalailila babelesi bakwe kuti, “Amunditole kumbi, nkaambo ndalicisa kapati!” 24Bakamubweza kuzwa munkalaki yakwe akumubikka munkalaki imwi yakali waawo, bamutola ku Jelusalemu. Ooko nkwaakaakufwida akuzikkwa muzyuumbwe zyabwami. Bantu boonse bamu Jelusalemu bakamulila.
25Musinsimi Jelemiya wakalemba lwiimbo lwabuumba lwakulila mwami Josiya. Sunu cakaba cilengwa Muisilayeli kuti baimbi, baalumi naa bakaintu kabaimba lwiimbo oolu kabalila Josiya. Lwiimbo oolu lulajanika munyimbo zyabuumba!
26Lino zyoonse eezyo Josiya nzyaakacita, mbwaakalipede ku Mwami Leza, mbwaakali kuswiilila Mulawo wa Mwami Leza, 27azyamakani aakwe kuyoosikila kumamanino zililembedwe mumabbuku aabami ba Baisilayeli a Juda.
Currently Selected:
2 Makani 35: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
